Շարմազանովն աբսուրդ է համարում հանրաքվեն կեղծելու վերաբերյալ Զուրաբյանի հայտարարությունը

 Ազգային ժողովի փոխնախագահ Էդուարդ Շարմազանովն անդրադարձել է ՀԱԿ խմբակցության ղեկավար Լևոն Զուրաբյանի հայտարարությանը, թե սահմանադրական բարեփոխումների հանրաքվեին 500 հազար ձայն կեղծվել է: Ազգային ժողովում լրագրողների հետ զրույցում ԱԺ փոխնախագահը նշեց, որ աբսուրդ է համարում նման հայտարարությունը: «Երեկ հայտնի հռետորը ուղիղ եթեր էր մտել, գիշերը լրագրողներին քնից հանել ասուլիսի էր կանչել, մենք էլ մտածում էինք, թե ինչ-որ կարևոր բան է եղել, իսկ նա կանգնում ասում է՝ 500 հազար ձայն կեղծվել է: Եթե ինքը չապացուցի իր ասածը, ուրեմն ինքը քաղաքականության մեջ ստախոսի պիտակ ունի»,- նշեց ԱԺ փոխնախագահը:

Նրա խոսքով՝ չի կարելի ամեն ինչ անլրջացնել, խաղալ մարդկանց կարծիքի հետ: «Մենք չենք ասում չէ՞, որ այդքան «ոչ» կեղծվել է: Ուղղակի աբսուրդ է նման բան հայտարարելը: Ես հասկանում եմ, որ իրենք ցայտնոտի մեջ են, որովհետև ասում էին, որ դեկտեմբերի 6-ին ոչ մի քաղաքացի «այո» չի ասելու, սակայն 825 հազար քաղաքացի ասել է «այո», իսկ իրենք հիմա հայտարարում են, թե 500 հազար ձայն կեղծվել է: Դա աբսուրդի և կրկեսի ժանրից է»,- եզրափակեց ԱԺ փոխնախագահը:

Հանրաքվեի արդյունքների նախնական տվյալներով` քվեարկությանը մասնակցել է 1 միլիոն 303 հազար 466 քաղաքացի: Անվավեր է ճանաչվել 53 հազար 332 քվեաթերթիկ, «այո» է քվեարկել 825 հազար 851 մարդ, «ոչ»` 421 հազար 600: