Ես երկու տղա ուղարկել եմ կրակի բերանը. մեկը հիմա անտառում սոված, անտեր ընկած է, 12 հոգով են. գիտեմ՝ ողջ է, բայց չեն գնում հետևներից, մինչև երեխեքի մարմինները բերեն. անհետ կորածի մայր (տեսանյութ)

Մենք այստեղից այսօր չենք գնալու, թող չգցեն վաղվա վրա, թող հենց հիմա գան, մեր էրեխեքը բաց երկնքի տակ են, ինչի՞ իրենք մի գիշեր էլ հանգիստ քնեն: Այս մասին ՊՆ-ի դիմաց լրագրողների հետ զրույցում ասաց անհետ կորած զինծառայողների ծնողներից մեկը:

«Մենք լսեցինք, որ վարչապետ Նիկոլ Փաշինյանի հետ հիմա պիտի հանդիպում լինի: Մենք չենք ուզում մի օր էլ հետաձգել: Իմ երեխաներից մեկն անտառում սոված, անտեր-անտիրական արդեն 1 ամիս պառկած է, իմ երեխայի հետ 12 հոգի կան հիմա, բոլորը սպասում են: Զանգ էլ է եղել ամսի 16-ին, այնպես չէ, որ էդ երեխեքը մահացել են, ու չեն գնում հետևներից, ուղղակի գնացող չկա: Թող հանդիպեն, կասեմ տեղը, տվյալներ կան, որ գնան ուղղակի բերեն»,-ասաց նա:

Անհետ կորած զինծառայողի մայրը նշեց, թե որդին լեյտենանտ է, ու քանի որ նրա ջոկատի անդամներից մեկը նոյեմբերի 16-ին զանգել է, վստահ են, որ նրանք ողջ են:

«Էդ երեխեքը դեռ ողջ են, իմ երեխեն լեյտենանտ է, չի գցել փոքր՝ 18 տարեկաններին, հրամանատարը փախել է, բայց իմ երեխեն չի փախել, բայց հիմա մենք խնդրում  ենք՝ գնան, մեզ ոչ մեկը չի լսում: Անտառում պիտի բաց կանգնեին, որ թուրքը խփե՞ր, հենց այսօր ամեն մեկին, որ գտնում են, խփում են նորից: Անկեղծ եմ ասում, եթե Հայաստանը չի կարողանում մեզ տեր կանգնել, ես ուզում եմ Պուտինին դիմել, իմ երեխեն ինձ համար ավելի թանկ է, 8 տարի սովորել է, որից 5 տարին՝ ՌԴ-ում: Եթե Հայաստանն իմ երեխային տեր չի, ես Պուտինին կդիմեմ»,-ասաց նա:

Անհետ կորած զինծառայողի մայրը հայտնեց նաև, թե իր ամուսինն էլ ազատամարտիկ է եղել, մահացել է. «Ութ տարի ես իմ երեխուն մենակ ուսման եմ տվել, որ էսօր ոչ մեկը չգնա՞ հետևից: Էն մի երեխես բանակ չի գնացել, բայց հենց մի հատ հավաք եղավ, առաջինը ինքը վազեց, գնաց կամավորների հետ, բա երկու տղա եմ ես ուղարկել, որ էդ ձևո՞վ ինձ ընդունեն։ Ես երկու տղա ուղարկել եմ կրակի բերանը, որ էնտեղ ոչ թե մարդու կռիվ էր, այլ օդային կռիվ: Բայց իմ երեխեքը մինչև վերջ կանգնել են, որ էսօր իմ երեխու հետևից ոչ մեկը չգնա՞: Երեխես ողջ է, չեն գնա էնքան, մինչև հասնի էն պահը, որ երեխեքի մարմինները բերեն, մի հատ էլ շնորհակալություն ասենք, որ գոնե մարմիննե՞րն են բերել: Չե՞ն մտածում՝ էդ երեխեքը 30 օր ինչ կերան, ոնց ապրեցին էդ բաց դաշտերում»,-ասաց նա:

Անհետ կորածի մայրը նշեց, թե երկրորդ որդին, որը կամավորագրվել էր, վերադառնալուց հետո նորից է փորձել գնալ՝ եղբորը գտնելու, սակայն թույլ չեն տվել: «Մենք ինչքան լռում ենք, այդքան հարթվում է այս թեման, հերթով բոլոր զոհերին բերելու են: Ես հաստատ գիտեմ՝ քանի հարյուր երեխա անտառներում սպասում են: Մենք հավատացինք, որ մեր երեխեքին չեն գցի, մենք Հայաստանն այս ձևով չէինք պատկերացնում»,-ասաց նա: