Դերասաններ Հովհաննես Դավթյանն ու Հայկ Պետրոսյանը ամանորյա Stand up շոու-ներկայացման են պատրաստվում: Սա դերասանների առաջին միասնական աշխատանքն է, որին շատ լրջորեն են պատրաստվում:
Life.panorama.am-ի հետ զրույցում դերասան Հովհաննես Դավթյանը նշեց, որ այժմ զբաղված են սցենարային աշխատանքներով. «Արդեն երկրորդ տարին է, որ ակումբային ձեւաչափով ելույթներ ենք ունենում թե խմբով, թե առանձին-առանձին: Հայկի հետ առիթ ունեցել ենք խմբով ներկայանալու, բայց միայն երկուսով դեռ չենք ելույթ ունեցել, ուստի սա կլինի մեր համատեղ առաջին աշխատանքը: Այս պահին ես զբաղված եմ սցենարական, իսկ Հայկն էլ՝ արդեն լսված երգերի համար նոր խոսքեր գրելու աշխատանքներով, քանի որ ներկայացման երաժշտական մասն ինքը կապահովի՝ երգելով լսված երգեր, բայց նոր բովանդակությամբ»,- պատմեց դերասանն ու հավելեց.
«Ներկայացումը կկայանա «Ռետրո» ակումբում տարվա 12-րդ ամսի՝ դեկտեմբերի 12-ին, ժամը 21:21-ին. փորձել ենք հետաքրքիր թվախաղ ստանալ»:
Հետաքրքրվելով, թե ներկայացման ժամանակ արծարծվող հումորը ինչպիսի՞ թեմաների կանդրադառնա, Հովհաննես Դավթյանը նշեց. «Սա լինելու է հաշվետու ներկայացման նման մի բան, որը կհանձնենք մեր փոքրիկ, բայց արդեն որոշակիորեն ձեւավորված հանդիսատեսի դատին: Կանդրադառնանք բոլոր թեմաներին՝ քաղաքականությունից մինչեւ կենցաղ, Նոր տարվան ընդառաջ կներկայացնենք մեր ազգային ավանդական ամանորյա անցուդարձը, թանկացումները, ամանորյա գնումները եւ այլն»:
Հայկ Պետրոսյանի հետ համագործակցության մասին խոսելիս՝ Հովհաննեսը նկատեց. «Հայկը շատ տաղանդավոր մարդ է, նա ոչ միայն լավ է խաղում, այլեւ հրաշալի երգում է, այնպես որ ներկայացման երաժշտական մասն ինքը կներկայացնի: Ի դեպ, ներկայացման սկզբում եւ վերջում ես ու Հայկը անակնկալի տեսքով միասին զուգերգ կունենանք»:
Իսկ հարցին, թե արդյոք երգելը դերասանի մոտ լավ է ստացվում, պատասխանեց. «Այն, որ ես ձայն եւ լսողություն ունեմ, դա հաստատ է, բայց ես ինձ թույլ կտամ որպես երգիչ ներկայանալ միայն այն ժամանակ, երբ ունենամ համապատասխան բարձրագույն կրթություն: Այնպես որ, ես երգիչ չեմ, ես պարզապես նման ներկայացումների ժամանակ կարող եմ ինչ-որ երգեր կատարել»:
Այս համերգ-ներկայացումը միակը չի լինի, Հովհաննես Դավթյանը տեղեկացրեց, որ պլանավորում են մինչ Նոր տարի երեւանյան տարբեր ակումբներում ներկայացնել այս ծրագիրը, ավելին, Հայկն ու Հովհաննեսը նախատեսում են ելույթ ունենալ նաեւ Գյումրիում:
Հովհաննես Դավթյանի հետ խոսեցինք նաեւ «Անքնություն» մոնոներկայացումից եւ հաջորդ տարի նախատեսված իր նոր աշխատանքից. « «Անքնությունը»-ը խաղացի երկու տարի եւ կարծում եմ, չնայած այս երկու տարվա ընթացքում այն շատ լավ է ընդունվել, եւ գուցե դեռ էլի խաղամ այդ ներկայացումը, բայց միեւնույն է, այն արդեն կորցրել է իր ակտուալությունը, ուստի նոր ասելիքով նոր ներկայացման ժամանակն է: Հենց հիմա նաեւ այդ ուղղությամբ եմ աշխատում, առավել շատ կկենտրոնանամ հունվար եւ փետրվար ամիսներին եւ հուսամ, որ գարնան սկզբին կկարողանամ իմ հանդիսատեսին ներկայացնել իմ երկրորդ մոնոներկայացումը»,- նշեց նա:
