Ֆրանսիան կրկնապատկում է սահմանային վերահսկողության ստորաբաժանումների թիվը

Ֆրանսիայի նախագահ Էմանուել Մակրոնը ահաբեկչական սպառնալիքի պատճառով որոշել է կրկնապատկել երկրի արտաքին սահմանների վերահսկողությունն իրականացնող ստորաբաժանումների քանակը: Այս մասին նա հայտարարել է հինգշաբթի Իսպանիայի հետ սահմանի Պերտուս անցակետ այցելության ժամանակ, հայտնում է ՏԱՍՍ-ը:

«Մենք որոշում ենք կայացրել ուժեղացնել վերահսկողությունը Շենգենյան գոտու սահմաններին: Ֆրանսիայում սահմանապահ ոստիկանության եւ մաքսային ծառայության աշխատակիցների թիվը 2400-ից 4800 կդառնա»,- ասել է Ֆրանսիայի նախագահը:

«Ես նաեւ անհրաժեշտ եմ համարում վերանայել Շենգենյան համակարգը եւ ավելի մեծ վերահսկողության հասնել սահմաններին»,- ասել է Մակրոնը: Նա հայտարարել է, որ այս հարցով առաջարկներ կներկայացնի դեկտեմբերին կայանալիք ԵՄ գագաթնաժողովում:

Մակրոնը հիշեցրել է, որ Ֆրանսիայում վերջին երեք ամսվա ընթացքում ձեռնարկված միջոցառումների շնորհիվ «32 ահաբեկչություն է կանխվել, ահաբեկչության դեմ պայքարն ակտիվացել է»: Այս պայքարը տարվում է տարբեր գերատեսչությունների կողմից` ՆԳՆ համակարգմամբ: Նախագահի խոսքով` գործողությունների ակտիվացումն արտահայտվել է նոր օրինագծի մշակմամբ, «որը նախարարների խորհրդին կներկայացվի դեկտեմբերի 9-ին»:

Եվրոպայում հոկտեմբերի վերջին մի շարք ահաբեկչություններ են տեղի ունեցել, երբ Նիսի Նոտր Դամ տաճարում դանակով զինված թունիսցին հարձակվեց հավատացյալների վրա: Այդ ժամանակ երեք մարդ մահացավ, նույն օրը ոստիկանությունը Ավինյոնում մի մարդու գնդակահարեց, ով դանակով սպառնում էր անցորդներին: Դրանից երկու շաբաթ առաջ Փարիզի արվարձանում արմատական ​​իսլամիստը սպանել էր դպրոցի ուսուցչին, ով ավելի վաղ իր աշակերտներին ցույց էր տվել Մուհամեդ մարգարեի ծաղրանկարները: Նոյեմբերի 2-ին մի քանի զինված ահաբեկիչ կրակ էր բացել Վիեննայում` սպանելով հինգ մարդու: Արդյո՞ք այդ հարձակումները միմյանց հետ կապ ունեն, դեռ հայտնի չէ: