«Սա գնահատում եմ որպես անհարգալից վերաբերմունք». Արթուր Ղազինյան

Past.am

Երևան քաղաքի ընդհանուր իրավասության դատարանի Ավան- Նոր Նորք նստավայրում այսօր տեղի էր ունենում նոր կորոնավիրուսի համավարակի դեմ պայքարը տապալելու փաստի առիթով քրեական գործ հարուցելու նպատակով «Մեկ Հայաստան» կուսակցության նախագահ Արթուր Ղազինյանի կողմից ներկայացված հաղորդումը ՀՔԾ-ի կողմից մերժումը վերացնելու նպատակով դատարան ներկայացված բողոքի առաջին դատական նիստը։ Այն տևեց մի քանի րոպե: Նիստին քննիչը չէր ներկայացել, դատավորն էլ տեղեկացրեց, որ գործի նյութերը նոր է ստացել և ժամանակ է պետք ծանոթանալու համար: Դատական նիստը հետաձգվեց մեկ ամսով:

Լրագրողների հետ զրույցում դատական նիստի հետաձգումը Ղազինյանը հետևյալ կերպ մեկնաբանեց. «Դուք ականատես եղաք դատարանի կողմից բողոքի քննությունը գրեթե մեկ ամսով հետաձգելուն: Պատճառը ՀՔԾ-ի կողմից գործի նյութերն ուշ ուղարկելն էր: Քննիչն ինքը չէր ներկայացել: Սա գնահատում եմ որպես անհարգալից վերաբերմունք դատավարությանն ընդհանրապես, և գնահատում եմ որպես դատավարական տեխնիկական հնարք՝ չտալու հնարավորություն, որպեսզի, ըստ էության, բողոքը քննվի, շատ լավ հասկանալով, որ իմ կողմից ներկայացված հանցագործության մասին հաղորդումը եղել է բացարձակ հիմնավոր, ներկայացված են եղել անհերքելի և հանրահայտ փաստական տվյալներ, որոնց նույնիսկ 20 տոկոսի առկայության պարագայում ցանկացած իրավական պետության մեջ դատախազական և քննչական մարմիններն ուղղակի պարտավոր էին հարուցել քրեական գործ: Գործը գտնվում է քաղաքական վերահսկողության ներքո, քաղաքական հրահանգավորման տակ և քաղաքական բարձրագույն իշխանության անմիջական հսկողության ներքո»,-ասաց Արթուր Ղազինյանը:

Նրա խոսքով՝ փաստական տվյալները մեծ հաշվով առայժմ գաղտնիքներ չեն պարունակում, եղել են հասանելի հանրությանը: «Ամեն ինչ տեղի է ունեցել մեր աչքի առաջ, միտումնավոր, նախօրոք պլանավորված, կազմակերպված ձևով խեղաթյուրվել է, աղավաղվել է և մեզանից թաքցվել է մեր երեխաների, ծնողների, ընտանիքների կյանքի և առողջության համար կենսական վտանգ ներկայացնող տեեկատվություն, ինչի հետևանքով մենք այսօր ունենք 1150 մահացած և մոտավորապես 40 հազարից ավելի վարակակիր»,-նշեց նա:

Հարցին, որ եթե այս գործը, ըստ Ղազինյանի, գտնվում է քաղաքական հրահանգի տակ, ապա երաշխիք կա՞,  որ դատարանին քաղաքական հրահանգ չի տրվելու, կուսակցության նախագահն այսպես արձագանքեց: «Նման կանխավարկած չունեմ, որովհետև դատարանները բազմիցս ապացուցել են, որ իրենք մինչև այս պահը գոնե հեռու են մնացել քաղաքական թելադրանքից և կարողացել են գործել իշխանության քաղաքական կամքին հակառակ: Այդպիսի դեպքերը բազմաթիվ են, իհարկե, կան նաև այնպիսի դատական ակտեր, որոնք բխում էին իշխանության շահերից և ունեին, մեղմ ասած, խիստ վիճելի հիմք իրավական առումով»,-շեշտեց Ղազինյանը:

Լրագրողներից մեկի դիտարկմանը, թե իշխանությունը հակադարձում է այն պնդումներին, որ իրենք տապալել են կորոնավիրոուսի դեմ պայքարը, քանի որ բոլոր երկրներում էլ իրավիճակը գրեթե նույնն է եղել, եղել են մահացածներ, վարակվածության մեծ թվեր,  Ղազինյանը հակադարձում է. «Հայաստանում կա՞ ինչ-որ մեկը, որ այլ կարծիք ունի, քան այն, որ կորոնավիրուսի դեմ կառավարության տարած պայքարը տապալված և ձախողված է: Դատենք արդյունքներով, մահացածների թվով, վարակակիրների քանակով, տնտեսության ծանր վիճակով, բոլոր հետևանքներով: Ինչ վերաբերում է աշխարհի տարբեր երկրների հետ իշխանության և նրա կողմնակիցների սիրելի համեմատություններին, ապա իրենք միշտ բերում են այնպիսի օրինակներ, որոնք բխում են իրենց շահերից, մինչդեռ կան օրինակներ, որ չեն բխույմ իրենց շահերից, հետևաբար նրանք խուսափում են բերել այդ օրինակները և ցույց տալ, թե ինչպես էր պետք գրագետ, ժամանակին, ճշգրիտ ձևով կազմակերպել այս վիճակը հաղթահարելու պրոցեսը: Մենք ունենք ավելի շահեկան վիճակ, քան աշխարհի մնացած պետությունները: Աշխարհագրական դիրքով, երկու փակ սահմանով, տուրիստակայն բավականին նվազ հոսքերով և մարդկանց շարժի առավել սահմանափակ վիճակով պետք է ընդամենը տեխնիկապես գրագետ և ճիշտ ժամանակին ձեռնարկեինք անհրաժեշտ միջոցառումները, և ամենակարևոր բաղադրիչը համաճարակի դեմ պայքարն արդյունավետ վարելու համար, հասարակությանը ստույգ, ճշտված, հաստատված, լաբորատոր փորձաքննություն անցած, տվյալ պահին հասանելի ամբողջ տեղեկատվությունը տրամադրելն է: Մինչդեռ բոլորն են հիշում՝ մեր աչքի առաջ ինչպես էին իրենք միտումնավոր, դիտավորյալ, չարամտորեն նվազեցնում այս վիրուսի վտանգավորությունը, ինչպես էին այն ծաղրում բոլորիս աչքի առաջ, ինչպես էին համեմատում դա սովորական սեզոնային գրիպի հետ, մինչդեռ առողջապահության համաշխարհային կառույցները միաձայն պնդում էին, որ սա սովորական գրիպ չի: Ժամանակին ասում էին՝ խղճացեք ժողովրդին, դադարեցրեք ձեր անիմաստ քարոզարշավները և զբաղվեք մարդկանց կյանքի և առողջության խնդիրներով, իրենք պնդում էին՝ հետևեք բացառապես պաշտոնական լրատվությանը, իսկ այն ասում էր՝ ամեն ինչ նորմալ է, վախենալու որևէ բան չկա»,-ասաց Ղազինյանը:

Լրագրողների հետ զրույցի ողջ ընթացքում վերջինս դիմակ չէր կրում: «Հայտարարել եմ, որ բաց տարածքներում դիմակ չեմ կրելու: Դա իմ սկզբունքային որոշումն է, բնականաբար, դրա համար կարող եմ տուգանվել, ունեմ այդ իրավագիտակցությունը: Պատրաստ եմ տուգանվել, բայց չեմ վճարելու այդ տուգանքը, որովհետև պարետը, չլինելով սահմանադրական մարմին, իրավունք, լիազորություն չունի ընդունելու նորմատիվ իրավական ակտեր, և իր կողմից ընդունված նորմատիվ իրավական ակտն ինձ համար որպես իրավաբանի կիրառման ենթակա չէ: Դիմել եմ վարչական դատարան՝ պարետի կողմից ընդունված նորմատիվ իրավական ակտերի, իհարկե, մասնավոր դեպքով բաց տարածքում դիմակ կրելու նորմի իրավազորությունը վիճարկելու պահանջով: Սպասենք՝ դատարանն ինչ որոշում կկայացնի: Առկա են բոլոր փաստական իրավական հիմքերը պարետի կողմից ընդունված բոլոր նորմատիվ իրավական ակտերն առոչինչ ճանաչելու համար: Այդ ակտերն առոչինչ ճանաչելուց հետո բոլոր քաղաքացիները, որոնք տուգանվել են, ունեն լեգալ իրավունք և հնարավորություն վիճարկելու իրենց վերաբերյալ արձանագրված տուգանքները, իսկ որոնք արդեն վճարված են, ունեն լեգալ իրավունք դրանց վերադարձը պահանջելու համար»,-եզրափակեց Արթուր Ղազինյանը: