«Ֆիլ­մով ոչ մի­այն մե­ծա­րում ենք Պար­գև սրբա­զա­նին, այ­լև անդ­րա­դառ­նում ենք Ար­ցա­խյան ազա­տա­մար­տի պատ­մու­թյա­նը»

Մոտ երկու շաբաթ է, ինչ սկսվել են «Սպիտակ խաչի պաշտպանը» վավերագրական ֆիլմի նկարահանումները: Ֆիլմը պատմում է Արցախի թեմի առաջնորդ Պարգև սրբազանի, նրա անցած ուղու, Արցախի թեմի վերազարթոնքի համար կատարած մեծածավալ աշխատանքի մասին: Ֆիլմի ռեժիսորը Մանանա Հակոբյանն է, երաժշտության հեղինակը՝ ՀՀ վաստակավոր արտիստ, կոմպոզիտոր Արա Գևորգյանը, պրոդյուսերը Էդգար Այվազյանն է: 

1 ժամ 20 րոպե տևողությամբ ֆիլմի պրեմիերան տեղի է ունենալու նոյեմբերին՝ Ստեփանակերտում, Լոս-Անջելեսում և Փարիզում: Հեռուստադիտողները հնարավորություն կունենան այն դիտել Հանրային հեռուստաընկերության եթերում:

Ֆիլմի պրոդյուսեր Էդգար Այվազյանը նշում է՝ շուտով կավարտեն նկարահանումներն Արցախում, ինչից հետո նախատեսում են նկարահանումներ իրականացնել ևս յոթ երկրում:

«Արցախում կատարված նկարահանումներին ակտիվորեն մասնակցել է Պարգև սրբազանը, Արցախի ներկա և նախկին նախագահները, գեներալներ, որոնք մասնակցել են Արցախյան պատերազմին, ներդրում ունեցել Շուշիի ազատագրման գործում և ոչ միայն: Ֆիլմում ներգրավված են բոլոր նրանք, ովքեր ճանապարհ են անցել Պարգև սրբազանի հետ: Արցախում հիմնական նկարահանումերը կատարել ենք, մնացել են մի քանի դրվագներ: 

Հաջորդիվ նկարահանումներ ենք իրականացնելու ԱՄՆ-ում, Փարիզում, Երուսաղեմում, Մոսկվայում և մի շարք այլ երկրներում, որտեղ բնակվում են մեր հերոսները, որոնք 1990-ական թվականներից հետո տարբեր պատճառներով տեղափոխվել են ապրելու: Նրանք ունեն իրենց ներդրումն Արցախյան թեմի վերակազմավորման աշխատանքներում, և նրանք պետք է պարտադիր նկարահանվեն այս ֆիլմում»,-«Փաստի» հետ զրույցում ասում է Այվազյանը:

Իսկ ինչպե՞ս առաջացավ գաղափարը նման ֆիլմ ստեղծելու: «Արդեն 15 տարի է, ինչ նկարահանում ենք «Ծագումով հայեր» հաղորդումը: Ներկայացնում ենք տարբեր երկրներում բնակվող հայերին, բազմիցս լուսաբանել ենք Հայ Առաքելական եկեղեցու թեմերի առաջնորդներին: 2016 և 2019 թվականներին շատ հայտնի հայերի՝ Միշել Լեգրանին, Պատրիկ Ֆիորիին, Ռոզի Արմենին և այլոց հրավիրեցինք Հայաստան, մասնավորապես՝ Արցախ: 

Հիմնական մեխը հենց այդ էր, որ ծագումով հայերն այցելեն Արցախ, ծանոթանան մարդկանց հետ, առնչվեն մշակույթին, արցախյան բարիքներին:

Այդ ամբողջ ընթացքում մեզ աջակցում էր Պարգև սրբազանը: Նրա մասին պատմող ֆիլմ նկարահանելու գաղափարը նաև այդ ժամանակ առաջացավ, գնալով այն հասունացավ, իսկ այժմ էլ կյանքի է կոչվում: Արցախյան հաղթանակների հիմքում մեծ է Պարգև սրբազանի ներդրումը: 

Այս ֆիլմով մենք ոչ միայն մեծարում ենք նրան և ներկայացնում նրա անցած ճանապարհը, այլ ակամա անդրադառնում ենք Արցախյան ազատամարտի պատմությանը, որովհետև, եթե Արցախ, ուրեմն՝ Պարգև սրբազան, եթե Պարգև սրբազան, ուրեմն՝ Արցախ: Ֆիլմում նկարահանվում են Արցախյան ազատամարտի հերոսները, որոնք ապրում են մեր կողքին: Նրանք շարունակում են մեծ ներդրում ունենալ Արցախի զարգացման գործում»,-նշում է մեր զրուցակիցը: 

 

Նա ընդգծում է՝ պատերազմի ողջ ընթացքում սրբազանը զինվորների կողքին է եղել թե՛ օրհնությամբ, թե՛ ֆիզիկապես: ««Աստված եկավ ասելու արցախահայությանը՝ ձեզ հետ եմ, շարունակեք, թեմը եկավ, հաղթանակն եկավ, պետականություն ստեղծեցինք և այս ամենը արել ենք համահայկական ջանքերով». սրանք Պարգև սրբազանի խոսքերն են: Այս ֆիլմի վերնագիրն անգամ իր պատմությունն ու խորհուրդն ունի, և դիտելուց յուրաքանչյուրն իր համար այն կբացահայտի»,-եզրափակում է Էդգար Այվազյանը:

ԼՈՒՍԻՆԵ ԱՌԱՔԵԼՅԱՆ