Ադրբեջանական «Գյունեշլի» նավթահորում հրդեհը չի հաջողվում մարել

 Կասպից ծովի ադրբեջանական հատվածում «Գյունեշլի» նավթահորում 4 օր առաջ սկսված հրդեհը դեռեւս չի հաջողվում մարել: Հրդեհի պատճառով անհետ կորած մարդկանց որոնումները եւս արդյունք չեն տվել. մինչ այժմ հայտնաբերվել են միայն 6 նավթագործների մարմինները:

Այս մասին,  հայտնում է «Ազադլըգ» թերթը` նշելով, որ այսօրվանից նավերով որոնումներին միացել են նաեւ ուղղաթիռներ:

Նշվում է, որ ամբողջ գիշեր հանքահորում շարունակվել է հրդեհի մարման աշխատանքները, սակայն այն մարել չի հաջողվում, ավելին` հրդեհը թափանցել է հանքահորի բոլոր հորատանցքերը:

Ադրբեջանի պետական նավթային ընկերության ` SOCAR-ի «Գյունեշլի» հանքահորի թիվ 10 նավթային հարթակում հրդեհը ծագել էր դեկտեմբերի 4-ին մոտ ժամը 17:40-ին՝ գազի արտահոսքի պատճառով: Միջադեպի ժամանակ պաշտոնական տվյալներով հարթակում 63 նավթագործներ են եղել, ոչ պաշտոնական տվյալներով` 84 մարդ:

Հրդեհի արդյունքում 2 մարդ զոհվել 29 մարդ էլ անհետ կորել է, որոնցից մինչ այժմ հայտնաբերվել են միայն 6-ի մարմինները:

Վթարից հետո առաջին հայտարարության մեջ SOCAR-ի նախագահ Ռովնագ Աբդուլլաեւը վստահեցրել էր, որ ոչ ոք չի զոհվել եւ հարթակի վրա եղած բոլոր մարդիկ փրկվել են:

Մասնագետների կարծիքով` ադրբեջանական նավթային հարթակներում հրդեհներն ու վթարները տեղի են ունենում մարդկային գործոնի` ղեկավարության մեղքով: Նրանք բազմիցս նշել են, որ այդ վթարները ղեկավարության կողմից լրացուցիչ եկամուտ ստանալու, կապիտալ վերանորոգումները հետաձգելու հետեւանք են: