Խոսնակի հայտարարությունը իրարանցում էր առաջացրել. «Հրապարակ»

«Հրապարակ» թերթը գրում է.

Երեկ Արցախի նախագահի խոսնակ Վահրամ Պողոսյանն իր էջում ցավալի լուր հայտնեց․ «Հանրապետության նախագահի այսօր արած գրառումը հանրային շրջանակներում անկումային որոշակի տրամադրություններ է առաջացրել: Դա բնական է․․․ ցավոք, պետք է խոստովանենք, որ անհաջողությունների շղթան դեռ մեզ ուղեկցում է, ու Շուշի քաղաքն ամբողջությամբ դուրս է մեր վերահսկողությունից, եւ այս մասին հուսադրող կամ ոգեւորող բոլոր տեսակի քարոզչական թեզերը, բացի իրականության զգացողությունը կորցնելուց, մեզ ոչինչ չեն տալիս: Գոտիները եւս մեկ անգամ ձգել է պետք, քանի որ թշնամին գտնվում է Ստեփանակերտի մատույցներում, եւ արդեն մայրաքաղաքի գոյությունն է վտանգված…

Եթե ուզում ենք, որ Շուշին նորից մերը լինի, Արցախը պահպանվի, այսօր պետք է գործադրենք բոլոր կարողությունները Ստեփանակերտի ու ռազմաճակատի մյուս ուղղություններում հուսալի պաշտպանություն կազմակերպելու համար: Հաղթանակի կեղծ կոչերն ու ֆեյսբուքյան շահարկումները հասցնելու են հատիկ առ հատիկ ամեն ինչի կորստի: Իսկ պատմությունը մեզ դա չի ներելու… Կռվում ենք մինչեւ վերջ»։ Իսկ խոսնակի հայտնած ինֆորմացիայից ընդամենը ժամեր առաջ Արծրուն Հովհաննիսյանը հայտարարել էր․ «Շուշիի մերձակայքում մարտերը շարունակվում են: ՊԲ ստորաբաժանումները հաջողությամբ կատարում են իրենց խնդիրները` հակառակորդին զրկելով նախաձեռնողականությունից: Այլ, չհիմնավորված կարծիքներն ուղղակի մերժեք»։ Հանրությունը սկսեց կասկածել, որ Արցախի նախագահի խոսնակի ֆեյսբուքյան էջը հաքերային հարձակման է ենթարկվել։ Մենք կապվեցինք Արայիկ Հարությունյանի խորհրդական Դավիթ Բաբայանի հետ․ «Վահրամ Պողոսյանի էջում գրվածը ճի՞շտ է, թե՞ էջը կոտրել են»։ Բաբայանը փոխանցեց․ «Ցավոք, ճիշտ է»։

Մանրամասները՝ թերթի այսօրվա համարում