Որևէ մեկս չէինք էլ կասկածում, որ իր ձախողումների և տապալումների համար վարչապետը փորձելու է մեղավորներ գտնել. Միքայել Մելքումյան

Երեկ «Բարգավաճ Հայաստան» կուսակցության առաջնորդ Գագիկ Ծառուկյանը «Երկիր Մեդիա» հեռուստաընկերությանը տված հարցազրույցում շատ հստակ նշել է, որ դեռևս սեպտեմբերի 28-29-ին Ռուսաստանի Դաշնության մեր գործընկերներն առաջարկել են հրատապ այցով գալ Հայաստան և սկսել, որպես միջնորդ, համապատասխան բանակցություններ Արցախի Հանրապետության շփման գծի երկայնքով կրակի անհապաղ դադարեցման վերաբերյալ, ապա և ըստ համաձայնության՝ խաղաղապահների հնարավոր տեղակայման վերաբերյալ:

Այո՛, ամեն ինչ շատ ճիշտ է ասել պարոն Ծառուկյանը:

Ս.թ. սեպտեմբերի 29-ին Ռուսաստանի Դաշնության Պետական դուման ընդունել է հայտարարություն-կոչ՝ ուղղված Հայաստանի Հանրապետությանն ու Ադրբեջանին կրակի դադարեցման վերաբերյալ: Այդ նիստից անմիջապես հետո ինձ հետ կապվել է Ռուսաստանի Դաշնության Պետական դումայում այդ հարցի հիմնական զեկուցող իմ գործընկերը և հայտնել, որ Դումայի նախագահի հանձնարարությամբ մեզ և Ադրբեջանի Միլի Մեջլիսի պաշտոնյաներին տեղեկացնում է ընդունված որոշում-հայտարարության վերաբերյալ, որի տեքստը հետագայում պաշտոնապես ուղարկվել է Հայաստանի Հանրապետության Ազգային ժողով՝ իմ անունով: Դա եղել է ս.թ. սեպտեմբերի 29-ին:

Իսկ ինչ վերաբերում է Հայաստանի Հանրապետության վարչապետի մամուլի խոսնակի հայտարարությանը, թե վարչապետը հարցազրույց է տվել «Ինտերֆաքս»-ին ս.թ. հոկտեմբերի 22-ին և հնդկական հեռուստաալիքին ս.թ. հոկտեմբերի 25-ին, ապա շեշտում եմ՝ մենք ասել ենք սեպտեմբերի 29-ի մասին, և ոչ թե՝ հոկտեմբերի: Այսպիսով, մամուլի խոսնակը սեպտեմբերը շփոթել է հոկտեմբերի հետ: Իսկ հենց նոր վարչապետը նույն բանն ասեց, ինչ մամուլի խոսնակը: Ես կրկնում եմ՝ վարչապետը և մամուլի խոսնակը սեպտեմբերը շփոթել են հոկտեմբերի հետ: Մեր ասած ամիս-ամսաթիվը հստակ է:

Հավելեմ նաև, որ սեպտեմբերի 29-ին, անմիջապես Ռուսաստանի Դաշնության Պետական Դումայի որոշման ընդունումից հետո, իմ կողմից Հայաստանի Հանրապետության Ազգային Ժողովի ղեկավարությանը տեղեկացվել է առաջարկի մասին, որն է՝ անհապաղ միջնորդական առաքելությամբ նույն օրը գալ Երևան՝ կրակի դադարեցման նպատակով, որպեսզի ջանքեր գործադրվեն Ռուսաստանի Դաշնության Պետական դումայի որոշման կատարման համար:

Այսպիսով, Պետական դումայի կողմից ընդունված որոշման ամսաթիվը և այդ որոշման կատարման ուղղությամբ մեզ հասցված տեղեկատվությունը ևս մեկ անգամ հավաստում է մեր կողմից նշված ժամկետի իսկությունը:

Խորհուրդ կտամ ոչ մի բան չշփոթել իրար հետ:

Իսկ ինչ վերաբերում է վարչապետի՝ ԲՀԿ նախագահ Գագիկ Ծառուկյանի ուղղված այլ մեղադրանքներին, ապա որևէ մեկս չէինք էլ կասկածում, որ իր ձախողումների և տապալումների համար վարչապետը փորձելու է մեղավորներ գտնել և մեղավորության սլաքներն ուղղել այլոց ուղղությամբ: Բայց սրանք բացարձակ անօգուտ և ապարդյուն ջանքներ են: Մեր պատմության ամենացավալի էջն արդեն իսկ գրվել է և այնտեղ գրված է մեկ անուն-ազգանուն՝ Նիկոլ Փաշինյան:

Հարգանքներով՝

Հայաստանի Հանրապետության Ազգային ժողովի Տարածաշրջանային և եվրասիական ինտեգրման հարցերի մշտական հանձնաժողովի նախագահ Միքայել Մելքումյան