ՍԴ-ն վերջին երկու տարիների ընթացքում եղել է բարդագույն իրավիճակներում. Արեւիկ Պետրոսյան

ՍԴ նախագահ Հրայր Թովմասյանն իր պաշտոնավարման 2 տարիների ընթացքում իր գործունեությունն իրականացրել է այնպես, որ ՍԴ բնականոն գործունեության առումով որևէ խնդիր չի եղել: Այս մասին, այսօր՝ սեպտեմբերի 23-ին, ՍԴ-ի դիմաց լրագրողների հետ զրույցում հայտարարել է ՍԴ դատավոր Արևիկ Պետրոսյանը. «Ստեղծվել են նորմալ մարդկային, աշխատանքային հարաբերություններ: ՍԴ-ն վերջին երկու տարիների ընթացքում եղել է բարդագույն իրավիճակներում: Այդ ընթացքում մենք մեր մասնագիտական առաքելությունը, սահմանադրական առաքելությունն ու արդարությունն իրականացրել ենք Հրայր Թովմասյանի՝ որպես ՍԴ նախագահի պաշտոնավարման ժամանակահատվածում»:

 

«Օգտվելով առիթից՝ ուզում եմ շնորհակալություն հայտնել պարոն Թովմասյանին 2 տարիների ընթացքում ՍԴ նախագահի պարտականությունները, լիազորությունները բարձր մակարդակով իրականացնելու համար: Ուզում եմ շնորհակալություն հայնել իմ 3 գործընկերներին, որոնց լիազորությունները Սահմանադրական փոփոխությունների արդյունքում դադարեցվել են լիազորությունների ժամկետն ավարտված լինելու հիմքով: Նրանք պատշաճ մակարդակով իրականցրել են իրենց սահմանդարական առաքելությունը, սահմանդրական արդարադատություն: Իրենք հիմա զբաղվում են իրենց խախտված սահմանադրական իրավունքների վերականգնմամբ, տեսնենք իրադարձություններն ինչպես կզարգանան»,-ասաց նա:

 

Պետրոսյանը նշեց, որ մինչև հունիսի 26-ը, Սահմանադրական դատարանը բնականոն աշխատանքի հետ կապված որևէ խնդիր չի ունեցել:

 

Հիշեցնենք, որ Սահմանադրական դատարանի դատավորներն այսօր՝ սեպտեմբերի 23-ին իրենց աշխատակարգային նիստում ՍԴ նախագահ եւ փոխնախագահ պետք է ընտրեն:

 

«Սահմանադրական դատարանի մասին» ՀՀ օրենքի հոդված 19-ի համաձայն, Սահմանադրական դատարանի կազմից նախագահ կարող է ընտրվել այն թեկնածուն, որը ստացել է դատավորների ընդհանուր թվի ձայների (9) երկու երրորդը, իսկ այն դեպքում, երբ առաջադրվել է մեկ թեկնածու, ապա ընտրվում է դատավորների ընդհանուր թվի ձայների մեծամասնությամբ: Այսինքն ՍԴ նախագահն ընտրվելու է կամ 5 կամ 6 ձայներով:

 

Մինչեւ վերջին պահը ինտրիգը պահպանվում է, թե ով է լինելու ՍԴ նախագահ: Ըստ մամուլի տեղեկությունների Երվանդ Խունդկարյանը ՍԴ է եկել նախագահ դառնալու ակնկալիքով, սակայն նրա թեկնածությունը միանշանակ չի ընկալվում: Հնարավոր է թեկնածու առաջադրվի նաեւ Արման Դիլանյանը, իսկ այդ դեպքում շատ հավանական է, որ թեկնածուներից  ոչ մեկը չստանա 6 ձայն: Նման սցենարի դեպքում տեղի կունենա երկրորդ փուլ, որտեղ թեկնածուներից քիչ ձայն ստացածը դուրս կգա մրցակցությունից, մնացողն արդեն կընտրվի 5 ձայնով։ Իսկ եթե երկրորդ փուլում էլ չհաջողվի նախագահ ընտրել, ապա, ըստ օրենքի, 10 օր անց նոր ընտրություն կկայանա։