Այո, մենք չենք կարողացել բանակի վրա դնել այնքան գումար, ինչքան մենք ցանկանում էինք դնել. Նիկոլ Փաշինյան

Բանակի զարգացման համար մենք վերջին 2,5 տարվա ընթացքում բազմաթիվ միջոցառումներ ենք իրականացրել, գուցե այս պատերազմի համատեքստում այդ միջոցառումներից ոչ բոլորն են բավարար չափով արդյունավետ եղել, գուցե կարելի էր ոչ թե  Ա միջոցառումն իրականացնել, այլ Բ միջոցառումը: Այս մասին այսօր՝ նոյեմբերի 10-ին, Facebook-ի իր էջում ուղիղ եթերում նշել է ՀՀ վարչապետ Նիկոլ Փաշինյանը:

«Այդ պարագայում գուցե ամեն ինչ ավելի արդյունավետ կլիներ: Բայց որ վերջին 2,5 տարվա ընթացքում բանակը եել է կառավարության ուշադրության կենտրոնում, դա փաստ է: Այո, մենք չենք կարողացել բանակի վրա դնել այնքան գումար, ինչքան մենք ցանկանում էինք դնել: Այստեղ ես էլի ուզում եմ հիշել, որ մի քանի անգամ խոսել եմ քաղաքացու հարկային գիտակցության մասին, ՀԴՄ-ների մասին, նույնիսկ ասել եմ, որ նրանք, որոնք ՀԴՄ չեն խփում կամ պահանջում, նրանք զինվորի հացն են գողանում: Այո, մենք չենք կարողացել կոռուպցիոն գործերով բավարար միջոցներ գեներացնել 1-1,5 մլրդ դոլար եւ դա ծառայեցնել բանակի նպատակներին: Բայց այդ պլանը եղել է եւ հիմա էլ գոյություն ունի: Այս իրավիճակում ինչ է մեզ մնում, մեզ մնում է կենտրոնանալ Հայաստանի եւ Արցախի տնտեսապես, ինտելեկտուալ, կրթական առումներով ուժեղացման վրա՝ արձնագրելով, որ այո, մենք ընկել ենք, բայց չենք ծնկել: Մենք կանգնել ենք տղամարդավարի մինչեւ վերջ, մինչեւ ամենավերջին խազը: մենք այդ ամենավերջին խազի վրա կայացրել ենք որոշում՝ նդունդը չգլորվելու համար: Դա եղել է ցավոտ, բայց անհրաժեշտ ու անխուսափելի որոշում»,-հայտարարեց նա:

Վարչապետը խոստովանեց, որ ինքն անձամբ է կրում պատասխանատվություն տեղի ունեցածի համար. «Ես անձամբ կրում եմ պատասխանատվություն այս ամենի համար, շարունակելու եմ կրել այդ պատասխանատվությունը: Կուզեի ընդգծել, որ այո, ես հավատում եմ, որ սա մեծ անհաջողություն է մեզ հմար, մեծ աղետ, մեծ սուգ է մեր կորսված կյանքերի համար, բայց ես հավատում եմ, որ Հայաստանը պետք է ապրի, Արցախը պետք է ապրի եւ մենք պետք է ուժեղանանք, հզորանանք, գուցե որոշակիորեն վերանայենք մեր նախկին ընկալումները ամենատարբեր հարցերի վերաբերյալ: Պետք է կարողանանք մեր փորձից դասեր քաղել, դրանք պետք է լինեն կառուցողական, ծառայեն մեր հայրենիքին, մեր ապագային»»: