Երևանն ու Թեհրանը կստորագրեն համագործակցության վերաբերյալ համաձայնագիր

Երևանի և Թեհրանի միջև համագործակցության ընդլայնման հետ կապված հարցեր են քննարկվել Երևանի քաղաքապետի տեղակալ Արամ Սուքիասյանի և Թեհրանի քաղաքապետարանի պատվիրակության հանդիպման ժամանակ: Հանդիպմանը ներկա է եղել նաև ՀՀ-ում Իրանի Իսլամական Հանրապետության արտակարգ և լիազոր դեսպան Սեյեդ Քազեմ Սաջադին:

Ինչպես  տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, քաղաքապետ Տարոն Մարգարյանի անունից ողջունելով հյուրերին՝ Արամ Սուքիասյանն ընդգծել է երկու ժողովուրդների բարեկամությունն ու մշակութային ընդհանրությունները և այդ տեսանկյունից կարևորել Թեհրանի հետ տարբեր, մասնավորապես, կրթամշակութային ոլորտում ակտիվ համագործակցության ծավալումը: «Երևանի և իրանական խոշոր քաղաքների միջև տարիների ընթացքում ձևավորվել են արդեն իսկ հաջողված համագործակցությ ան օրինակներ: Առաջիկայում նախատեսված է նաև երկու մայրաքաղաքների միջև համագործակցության համաձայնագրի ստորագրում, որը, վստահ եմ, նոր հիմքեր կստեղծի երկկողմ հարաբերությունների խորացման, փոխգործակցության ամրապնդման, ինչպես նաև համատեղ ծրագրերի իրականացման համար»,-նշել է Արամ Սուքիասյանը:

Թեհրանի քաղաքապետարանի մշակույթի և արվեստի կազմակերպության նախագահ Մոհամմադ Սալահին, քաղաքապետ Տարոն Մարգարյանին փոխանցելով Թեհրանի քաղաքապետի ողջույնները, շնորհակալություն է հայտնել հանդիպման համար և իր հերթին ևս կարևորել Երևանի հետ համագործակցության ընդլայնումը: «Երևանն իսկապես շատ ջերմ ու հյուրընկալ քաղաք է և շատ իրանցիների համար այն երկրորդ տան նման է: Ուրախ եմ այցելության համար և համոզված եմ, որ այս հանդիպումը արդյունավետ կլինի համատեղ գաղափարների կյանքի կոչման ու բարեկամական հարաբերություններն առավել գործնական փուլ տ եղափոխելու համար»,-նկատել է Մոհամմադ Սալահին:

Արամ Սուքիասյանն ընդգծել է Թեհրանի հետ համագործակցության հարցում Երևանի քաղաքապետարանի պատրաստակամությունը: Հանդիպման շրջանակում կողմերը քննարկել են նաև Երևանի օրերը Թեհրանում և ԻԻՀ մայրաքաղաքի օրերը Երևանում անցկացնելու հետ կապված հարցեր: