Զոհված զինծառայող Էրիկ Ջիլավյանի հայրը վաղուց մահացել է, մայրն էլ ՌԴ֊ից չի կարող գալ որդու hուղարկավորությանը. համայնքի ղեկավարի տեղակալ

2001 թվականին ծնված Ջիլավյան Էրիկը Լոռու մարզի Արջուտ համայնքից էր, 8 ամսվա ծառայող էր, Ռուսաստանից եկել էր, որ գնար ծառայության: Այս մասին Tert.am-ի հետ զրույցում ասաց Արջուտ համայնքի ղեկավարի տեղակալ Սայադ Մնացականյանը:

«Դպրոցը ավարտել է՝ Ռուսաստան գնացել, մայրը, քույրը և եղբայրը այնտեղ են և երեխու հուղարկավորությանը չեն կարողանում գալ, հայրն էլ մահացել է վթարից՝ շատ երիտասարդ»,-ասաց նա:

Սայադ Մնացականյանը նշեց, որ զոհվածը իր հարևանն էր: «Իմ դուռ դռան երեխեն է եղել, շատ լավ երեխա, շատ ընտիր երեխա էր»,-ասաց նա:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։ Արցախի զինուժը խոցել է հակառակորդի 10 ուղղաթիռ, 90 անօդաչու թռչող սարք, 184 միավոր զրահատեխնիկա, հիմնականում տանկեր, մեկ ինքնաթիռ, 82 ավտոտրանսպորտ, 10 զրահափոխադրիչ, մեկ «ՏՕՍ-1Ա» ծանր հրանետային համակարգ, 2 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 1280 զոհ, որից 180–ը Քարվաճառի ուղղությամբ, ավելի քան 2700 վիրավոր։ Հայկական կողմից, նախնական տվյալներով, կա 103 զոհ և մոտ 200 վիրավոր, որոնցից մոտ 120–ն են շարունակում բուժում ստանալ, մյուսներն ապաքինվել և վերադարձել են շարք։

Ադրբեջանի Զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի արդյունքում Վարդենիսի շրջանում սպանվել է 1 քաղաքացիական անձ, Արցախում՝ 7 մարդ։

Հայաստանում և Արցախում սեպտեմբերի 27-ին հայտարարվել է ռազմական դրություն։