Ինչպես և ՀՀ բուհերի մեծամասնությունում, այնպես էլ ՇՊՀ-ում գործել և շարունակում է գործել ուսանողական խորհուրդը, որը չի ունեցել և առայժմ էլ չունի ԿԳՄՍՆ-ի կողմից հաստատված կանոնադրություն․ ՇՊՀ ռեկտորի պաշտոնակատարի հայտարարությունը

ՀՀ ԱԺ պատգամավոր Նազելի Բաղդասարյանի  սեպտեմբերի 15-ին  ԱԺ-ում հնչեցրած հայտարարությանն  ի պատասխան ֆեյսբուքյան իր էջում հայտարարությամբ է հանդես եկել նաևՇիրակի պետական համալսարանի ռեկտորի պաշտոնակատար Երվանդ Սերոբյանը,  որտեղ մասնավորապես ասվում է․  

 

Խոսքս ուղղում եմ Շիրակի պետական համալսարանի ներքին և արտաքին բոլոր շահառուներին, համալսարանի ներկայով և ապագայով մտահոգ բոլոր անձանց։

Միշտ և բոլոր հասարակություններում ուսանողները եղել են հանրության առավել առաջադեմ, ազատ մտածող մասը։ Վստահ եմ, որ այդպիսին է նաև ներկայիս Հայաստանի ուսանողությունը։ Իմ համոզմունքն ու սկզբունքային մոտեցումն է, որ համալսարանական միջավայրում անհանդուրժելի է որևէ ուսանողի կամ ուսանողական որևէ խմբի շահերի և իրավունքների ոտնահարումը և ազատ կամարտահայտման սահմանափակումը ցանկացած անձի, անձանց խմբի կամ կառույցի կողմից։

Ինչպես և ՀՀ բուհերից շատերում, այնպես էլ ՇՊՀ-ում ընթանում են ուսանողական ինքնավար կառույցների և ուսանողական կյանքի փոփոխություններ, որոնց մասնակցում են ուսանողների առավել ակտիվ ներկայացուցիչները՝ ձգտելով այդ փոփոխություններին մասնակից դարձնել նաև իրենց մյուս ընկերներին։ Նման գործընթացներից զերծ չէ նաև ՇՊՀ ուսանողությունը։

Ինչպես և ՀՀ բուհերի մեծամասնությունում, այնպես էլ ՇՊՀ-ում գործել և շարունակում է գործել ուսանողական խորհուրդը, որը չի ունեցել և առայժմ էլ չունի ԿԳՄՍՆ-ի կողմից հաստատված կանոնադրություն։ Այսօր ՇՊՀ ուսանողների մի խումբ էլ նախաձեռնել է նոր ուսանողական շարժման՝ Ուսանողական խորհրդարանի ձևավորման գործընթացը։ Այսինքն՝ ուսանողության շրջանում ձևավորվում են ինքնակառավարվող և ինքնավար խմբեր, որոնք ձգտում են ինքնադրսևորման և որդեգրում են ուսանողական կյանքի, ինքնավարության, իրենց գործունեության ոլորտներին առնչվող տարբեր մոտեցումներ, գործունեության տարբեր սկզբունքներ և մեթոդներ՝ ունենալով համալսարանի զարգացման տարբեր տեսլականներ։ Այս ամենը միայն ողջունելի է, հատկապես, երբ այդ խմբերի միջև ձևավորվում են փոխհամագործակցության և առողջ մրցակցության սկզբունքներ՝ ի շահ բոլոր ուսանողների։ Կարծում եմ՝ բնական է նաև ուսանողական խմբերի միջև կարծիքների, սկզբունքների, ինչու չէ՝ նաև շահերի բախումների առկայությունը։ Նման դրսևորումներ նկատվում են նաև ՇՊՀ ուսանողական փոփոխվող կյանքում։

Տեղյակ լինելով ՇՊՀ ուսանողական կյանքում ընթացող գործընթացներին և հարգելով ուսանողական կառույցների ինքնավարության սկզբունքը՝ անձամբ զերծ եմ մնացել ուսանողական կառույցների գործունեությանը միջամտելուց՝ նույնը պահանջելով իմ բոլոր գործընկերներից։ Ուսանողական տարբեր խմբերի հետ հանդիպումների ընթացքում նրանց հորդորել եմ մնալ օրինականության դաշտում, խորհուրդ եմ տվել միմյանց հետ առնչվելիս մնալ բարեվարքության և փոխադարձ հարգանքի տիրույթում, բանավեճերում՝ քաղաքակիրթ և կառուցողական երկխոսության շրջանակներում։ Երբ նկատել եմ, որ նրանց հարաբերություններում ի հայտ են գալիս սուր եզրեր, երկուստեք կոչ եմ արել գնալ միմյանց ընդառաջ, առաջնորդվել փոխզիջումների սկզբունքով, զերծ մնալ փոխադարձ մեղադրանքներից և միմյանց կարգավիճակի ու գործունեության նկատմամբ չհիմնավորված գնահատականներ հնչեցնելուց։

Ցանկանում եմ անդրադառնալ ևս մեկ շատ կարևոր և ինձ համար սկզբունքային հարցի՝ քաղաքական գործընթացները համալսարանական միջավայր տեղափոխելուն։

Միշտ եղել եմ, և այժմ էլ մնում եմ այն կարծիքին, որ յուրաքանչյուր անձ ազատ է իր քաղաքացիական դիրքորոշումն ու քաղաքական հայացքներն արտահայտելու մեջ, և երբե՛ք և ո՛չ ոք իրավունք չունի նրանց հետապնդելու այդ դիրքորոշման և/կամ հայացքների համար։ Մյուս կողմից՝ իր գործունեությունն համալսարանական միջավայրում ծավալող ոչ մի անձ այդ միջավայրում իրավունք չունի իրականացնելու քաղաքական գործունեություն և քարոզչություն, իր քաղաքական հայացքներն այլոց պարտադրելու, այլակարծությունը հետապնդելու և ճնշելու՝ անկախ համալսարանում և հասարակության մեջ զբաղեցրած դիրքից և պաշտոնից։

Նշեմ նաև, որ միշտ եղել եմ և այժմ էլ մնում եմ բաց՝ համալսարանին առնչվող ցանկացած հարց քննարկելու ՇՊՀ խնդիրներով մտահոգ յուրաքանչյուրի հետ։

Եղեք առողջ և խաղաղ։

Երվանդ Սերոբյան