Նման «ճոխություն» չպետք է մեզ թույլ տանք․«Փաստ»

«Փաստ» օրաթերթը գրում է

 Հայ ժողովուրդը պայքարում է ադրբեջանաթուրքական հրոսակների հանցագործ ագրեսիայի դեմ: Արցախ աշխարհին պարտադրված հերթական պատերազմի առաջին իսկ օրերից քաղաքական բոլոր ուժերը առանձին-առանձին, թե միասին հայտարարեցին ներքաղաքական օրակարգը «սառեցնելու», միասնականության անհրաժեշտության և մեկ բռունցք դարձած` թշնամու ագրեսիան կանգնեցնելու կարևորության մասին: Ավելին, քաղաքական ուժերը, անկախ իրենց հայացքներից, գաղափարախոսությունից, օրվա իշխանության հանդեպ վերաբերմունքից, իրենց հնարավորության սահմաններում մասնակիցն են դարձել համընդհանուր այս կռվի՝ մարտի դաշտ գնալով, նյութապես, թե արտաքին կապերն օգտագործելով:

Սակայն ցավալի է տեսնել, որ այս օրերին որոշ անհատներ (թե որ շրջանակներից, այդ մասին՝ հետո, հաղթելուց հետո) շարունակում են «բզբզալ», թիրախավորել, անձնավորել, սև ու սպիտակի բաժանել: Ստեղնաշարի առջև քաջարի ստատուսներով ոմանք որոշում են՝ ով իրավունք ունի հանուն երկրի որևէ քայլ անել, Արցախ մեկնել, ինչ-որ հանդիպումներ ունենալ, և ով այդ իրավունքը չունի:

Ընդ որում, խոսքը միայն քաղաքական դաշտի մասին չէ, նման վերաբերմունք երբեմն նկատելի է մարդկանց հասցեին, որոնք մշտապես երկրի, պետության ու ժողովրդի կողքին են եղել, ահռելի ավանդ ունեն՝ ի տարբերություն ամեն ինչ մերժելու, բոլորին սովորեցնելու, բոլորից պահանջելու մոլուցքով տառապող ոմանց: Սա չափազանց մեծ «ճոխություն» է այս վիճակում: Հանուն երկրի, հանուն պետության յուրաքանչյուր ոք պետք է իր լուման ներդնի, յուրաքանչյուր ոք ունի թե՛ այդ պարտականությունը, թե՛ իրավունքը: Իսկ մնացածի մասին՝ հետո: Հաղթելու ենք:

Մանրամասները՝ «Փաստ» օրաթերթի այսօրվա համարում