Ունցիայի դիմաց մինչեւ 3000 դոլար. Գների ռեկորդային աճից հետո ինչ է շուկան սպասում ոսկուց

Ոսկու գինը թարմացրել է պատմական առավելագույնը՝ անցնելով 2011 թվականի ռեկորդից: Համավարակի պայմաններում մետաղը դարձել է ակտիվ, առանց որի ներդրողները չեն կարող մնալ: Սա արդյոք նշանակո՞ւմ է, որ ռալին շարունակվում է:

Հուլիսի 27-ին ոսկու ֆյուչերսները՝ օգոստոսյան մատակարարումներով թանկացել են ավելի քան 2 տոկոսով եւ գագաթնակետին արժեցել են տրոյական ունցիայի դիմաց 1941,9 դոլար: Նախորդ ռեկորդը սահմանվել էր 2011 թվականի սեպտեմբերի 6-ին, երբ գինը ունցիայի դիմաց հասել էր 1920 դոլարի: Աճում են նաեւ մյուս թանկարժեք մետաղների գները, օրինակ՝ արծաթի սեպտեմբերյան ֆյուչերսի գինը երկուշաբթի հասել էր ունցիայի դիմաց 24,5 դոլարի՝ սա 2013 թվականի օգոստոսից առավելագույնն է, հայտնում է Forbes-ը: 

Այս շաբաթվա սկիզբը նշանավորել է ոսկու գնի աճի նոր նշաձող, հայտնում է The Wall Street Journal-ը: Պարբերականը նշում է, որ շատ թրեյդերներ ոսկու ներկայիս ռալին մեկ շարքում են դնում 2008-2011 թվականների իրադարձությունների հետ, երբ ֆինանսական ճգնաժամից հետո ոսկին ռեկորդային թանկացում ունեցավ, ինչպես նաեւ 1970-ական թվականների վերջի հետ, երբ գները վեր ցատկեցին Բրետոն-Վուդսի արժութային համակարգից հրաժարվելուց հետո: Ընթացիկ ռալիին նպաստում են համաշխարհային տնտեսության մռայլ հեռանկարները, տոկոսադրույքների նվազեցումը, ինչպես նաեւ ԱՄՆ-ի եւ Չինաստանի միջեւ հարաբերությունների լարվածության մեծացումը ու դոլարի արժեզրկումը: Այսպիսի պայմաններում ներդրողները ռիսկերից հեռանում են դեպի ակտիվներ, որոնք նրանք ապաստարան են համարում, շեշտում է WSJ-ն:

Դոլարի հետ ոսկու ավանդական հետադարձ կապը (որքան դոլարն էժան է, այնքան ոսկին թանկ է) այս տարի ավելի վաղ թուլացրել էին, քանի որ համավարակի ժամանակ երկու ակտիվներն էլ շահել էին, երբ ներդրողները սկսել էին դրանք գնել որպես ապաստարան: Բայց հիմա ավանդույթը կրկին դրսեւորվում է, կարծում է UBS թանկարժեք մետաղների հարցերով ռազմավար-վերլուծաբան Ջոնի Թեւեսը. եթե դոլարը շարունակի անկումը, առաջիկա ամիսներին ոսկու գնաճը կշարունակվի: «Այս տարի ոսկու գնի փոփոխությունը իսկապես ռազմավարներիր աճող հետաքրքրության հետեւանք է»,- նշել է փորձագետը: Ներդրողները, որոնք նախկինում չէին հետաքրքրվում թանկարժեք մետաղներով, սկսել են այն գնել: Արդյունքնում՝ ոսկու գինը 6 ամսում կարող է անցնել 2000 դոլար նիշը, կարծում է Թեւեսը:

Գնի ապագա ռեկորդային աճի առաջին նշանները դրսեւորվել էին դեռեւս 2019 թվականի կեսին, երբ ԱՄՆ Դաշնային պահուստային համակարգը հասկացրեց, որ պատրաստ է նվազեցնել տոկոսադրույքները, հայտնում է Bloomberg-ը: Դա կապված էր այն հանգամանքի հետ, որ շուկաների վրա առաջին հերթին ԱՄՆ մասնակցությամբ առեւտրային պատերազմների ազդեցության վերաբերյալ անորոշությունը ստվերում էր հետագա հեռանկարները: 2020 թվականի սկզբին ռալին թափ է հավաքել աշխարհաքաղաքական լարվածության աճի ֆոնին, իսկ այնուհետեւ կորոնավիրուսի բռնկումը ռեցեսիա է հարուցել ամբողջ աշխարհում, նշում է գործակալությունը:

«Մեծ աճն անխուսափելի է, քանի որ մտնում ենք մի ժամանակաշրջան, որը շատ նման է համաշխարհային ֆինանսական ճգնաժամից հետո ստեղծված իրավիճակին, երբ ոսկու գները մինչեւ ռեկորդային մակարդակի էին հասել ֆինանսական համակարգի մեջ ԴՊՀ կողմից ահռելի քանակության փող բաց թողնելու հետեւանքով»,- վստահ է MineLife Pty-ի ավագ վերլուծաբան Գեւին Վենդտը: Նա հավելել է, որ լրացուցիչ խթան են թույլ դոլարը եւ բացասական իրական դրույքները: Ոսկին կարող է ժամանակավորապես ամրանալ ընթացիկ դիրքում՝ նախքան առաջիկա շաբաթներին 2000 դոլար եւ ավելի նիշին նպատակաուղղվելը, շեշտել է Վենդտը:

WisdomTree ընկերության հետազոտությունների հարցերով տնօրեն Նիթեշ Շախը հնարավոր է համարում, որ եթե տարբեր երկրների կենտրոնական բանկերը եւ կառավարությունները շարունակեն տրիլիոններ հատկացնել տնտեսության խթանման համար, ներդրողները հետագայում եւս ոսկի կգնեն: