Հայ­րենի­քին աջակ­ցե­լու սփյուռ­քա­հա­յու­թյան ջան­քե­րի կա­րև­ո­րու­թյու­նը.«Փաստ»

«Փաստ» օրաթերթը գրում է

Արցախյան հակամարտության հարցը կենսական առաջնահերթություն ունի համայն հայության համար։ Եվ հատկապես պատերազմական իրավիճակում հատուկ կարևորություն է ստանում աշխարհի տարբեր երկրներում հայկական համայնքների դերն ու նշանակությունը։ Հայաստանը փոքր երկիր է՝ քիչ ռեսուրսներով, սակայն մենք ունենք մի շատ առանցքային ռեսուրս, որը շատ մեծ հնարավորություններ ունի և չպետք է թերագնահատել։ Դա հայկական սփյուռքն է։ Եվ պատահական չէ, որ Արցախի նկատմամբ ադրբեջանաթուրքական ագրեսիան կասեցնելու գործում մեր երկրի ջանքերին գումարվում է նաև սփյուռքի դերակատարությունը։

Ուստի երկրում ներքին համախմբվածություն ապահովելու հետ մեկտեղ անհրաժեշտություն է առաջանում հայրենիքին սատար կանգնելու օրակարգի շուրջ համախմբել նաև սփյուռքահայ համայնքներին։ Եվ այս իրողությունը ենթադրում է հետևողական աշխատանք հայրենիք-սփյուռք կապի ամրապնդման ուղղությամբ։ Հայկական համայնքներն աշխարհում մեծ աշխարհագրական տեղաբաշխվածություն ունեն՝ Լատինական Ամերիկայի երկրներից սկսած, արաբական երկրներով վերջացրած։ Ուստի Արցախյան հակամարտության խնդրի իրական բովանդակության մասին տարբեր երկրների հանրություններին իրազեկելու հարցում սփյուռքահայությունը լուրջ աշխատանք կարող է կատարել։

Գաղտնիք չէ, որ Թուրքիան և Ադրբեջանը մեծ ֆինանսական ռեսուրսներ են ծախսում, որպեսզի դրսում լոբբինգ անեն իրենց տեսակետը և միակողմանի ներկայացնեն իրադարձությունները։ Սփյուռքահայության ջանքերի արդյունքում օտար երկրների հանրությունները տեղեկանում են ռեալ իրողությունների մասին, թե ինչ է իրականում տեղի ունեցել և տեղի ունենում Արցախում, ինչի դեպքում Թուրքիայի և Ադրբեջանի խեղաթյուրված քարոզչական կամպանիան կորցնում է իր արդյունավետությունը։ Այս տեսանկյունից հատկապես ուշադրության է արժանի այն իրողությունը, որ Եվրոպայի տարբեր երկրներում և ԱՄՆ-ում հայկական համայնքների ներկայացուցիչները այս օրերին իրենց բողոքն արտահայտում են կարևոր հանգուցային ճանապարհները փակելու միջոցով։

Դրա արդյունքում նրանց ակցիաները մեծ արձագանք են գտնում տեղի հանրության շրջանում և լուսաբանվում բազմաթիվ լրատվականներով։ Սփյուռքահայությունը անգնահատելի ծառայություն կարող է մատուցել նաև տեղական կառավարման մարմինների և կառավարությունների վրա ազդելու հարցում։ Հիմնականում դրա արդյունքում է, որ տարբեր երկրների քաղաքներ ու նահանգներ սկսել են մեկը մյուսի հետևից ճանաչել Արցախի անկախությունը, իսկ խորհրդարաններում էլ պրոհայկական բանաձևեր են ներկայացվում քննարկման։

Հատկապես պետք է ուշադրություն դարձնել այն հանգամանքի վրա, որ ԵԱՀԿ Մինսկի խմբի համանախագահ երկրներում՝ Ֆրանսիայում, ԱՄՆ-ում և Ռուսաստանում ստվար հայկական համայնքներ կան, որոնք, տեղում ձևավորելով հանրային կարծիք, կարող են ազդեցություն գործել իրենց կառավարությունների վրա հակամարտության արդարացի լուծումներ գտնելու հարցում։ Գաղտնիք չէ, որ Թուրքիան և Ադրբեջանը մտադիր են արտերկրում բախումներ հրահրել տեղի ադրբեջանական ու թուրքական համայնքների, իսկ մյուս կողմից՝ հայերի միջև։

Այդպիսի դեպքերի ականատես եղանք Հուլիսյան մարտերից հետո Ռուսաստանում և արևմտյան մի շարք երկրներում, իսկ վերջերս էլ նաև Իսրայելում, երբ ադրբեջանցիները հարձակվեցին խաղաղ ակցիա իրականացնող հայերի վրա։ Եվ, ըստ այդմ, շատ կարևոր է, որ սփյուռքի հայությունը չտրվի թուրք-ադրբեջանական տանդեմի սադրանքներին ու աշխարհին ցույց տա Թուրքիայի և Ադրբեջանի պանթուրքական և նեոօսմանական գործելակերպի ողջ նենգությունը։

Էական է նաև սփյուռքահայության ֆինանսական և նյութատեխնիկական աջակցության նշանակությունը Արցախի ու Հայաստանի համար։ Անգամ թուրքական և ադրբեջանական լրատվամիջոցներում տեղ են գտնում հրապարակումներ, որոնցում լուրջ մտահոգություններ կան կապված նրա հետ, որ սփյուռքը և սփյուռքահայ շատ հայտնի անհատներ մեծ աջակցություն են տրամադրում Հայաստանին։ Եվ մի բան ևս ակնհայտ է, որ հաղթանակի կարելի է հասնել միայն Հայաստան-ԱրցախՍփյուռք համախմբվածության և փոխգործակցության միջոցով։ Անհրաժեշտ է հենց այս պահին հիմքեր ստեղծել, որ միասնականությունը լինի մշտական երևույթ և ոչ միայն կապված լինի դժվարին պահերի հետ, երբ հայրենիքին վտանգ է սպառնում։

Մանրամասները՝ «Փաստ» օրաթերթի այսօրվա համարում