Ձուկը ջրում՝ «բազար» են անում

Արդեն մի քանի օր է, ինչ ակտիվորեն քննարկվում է Սահմանադրական և Վճռաբեկ դատարանների միավորման և մեկ ընդհանուր՝ Գերագույն դատարան ստեղծելու՝ սահմանադրական բարեփոխումների հանձնաժողովի որոշումը։ Չնայած այս թեմայի շուրջ կարծիքները բազմազան են, այդ թվում՝ շատ են այն պնդումները, որ այս գործընթացը ֆեյք օրակարգ է և իշխանություններն ընդամենը շոու են անում, այդուամենայնիվ, որոշ շրջանակներ բավականին ոգևորված են ու առանձնակի ակտիվություն են դրսևորում։

Մասնավորաբար, իրավաբանական հանրույթի որոշ ներկայացուցիչներ, չնայած հարցը դեռ նախնական քննարկման փուլում է, իսկ իշխանությունները շարունակում են ՍԴ ձևավորելու գործընթացը, շնչակտուր կուրծք են ծեծում և ամեն կերպ պաշտպանում Գերագույն դատարանի թեման: «Փաստ» թերթի տեղեկություններով, այս «թիմում» ոմանք պարզապես ցանկանում են հնարավոր բոլոր տարբերակներով սիրաշահել իշխանություններին և հույս ունեն ապագայում համալրել դեռևս մշուշի մեջ գտնվող Գերագույն դատարանի կազմը։

Ավելին, թերթին տեղեկություններ են հասել, որ նախկին պաշտոնյաներից մեկը, որը նույնպես ոգևորված է այս գաղափարով, տարբեր շրջանակներում հայտարարում է, թե ինքն արդեն նախնական պայմանավորվածություն է ձեռք բերել, և իշխանությունները Գերագույն դատարանի նախագահի պաշտոնը վստահելու են իրեն։ Մի խոսքով, ճիշտ հայտնի ասացվածքի մոտիվներով. «Ձուկը ջրում՝ բազար են անում»։