Հստա­կեց­վում է մար­տա­կան հեր­թա­պա­հու­թյուն իրա­կա­նաց­նող պայ­մա­նագ­րա­յին զին­ծա­ռա­յող­նե­րի կար­գա­վի­ճա­կը

Պաշտպանության նախարարությունը հանրային քննարկման է ներկայացրել նոր նախագիծ, որով հստակեցվում է հակառակորդի հետ անմիջական շփման պայմաններում մարտական հերթապահություն կատարող ավագ ենթասպայական կազմում ընդգրկված, սակայն շարքային և կրտսեր ենթասպայական կոչումային դասակարգումով պաշտոններ զբաղեցնող պայմանագրային զինծառայողների կարգավիճակը, ինչպես նաև իրավունքի լիարժեք իրացման գործընթացի ապահովումը:

Հիմնավորման մեջ նշվում է, որ կառավարության 2014 թ.-ի հունվարի 30-ի N 145-Ն որոշման 3-րդ հավելվածի 31-րդ կետի 2-րդ ենթակետը գործնականում կիրառելը ի հայտ է բերել որոշման կիրառման հետ կապված թերի, ոչ լիարժեք կարգավորում, մասնավորապես՝ խոչընդոտներ են առաջանում հակառակորդի հետ անմիջական շփման պայմաններում հերթապահություն կատարող այն զինծառայողների համար, որոնք ունեն ավագ ենթասպայական զինվորական կոչում, սակայն նշանակված են շարքային կամ կրտսեր ենթասպայական կազմերի կոչումային դասակարգումով պաշտոնների, այսինքն՝ ցածր պաշտոնի: 

Որոշման 31-րդ կետի 2-րդ ենթակետով սահմանված է՝ հակառակորդի հետ անմիջական շփման պայմաններում մարտական հերթապահություն կատարող շարքային և կրտսեր ենթասպայական կազմերի պայմանագրային զինծառայողների դրամական ապահովությանն ուղղված միջոցները զորամասի հրամանատարի կողմից տրված տեղեկանքի հիման վրա ընտանիքի ամբողջական եկամտի հաշվարկի մեջ չեն մտնում, մինչդեռ ավագ ենթասպայական կազմում ընդգրկված, սակայն շարքային կամ կրտսեր ենթասպայական կազմի կոչումային դասակարգումով պաշտոն զբաղեցնող զինծառայողի նկատմամբ այդ իրավունքը չի գործում, ինչն արդարացված չէ: 

Զինծառայողների դրամական բավարարումն ըստ կազմերի, հաշվառումը, գործառույթների սահմանումը և դրանց առանձնահատկությունները պայմանավորված են զինծառայողի զբաղեցրած պաշտոնով: 

Որոշման ներկայիս տարբերակի իրավական անորոշության լուծումը հնարավորություն կտա ավագ ենթասպայական կազմում ընդգրկված, սակայն շարքային և կրտսեր ենթասպայական կազմի կոչումային դասակարգումով պաշտոն զբաղեցնող պայմանագրային զինծառայողներին իրացնելու իրենց իրավունքը: 2020 թ.-ի հունիսի 1-ի դրությամբ ավագ ենթասպայական կազմի զինվորական կոչում ունեցող և շարքային կամ կրտսեր ենթասպայական կազմի զինվորական պաշտոն է զբաղեցնում 89 զինծառայող:

Նախագծի ընդունման դեպքում ակնկալվում է որոշման մեջ հայտնաբերված թերության վերացում, սոցիալական աջակցության ստորաբաժանումներում տարընթերցման և մեկնաբանության խնդրի բացառում:

Առկա իրավական անորոշությունը լրացնելու, ի հայտ եկած թերությունը շտկելու և զինծառայողների կողմից իրենց իրավունքի լիարժեք իրացման գործընթացի պատշաճ կազմակերպումը գործնականում երաշխավորելու նպատակով առաջարկվում է կառավարության 2014 թ.-ի N 145-Ն որոշման 3-րդ հավելվածով սահմանված ընտանիքի անապահովության գնահատման համակարգում հաշվառելու կարգի 31-րդ կետի 2-րդ ենթակետում «կազմերի» բառից հետո լրացնել «զինվորական պաշտոն զբաղեցնող» բառերը։

ԼՈՒՍԻՆԵ ԱՌԱՔԵԼՅԱՆ