Ինչո՞ւ է հայտնի շոկոլադը կոչվում «Ալյոնկա», ո՞ւմ նկարն է պատկերված․«Փաստ»

«Փաստ» օրաթերթը գրում է

«Ալ յոնկա» կաթնային շոկոլադը ստեղծել են ԽՍՀՄ-ում 1965 թվականին: Ավելի ուշ՝ սկսած 1966 թվականից, այն սկսել է արտադրվել հրուշակեղենի «Կարմիր հոկտեմբեր» գործարանում: Ի տարբերություն այլ շոկոլադների, «Ալ յոնկան» ունի «ճարպային», յուղալի համ: «Միավորված հրուշակագործներ» ընկերությունը հանդիսանում է շոկոլադի այդ ապրանքանիշի սեփականատերը: Նրա կազմի մեջ է ներառված մոտ 15 բավականին հայտնի ձեռնարկություն, օրինակ՝ «Բաբաևսկի հրուշակեղենի կոնցեռնը», «Կարմիր հոկտեմբերը», «Ռոտ ֆրոնտը» և այլն: Նման ապրանքանիշի շոկոլադ կարելի է գտնել նաև հետխորհրդային այլ երկրներում, ինչպես, օրինակ՝ ուկրաինական «Օլենկան», կամ բելառուսական «Սիրելի Ալենկան»:

«Ալ յոնկա» կաթնային շոկոլադի պատմությունը սկսվել է 1960-ականների սկզբին ԽՍՀՄ կառավարության կողմից ընդունված պարենային ծրագրով: Այն ուղղված է եղել երկրում մատչելի գներով զանգվածային կաթնային շոկոլադ ստեղծելուն: Մոսկվայի տարբեր գործարաններ, փորձելով համեղ շոկոլադ պատրաստել, սկսել են փորձեր անցկացնել: Համապատասխան բաղադրատոմսը մշակվել է «Կարմիր հոկտեմբեր» գործարանի մասնագետ-հրուշակագործների կողմից, որտեղ էլ այն սկսել են արտադրել 1964 թվականից: Հետագայում խորհրդային հրուշակեղենի շատ այլ գործարաններ ևս սկսել են արտադրել «Ալ յոնկա»: Առաջին «Ալ յոնկայի» վրա պատկերված էր կապույտ գլխաշորով մի աղջնակ, հետագայում հայտնվել է աղջնակ շնիկով և նապաստակով, հետո էլ աղջնակ քանոնով և այլն:

«Ալ յոնկա» շոկոլադն իր անունը ստացել է ի պատիվ առաջին կին տիեզերագնաց Վալենտինա Տերեշկովայի դստեր: Հատուկ ուշադրության է արժանի «Ալ յոնկա» շոկոլադի նկարն ընտրելու պատմությունը: «Կարմիր հոկտեմբեր» գործարանի կողմից արտադրված առաջին շոկոլադի դիզայնն ի սկզբանե նվիրված է եղել տոնական օրերի (մայիսի 1, մարտի 8), և աղջնակի պատկերը բացակայել է: Այնուհետև գործարանը որոշել է մշակել «Ալ յոնկա» շոկոլադի ֆիրմային նկարը: Նույնիսկ առաջարկ է եղել այդ նպատակով օգտագործել հանրահայտ նկարիչ Վասնեցովի «Ալ յոնուշկա» կտավը: Բայց դա հակասում էր այդ ժամանակվա նորմերին, փաթեթավորման վրա վերարտադրություններ տեղադրելու համար անհրաժեշտ էր հատուկ թույլտվություն: Շոկոլադի փաթեթավորումը նախագծելու համար անհրաժեշտ էր աղջնակի լուսանկար, և գործարանի ղեկավարությունը հայտարարում է մրցույթ, որի մասին մարդիկ իմանում են «Երեկոյան Մոսկվա» թերթից: Մրցույթի հաղթող է ճանաչվում գործարանում աշխատող նկարիչներից մեկի դստեր լուսանկարը:

Ալեքսանդր Միխայլովիչ Գերինասը հենց այն նկարիչն է, որը բոլորի հետ միասին մշակել է շոկոլադի փաթեթավորման ձևավորումը: Նա լուսանկարել է իր դստերը (անունը՝ դարձյալ Ալ յոնկա), երբ նա եղել է 8 ամսական: «Ալ յոնկան», որն այժմ ծանոթ է բոլորին, հայտնվել է 1966 թվականին և տասնամյակների ընթացքում ձևավորումը էական փոփոխության չի ենթարկվել, չնայած հետագայում հայտնվել են տարբեր գործարանների արտադրած մոտ 50 նոր «Ալ յոնկաներ»: Դա շարունակվել է այնքան ժամանակ, մինչև «Կարմիր հոկտեմբեր» գործարանը «Ալ յոնկան» դարձրել է իր բրենդը՝ վերջապես այդ շոկոլադը դարձնելով միայն իրենը: «Ալ յոնկա» անվանումով շոկոլադների այլ տեսակներ (պնդուկով, չամիչով, նուշով և այլն) սկսել են արտադրվել 2000 թվականից: Ընդ որում, շոկոլադի փաթեթավորումը մի փոքր փոխվել է: Սկզբում շոկոլադի մեկ սալիկը եղել է 100 գրամ, հետո սկսել են արտադրել 15, 20, 60 և 200 գրամանոց սալիկներ: Այս ապրանքանիշի տակ նաև սկսել են պատրաստել շոկոլադե կոնֆետներ, որոնց վրա ևս առկա է նույն աղջնակի պատկերը:

Մանրամասները՝ «Փաստ» օրաթերթի այսօրվա համարում