Օվա­լա­ձև աշ­խա­տա­սե­նյա­կը կդառ­նա՞ նկա­րա­հան­ման հրա­պա­րակ. ի՞նչ կապ կա Մե­լա­նյա Թրամ­փի ու Քիմ Քար­դա­շյա­նի և Ալեք­սանդ Լե­բե­դի ու Քա­նիե Ուես­թի մի­ջև

mir24.tv-ն «Ամերիկյան գեներալ Լեբեդը. Քանիե Ուեսթը հանրապետականների տրոյական ձի՞ն է» վերնագրով հոդվածում գրում է, որ ԱՄՆ-ի նախագահ Դոնալդ Թրամփի վարկանիշը ընկել է համաճարակի պատճառով: Եվ նախընտրական մրցավազքում հայտնվել է մեկ այլ դժվար մրցակից: 

Դա սուպերաստղ, միլիարդատեր, ռեփեր Քանիե Ուեսթն է: Բայց որոշ քաղաքագետներ վստահ են, որ այս ամենը Թրամփի նախընտրական շոուի մի մասն է: Արդյո՞ք դա այդպես է, mir24.tv -ն փորձել է հասկանալ: Վականդան գեղարվեստական երկիր է «Սև հովազ» կինոնկարից, որտեղ ապրում են միայն սևամորթներ՝ իշխաններ, գիտնականներ, մարտիկներ՝ օժտված գաղտնի գիտելիքներով և գերբնական հատկություններով, և նրանք դիմակայում են աղքատ թաղամասերի սպիտակ չարագործներին: 

Իսկ հիմա ԱՄՆ-ում հայտնվել է իսկական հերոս և իսկական ռեփեր Քանիե Ուեսթը, որը մտնում է նախագահական մրցավազքի մեջ և ամենայն լրջությամբ խոստանում ԱՄՆ-ը դարձնել Վականդա: Ռեփերի գլխավոր խորհրդատուն Իլոն Մասկն է, կարգախոսը՝ «Այո»-ն: Դա նաև ռեփերի նոր ալբոմի անունն է, որը պատրաստվում է թողարկել: Իսկ նախընտրական քարոզարշավը անվանվել է «Birthday Party», որը նշանակում է կա՛մ ծննդյան օր, կա՛մ երեկույթ: 

Ռեփերը խոստանում է, որ երկիրը նորից կծնվի: Ինքը՝ Ուեսթը, շատ բան ունի կիսելու: Forbes- ը գնահատել է նրա ունեցվածքը 1,3 միլիարդ դոլար: Եթե Ուեսթին իսկապես հաջողվի փոխարինել Թրամփին, ապա Սպիտակ տան նոր սեփականատերը մոտ 800 միլիոն դոլարով աղքատ կլինի նախորդից: 

Բայց նոր առաջին տիկինը ոչ պակաս դիտարժան կլինի: Ուեսթի կինը՝ դերասանուհի և մոդել Քիմ Քարդաշյանը, ընդամենը 20 սանտիմետրով է կարճ Մելանյա Թրամփից: Բայց փոխարենը ի՜նչ մարմնամասեր ունի՝ 99-66-102: 

Կոնքը հինգ սանտիմետրով ավելի լայն է Ջենիֆեր Լոպեսի կոնքից և զիջում է միայն երգչուհի Նիկի Մինաժին, որի մոտ այն ամբողջ 114 սանտիմետր է: Եթե Մելանյան իր պատանության շրջանում է ունեցել բավականին անկեղծ ու բաց նկարներ, ապա Քիմը ընդհանրապես գաղտնիքներ չունի ամերիկյան հանրությունից: Բազմաթիվ են հաքերների կողմից գողացված նրա պրոֆեսիոնալ և սիրողական մերկ լուսանկարները: 

Ու ևս մեկ տարբերություն՝ Մելանյան Թրամփի երրորդ կինն է, իսկ Քիմի համար Ուեսթը երրորդ ամուսինն է: Քարդաշյանների ընտանեկան խնդիրները վաղուց են հանդիսանում հեռուստատեսային ռեալիթի շոուի մի մասը, որը հեռարձակվում է 2007 թվականից և կոչվում է «Քարդաշյանների ընտանիքը»: Հնարավոր է, որ Օվալաձև աշխատասենյակը դառնա հաջորդ նկարահանման հրապարակը: 

Քիմ Քարդաշյանը Ուեսթի համար լուրջ առավելություն է: Միայն Instagram- ում նա ունի 180 միլիոն հետևորդ, որը ԱՄՆ-ի բնակչության կեսից ավելին է: Նա նաև հաջողությամբ իր ժողովրդականությունը գումարի է վերածում և ունի 370 միլիոն դոլար հարստություն: Ըստ Քիմի, ինքը հինգ աշխատող ունի, և «նրանք պարզապես մարքեթինգի և բիզնեսի աստվածներ են»: 

Քիմը հանդես է եկել Երևանում տեղի ունեցած Տեղեկատվական տեխնոլոգիաների կոնգրեսում որպես փորձագետ: Աստղի հայրը հայ է, և նա արդեն երկու անգամ այցելել է իր պատմական հայրենիք: Հայաստանում զույգը նաև մկրտել է իրենց երեխաներին: Քիմն ու Քանիեն չորս երեխա ունեն: Ռեփերը աբորտի հակառակորդ է և անգամ դրան է նվիրել իր առաջին նախընտրական ելույթը: «Հայրս ցանկացել է աբորտ անել, քանի որ չափազանց զբաղված է եղել, բայց մայրս փրկել է իմ կյանքը, Քանիե Ուեսթը կարող էր անգամ չլինել», - ասել է երգիչ-թեկնածուն, որը ներկայանում է զրահաբաճկոնով, բայց բաց սրտով: Արցունքներն արդեն նորություն չեն ամերիկյան քաղաքականության մեջ: Մյուս կողմից՝ ռեփերը անընդհատ շեշտում է, որ ինքը կրոնասեր է, քրիստոնյա: «Նախագահը նշանակվում է Տիրոջ կողմից, եթե ես հաղթեմ, դա Տիրոջ որոշումն է», - ասել է Քանիե Ուեսթը: 

Շատերը հավատում են աստղին: «Աստված օգտագործում է Քանիե Ուեսթին», - բացականչում են ամերիկուհիները: Ընդհանուր առմամբ ներկայումս Ուեսթը Աստծո կողմն է և ընդդեմ քաղաքական գործիչների: Դեռևս հունիսին նա աչքի է ընկել «Սև կյանքերը կարևոր են» շարժման գործողություններում: 

Ոչ մի մեկնաբանություն: Բացի դա, Ուեսթը եղել է Թրամփի եռանդուն կողմնակիցը և անգամ հանդիպել է նրան Սպիտակ տանը: «Այս գլխարկն ինձ ուժ է տալիս, իմ հայրն ու մայրը ամուսնալուծված են եղել, ուստի մեր տանը երբեք տղամարդկային բավարար էներգիա չի եղել, և ինձ թվում է, որ ես ամուսնացել եմ այս ընտանիքի հետ», - ասել է Քանիե Ուեսթը՝ ժեստով ցույց տալով գրասենյակը: 

Բայց այդ ընտանիքը հիմա խնդիրներ ունի: Հարցումների համաձայն, Թրամփը զիջում է Բայդենին: «Առաջին հերթին ես չեմ պարտվում, դրանք ֆեյք հարցումներ են, ես տեսել եմ այլ հարցումներ, որտեղ ես առաջատար եմ», - ասել է Դոնալդ Թրամփը: 

Իսկ փորձագետները լուրջ կասկածներ ունեն, որ Ուեսթը սփոյլեր-թեկնածու է, որը պետք է Բայդենից խլի սևամորթների ձայները: Այո, հարուստ է, բայց իրենցն է, ոչ դասական է, բայց ռասայական մոտեցում է: Ըստ ԱՄՆ-ի և Կանադայի ինստիտուտի գլխավոր գիտաշխատող Վլադիմիր Վասիլևի, «Ուեսթը դեմոկրատների ճամբարում հանրապետականների տրոյական ձին է, նա չի դառնա նախագահ, բայց նրան կհաջողվի հավաքել միլիոնավոր կամ նույնիսկ տասնյակ միլիոնավոր ձայներ»: Թե ինչպես է աշխատում այդ տեխնոլոգիան, երևացել է 1996 թվականին Ռուսաստանում կայացած ընտրություններում: 

Այն ժամանակ գեներալ Ալեքսանդր Լեբեդն է օգնության հասել Բորիս Ելցինին: Շարժուն և համեմատաբար երիտասարդ այդ թեկնածուն, ներկայացնելով հայրենասիրական ուժերը, առաջին փուլում խլել է կոմունիստներից նրանց ձայների գրեթե 15% -ը, իսկ երկրորդ փուլում իր համախոհներին կոչ է արել քվեարկել գործող նախագահի օգտին: Ելցինը հաղթել է, իսկ Լեբեդը ստացել է անվտանգության խորհրդի քարտուղարի պաշտոնը: Լեբեդն այն ժամանակ եղել է 46 տարեկան, իսկ Ուեսթը հիմա 43 տարեկան է, և եթե որևէ բան կարող է անել բիզնեսում կամ մշակույթում, ապա անվտանգության հարցերով չի կարող զբաղվել: 

«Ինձ մոտ ախտորոշել են երկբևեռ խանգարում», - ասել է Քանիե Ուեսթը: Այսինքն մանիակալ-դեպրեսիվ վիճակ, բայց միգուցե դա այսօր ոչ թե մինուս է, այլ միտում: Վերջերս Թրամփն էլ է անցել համարժեք ընկալման կոգնիտիվ թեստ: «Իրականում դա այնքան էլ հեշտ չէր, բայց ինձ համար դա հեշտ էր», - ասել է Դոնալդ Թրամփը: 

Բայց երբ թեստի հարցերը հայտնվել են համացանցում, օրինակ՝ «որ կենդանին է նկարում», նախագահին սկսել են ծաղրել: «Ես երաշխավորում եմ, որ Ջո Բայդենը չի անցնի այդ թեստը», - հավաստիացրել է ԱՄՆ-ի նախագահը: Նման իրականության մեջ է ապրում Ամերիկան:

Կամո Խաչիկյան