Ադրբեջանը խնդիր է դրել փոքր քայլերով փոփոխել շփման գիծը, իրենց ձեռնտու դիրքեր գրավել. Վաղարշակ Հարությունյան

Մոսկվայում Ադրբեջանի դեսպան Փոլադ Բյուլբյուլօղլին հուլիսի 13-ի իր ելույթում բացահայտեց Ադրբեջանի նպատակները: Այս մասին լրագրողների հետ հանդիպման  ժամանակ ասաց  պաշտպանության նախկին նախարար Վաղարշակ Հարությունյանը:

Նա նշեց, որ 2016 թվականին ապրիլյան պատերազմի ժամանակ եւս նա բացահայտեց Ադրբեջանի ռազմավարությունը:

«Կարեւոր չէ, թե ով է առաջին սկսելը, կարեւորն այն է, թե ինչի է տեղի ունենում: Ինչպե՞ս կարող է, որ 10 մլն-անոց Ադրբեջանը, որը ունի հզոր նավթային պաշարներ, հզոր զինված ուժեր, թույլ տա, որ Ադրբեջանի 20 տոկոսը լինի օկուպացված: Սրանից մենք պետք է եզրակացնենք, որ Ադրբեջանն այսօր  իր առջեւ դրել է խնդիր ոչ թե հարցը լուծել բանակցային գործընթացով, այլ գնալ ռազմական ճանապարհով»,- ասաց  նա:

Նախկին նախարարը նշում  է, որ եթե հետեւենք Ադրբեջանի վերջին եւ նույնիսկ մեկ տարվա հայտարարություններին, ապա կհասկանանք, որ դա իրենց մոտ Ղարաբաղի հարցի լուծման ռազմավարությունն է. «Իլհամ Ալիեւն ասում է հետեւյալը, որ այսօր միջազգային հարաբերություններում առաջին տեղում է ուժի գործոնը, այնուհետեւ ավելացնում, որ ոչ միայն Զանգեզուրը եւ Երեւանն է Ադրբեջանինը, հունիսի 3-ին զորամասի բացմանը հայտարարում է, որ Հայաստանի այսօրվա տարածքը հին պատմական Ադրբեջանի տարածքն է: Խոսքը Ղարաբաղի  մասին չէ, այլ ողջ Հայաստանի մասին»:

Վաղարշակ Հարությունյանը հիշեցնում է նաեւ Ադրբեջանի նախկին արտգործնախարար Թոֆիկ Զուլֆուգարովի հայտարարությունը, որում ասվել է, որ իրենք   ի վիճակի են Նախիջեւանից խփել Երեւանին եւ պաշտպանում է նույն միտքը: «Պաշտպանության նախարարը հունիսի 26-ին եւս ասում է նույնը՝ մենք չենք հանդուրժելու եւ գնալու ենք ռազմական ճանապարհով: Եթե սա ամփոփենք, հասկանալի է դառնում թե ինչու է Ադրբեջանը գնում այսպիսի քայլերի: Սա Ադրբեջանի ռազմավարությունն է՝ խուսափել բանակցային գործընթացից եւ հարցը լուծել ռազմական ճանապարհով»,- նշեց նա:

Վաղարշակ Հարությունյանի կարծում է, որ  Ադրբեջանը խնդիր է դրել փոքր քայլերով փոփոխել շփման գիծը, ընդունել այնպիսի դիրքեր, որն իրենց տալիս է առավելություն:

«Իլհամ Ալիեւը հայտարարել է, որ ուժեղացնում են իրենց բանակը եւ ժամանակ առ ժամանակ հասնում են հաջողությունների, օրինակ բերելով՝ 2016 թվականի ապրիլյան պատերազմը, երբ տարածքներ են վերցրել եւ որդեգրել են պատերազմ սկսելու քաղաքականությունը»,-ասաց Վաղարշակ Հարությունյանը:

Նախկին նախարարն ասում է, որ Ադրբեջանը սխալ է գնահատում իրավիճակը, նա  հույս ունի, որ տարածքով մեծ է, ունի ռեսուրսներ, բնակչությունն է մեծ եւ համարում  է, որ բավարար է, որպեսզի գնա հաղթանակի եւ գնում է սրացումների. իրավիճակը ճիշտ չի գնահատել:

«Տարածաշրջանում Հայաստանի, Ղարաբաղի եւ Ադրբեջանի ռազմաքաղաքական բալանսը ի օգուտ Ադրբեջանի չէ, եթե նա սկսի պատերազմ, ապա պարտվելու է, որովհետեւ մենք ունենք այնպիսի միջոցներ, որոնք ի վիճակի են ոչնչացնել Ադրբեջանի ողջ տնտեսական ներուժը: Իրենք դա լավ պատկերացնում են, սակայն ցույց են տալիս, որ այդպես չէ»,-ասաց նա:

Վաղարշակ Հարությունյանը նշեց, որ սահմանում լարված իրադրության պայմաններում մեր բանակը եւ գլխավոր շտաբը գործել են շատ հստակ եւ գրագետ եւ պարտադրել են հակառակորդին լռել եւ ունենալ կորուստներ: «Բայց նաեւ պետք է գնահատել, որ հայկական կողմը զուսպ է եղել, որ չանցնի այն չափը, որը կբերի լայնածավալ պատերազմի, ինչը Ադրբեջանը չի զգում»:

Խոսելով նաեւ  միջազգային կառույցների հայտարարություններին մասին՝ Վաղարշակ Հարությունյանը նշեց, որ պետք է լավ պատկերացնենք, որ միջազգային կառույցները, կամ պետությունները հայտարարություններ անելիս՝ պետք է ունենան փաստաթղթեր եւ հիմնավորումներ, իսկ զինադադարի խախտման պարագայում, երբ չկան վերահսկման մեխանիզմներ, ապա կոչ են անում երկու կողմին.

«Բոլորը գիտակցումն են, որ մեզ պատերազմ պետք չէ, մենք ցանկանում ենք հարցը լուծել բանակցային ճանապարհով, բայց չենք խուսափում պատերազմից, եթե դա իրենք փորձեն իրականացնել»,- հավելեց  Վաղարշակ Հարությունյանը: