Իտալիայի իշխանությունները մտադիր են ընդունել նոր սահմանափակումներ կորոնավիրուսով վարակվածների թվի աճի պատճառով

Իտալիայի կառավարությունն, ըստ ամենայնի, հաջորդ շաբաթ կընդունի նոր սահմանափակումներ երկրում՝ փորձելով հաղթահարել կորոնավիրուսով վարակման աճող դեպքերը, հայտարարել է երկրի առողջապահության նախարար Ռոբերտո Սպերանցան, հաղորդում է Reuters-ը:

Կառավարությունը պետք է անցկացնի հանդիպում երեքշաբթի որոշելու, թե ինչպես արձագանքել վարակակիրների թվի աճին: Ընդ որում՝ Իտալիայի հարավային շրջանները, կարծես, առաջինն են դարձել խոցելի կորոնավիրուսի տարածման տեսանկյունից:

«Պայքարը չի ավարտվել: Մենք չենք հետեւում թվերին, որոնք կան այլ եվրոպական երկրներում…սակայն մենք որոշակի աճի փուլում ենք, եւ ես հուսով եմ, որ երկիրն իր մեջ միավորվելու ուժ կգտնի»,-ասել է Սպերանցան RAI հեռուստաալիքի եթերում:

Դիտարկվող միջոցառումներից է պարտադիր դիմակներ կրելը հասարակական վայրերում ամբողջ երկրում եւ զանգվածային հավաքների արգելքը:

Ներկայում դիմակներ կրելը պարտադիր է միայն Իտալիայի 20-ից 5 շրջաններում՝ հիմնականում հարավում:

Շաբաթ Իտալիայում գրանցվել է կորոնավիրուսով վարակման 2 844 դեպք: Դա ամենաբարձր ցուցանիշն է ապրիլից առ այսօր, երբ երկրում հայտարարվել էր համազգային մեկուսացում: Երկրի իշխանությունները մտահոգված են հարավում վարակման թվի աճի կապակցությամբ, որտեղ Կապմանիա շրջանում գրանցվել է վարակման 400 նոր դեպք:

Ընդ որում՝ հակահամաճարակաբանական միջոցների պահպանումն ապահովելու համար երկրի ՆԳՆ-ն առաջարկել է մտցնել զորքեր ոստիկանության հետ մեկտեղ որոշ էպիկենտրոններում: