Ֆրանսիայի Մարտիգ քաղաքում բացվել է Ցեղասպանության 100-րդ տարելիցին նվիրված խաչքար

Ֆրանսիայի Մարտիգի քաղաքապետարանի, հայ համայնքի միասնական ջանքերով, ինչպես նաև Մարսելում ՀՀ Գլխավոր հյուպատոսության աջակցությամբ, Մարտիգ քաղաքի Լապիդեր հրապարակում դեկտեմբերի 5-ին տեղի է ունեցել Հայոց ցեղասպանության զոհերի հիշատակը հավերժացնող խաչքարի բացումը, որին հաջորդել է օրհնության ու օծման արարողությունը՝ Հայ առաքելական եկեղեցու քահանայի ձեռամբ։

Ինչպես  տեղեկացրին ՀՀ արտաքին գործերի նախարարության մամուլի, տեղեկատվության եւ հասարակայնության հետ կապի վարչությունից, միջոցառմանը ներկա են եղել Մարտիգի պատգամավոր-քաղաքապետ Գաբի Շարուն, Մարսելում ՀՀ հյուպատոս Սամվել Լալայանը, Մարտիգի տարածքի պատվավոր նախագահ Հենրի Կամբեսեդեսը, Բուշ-դյու-Ռոն դեպարտամենտի խորհրդական Ժերար Ֆրոն, Մարտիգի հայկական կազմակերպության նախագահ Պասկալ Եզգիլյանը, փոխքաղաքապետեր, տեղական ինքնակառավարման մարմինների ներկայացուցիչներ, ֆրանսիական և հայկական բազմաթիվ կազմակերպությունների ներկայացուցիչներ, լրագրողներ, հայ համայնքի ներկայացուցիչներ:

Մարտիգի պատգամավոր-քաղաքապետ Գաբի Շարուն իր խոսքում ասել է, որ խաչքարի բացման նպատակը Հայոց ցեղասպանության անմեղ զոհերի հիշատակը վառ պահելն ու գալիք սերունդներին իրազեկելն է 1915 թվականին հայերի հանդեպ տեղի ունեցած Ցեղասպանության մասին: Նա նշել է նաև, որ ժխտողականությունը դատապարտելի է, Հայոց ցեղասպանությունը դա անժխտելի փաստ է, որի վառ ապացույցն են ֆրանսիահայությունը և Մարտիգի պատվավոր քաղաքացի 100-ամյա Իվ-Տիգրան Արթինյանը, ով մասնակցում է այսօրվա միջոցառմանը:

Մարսելում ՀՀ հյուպատոս Սամվել Լալայանն իր ելույթում շնորհակալություն է հայտնել քաղաքապետին խաչքարի տեղադրման առիթով: Այնուհետև նա անդրադարձել է հայ-ֆրանսիական բարեկամական հարաբերություններին և հայ համայնքի ու Մարտիգի տեղական իշխանությունների արդյունավետ ու բազմածավալ աշխատանքներին, որի արդյունքը այսօրվա Հայոց ցեղասպանության 100-րդ տարելիցին նվիրված խաչքարի բացումն է:

Խաչքարի բացման արարողությանը հաջորդել է Մարտիգի քաղաքապետարանում ցուցադրվող Հայոց ցեղասպանությանը նվիրված «Բուշ-դյու-Ռոնի հայերի հիշողությունը» խորագիրը կրող ցուցահանդեսի բացումը: Վերջում ցուցադրվել է Նիկոլա Բալիքի «Հայերը Մարտիգում» փաստավավերագրական ֆիլմը:

Միջոցառումը լայնորեն լուսաբանվել է տեղական լրատվամիջոցների կողմից։