Պատերազմի ավարտից եւ մեր հաղթանակից հետո ունենալու ենք լրիվ ուրիշ իրավիճակ. Արման Եղոյան

ԵՄ դեսպանին բոլոր մանրամասներով ներկայացրել ենք իրավիճակը. մեր գլխավոր ուղերձն այն է եղել, որ Թուրքիայի գործողությունները պետք է աներկբայորեն դատապարտվեն, որ չի կարելի հավասարության նշան դնել կողմերի միջեւ, եւ կոչ անել երկու կողմերին: Այս մասին այսօր՝ հոկտեմբերի 6-ին, ՀՀ-ում ԵՄ դեսպանի եւ ՀՀ ԱԺ պատգամավորների՝ ԱԺ-ում կայացած հանդիպումից հետո լրագրողների հետ զրույցում ասաց «Իմ քայլը» խմբակցության պատգամավոր Արման Եղոյանը:

«Առնվազն պետք է երեք կողմերին կոչ անել, իսկ կոչ անելուց հետո էլ շատ հստակ պետք է դատապարտվեն մեղավորները»,-ասաց նա:

Եղոյանը առաջարկեց տարանջատել ԵՄ ինստիտուտներն ու ԵՄ առանձին երկրների վեաբերմունքը. «Դուք տեսնում եք Ֆրանսիայի արձագանքը, ընդհուպ նախագահի մակարդակով, որը մեղադրեց Թուրքիային ջիհադիստներ բերելու մեջ: Սա շատ մեծ քայլ է»:

Հարցին, թե արդյոք ԵՄ-ում չեմ մտածում Ադրբեջանին ու Թուրքիային հայտարարել տեռորիստական պետություններ, Եղոյանն արձագանքեց. «Դա կախված կլինի իրադարձությունների հետագա զարգացումներից: Նման որոշումները մեկ շաբաթում չենկայացվում: Եթե Թուրքիան չդադարեցնի այս գործողությունները, դա կլինի հավելյալ տեղեկություն, դա պետք է հավելյալ քննվի եւ կայացվի դրա վերաբերյալ որոշում: Որոշ ԵՄ երկրներ արդեն հայտարարել են, որ հրաժարվում են զենքի վաճառքից: Նաեւ Կանադան խորհրդարանականների մակարդակով դատապարտեց Ադրբեջանի եւ Թուրքիայի գործողությունները: ԱԳ նախարարը դիվանագիտական լեզվով ասաց նույնը, իսկ վարչապետ Թրյուդոն շատ ավելի բաց տեքստով ասաց, որ պետք է քննվի, թե արդյոք կանադական տեխնոլոգիաները, որոնք նախատեսված չէին Հայաստանի դեմ կիրառվելու համար, կիրառվել են թե ոչ: Դրա համար առանձին հետաքննություն է արվում»:

Անդրադառնալով Արցախի հնարավոր ճանաչմանը, Արման Եղոյանն ասաց. «Մենք հիմա գտնվում ենք ռազմական գործողությունների ակտիվ փուլում: Պատերազմի ավարտից եւ մեր հաղթանակից հետո ունենալու ենք լրիվ այլ իրավիճակ: Մի բան ակնհայտ է, որ այսօր եվրոպական երկրները եւ ամբողջ աշխարհը գիտակցում է, որ սա այլեւս տարածքային վեճ չէ, սա վերաճել է Թուրքիայի ագրեսիվ քաղաքականության մի ճակատի: Թուրքիան այդ գործողությունները վարում է բոլոր ճակատներով: Դա ակնհայտ է, բոլորը դա գիտեն եւ այսօր խնդիրն այն է, թե ինչպես կանգնեցնել Թուրքիային:

Այսօր մենք գործ ունենք ոչ թե Ադրբեջանի հետ, Ադրբեջանի հարցերը լուծված են եւ այդ հարցերը, զարմանալիորեն լուծել է Թուրքիան: Ըստ էության, Ադրբեջանն այսօր չունի այն սուվերենությունը, որ ուներ 10 օր առաջ: Հիմա մենք գործ ունենք Թուրքիայի եւ իր կողմից ֆինանսավորվող վարձկան ահաբեկիչների հետ: Իսկ սա գլոբալ խնդիր է, որը լուծվում է ավելի երկար ժամանակում եւ ավելի դիվերսիֆիկացված գործիքներով»:

Դիտարկմանը, թե հայկական կողմը նշում է, որ դիվանագիտական առումով ունենք հաջողություններ, արդյո՞ք դրանք բավարար են՝ սահմանին այժմ տիրող իրավիճակը կանգնեցնելու համար, Եղոյանն արձագանքեց՝ ժամը 15:00-ի դրությամբ հարաբերական անդորր է: «Ինչո՞ւ չեք կարծում, որ սա նաեւ այս հայտարարությունների հետեւանքն է, դիվանագիտական խողովակներով աշխատանքի հետեւանքն է: Ակնհայտ է, որ ամբողջ աշխարհը հստակորեն դատապարտում է Թուրքիայի եւ ջիհադիստների ներգրավումն այս կոնֆլիկտում»,-ասաց պատգամավորը՝ նշելով, թե իրավիճակը դիվանագիտական առումով ամբողջությամբ մեր կողմից է: