Ալիևը ցանկանում է նոր միջանցք կառուցել, Փաշինյանին անվանում են «դավաճան». «ՌԻԱ Նովոստի»-ն անդրադարձել է ԼՂ հետպատերազմյան զարգացումներին

Ադրբեջանի նախագահը ցանկանում է արագ ճանապարհ կառուցել Լեռնային Ղարաբաղի և Հայաստանի միջև՝ հայտարարելով, որ առանց դրա Երևանը տասնամյակներ շարունակ զրկված է եղել եկամուտներից: Միևնույն ժամանակ Նիկոլ Փաշինյանը Հայաստանում մեղադրվում է դավաճանության համար: «ՌԻԱ Նովոստի» գործակալությունը վերլուծել է՝ արդյո՞ք Բաքուն իսկապես պատրաստ է համագործակցության, և որ սխալների համար են Փաշինյանից պահանջում հրաժարական տալ:

Երեքշաբթի օրը Ադրբեջանի նախագահը ուղերձով դիմել է ժողովրդին: Նախօրեին Քաշաթաղի (Լաչին) շրջանում բարձրացվել է Ադրբեջանի դրոշը. հայերը լքել են այս տարածքը: Այս առիթով իր խոսքում Ալիևը խոսել է ԼՂ-ն Հայաստանի հետ կապող տարածքի ռազմավարական նշանակության մասին:

Բաքվում նոյեմբերի 9-ին ստորագրված եռակողմ հայտարարությունը բնորոշել են որպես Երևանի պարտություն:  Հայաստանում  նույնպես այն համարվում է պարտություն. երկրում բողոքի ցույցեր են սկսվել «Նիկո՛լ, դավաճա՛ն» կարգախոսի ներքո: Նախարարների  մի մասը լքել է պաշտոնները, խորհրդարանականները հրաժարվել են մանդատներից, բոլորը միմյանց մեղադրում են ազգային շահերը խարխլելու համար: Երկրում սկսվել է քաղաքական ճգնաժամ:

Փաշինյանը ստիպված է պատասխան տալ ոչ ժողովրդական որոշման համար: Նոյեմբերի վերջին նա գրել էր, որ հոկտեմբերի 19-ին, երբ տարածաշրջանում մարտեր էին ընթանում, չճանաչված Լեռնային Ղարաբաղի Հանրապետության ղեկավար Արայիկ Հարությունյանը զանգահարել է իրեն՝ խնդրելով դադարեցնել ռազմական գործողությունները: Փաշինյանի խոսքով՝ «Հարությունյանը արտահայտել է ոչ միայն իր անձնական կարծիքը, այլև ԼՂՀ նախկին նախագահների տեսակետները»:

Դրանից հետո Փաշինյանը կապվել է ՌԴ նախագահ Վլադիմիր Պուտինի հետ՝ առաջարկելով ռուս խաղաղապահներ տեղակայել նախկին Լեռնային Ղարաբաղի Ինքնավար Մարզի (ԼՂԻՄ) սահմանի և Լաչինի միջանցքի երկայնքով: Ռուս առաջնորդը խոստացել էր խոսել Ալիևի հետ: Փաշինյանի խոսքով՝ հաջորդ օրը ԼՂՀ նախկին նախագահներ Արկադի Ղուկասյանն ու Բակո Սահակյանն իր հետ հանդիպմանը հայտարարել են, որ իրենք դեմ են ցանկացած համաձայնության առանց ԼՂՀ կարգավիճակի հստակեցման: Ըստ Փաշինյանի՝ ինքը դրանից հետո որոշում է կայացրել «շարունակել մարտական գործողությունները, քանի որ Բաքվում խաղաղության դիմաց պահանջում էին Շուշիի վերադարձը»:

Ղուկասյանը և Սահակյանը ներկայացրել են իրադարձությունների իրենց վարկածը. հոկտեմբերի 19-ին ԼՂՀ նախագահը պատրաստել է պատերազմի ավարտի մասին նամակներ`ուղղված ԵԱՀԿ Մինսկի խմբի համանախագահ երկրների` Ռուսաստանի, Ֆրանսիայի և ԱՄՆ-ի ղեկավարներին, ինչպես նաև Փաշինյանին:

«Սակայն  Փաշինյանը բացատրել է, որ ներկայիս իրավիճակում, որն առաջացել է Ադրբեջանի քաղաքականության պատճառով, նամակներ ուղարկելը կորցրել է իր արդիականությունը: Սա է ամբողջ ճշմարտությունը», - ասել են ԼՂ նախկին առաջնորդները:

Այդ ժամանակ Փաշինյանի հրաժարականի պահանջով հանդես է եկել նաև նախագահ Արմեն Սարգսյանը.«Եթե քաղաքական գործիչը ուժեղ է, նա հետո կարող է վերադառնալ: նախորդ ընտրությունները տեղի են ունեցել 2.5 տարի առաջ, երբ երկիրը այլ էր»:

2018-ի սեպտեմբերին Փաշինյանը հանդիպել էր Ադրբեջանի նախագահի հետ: Զրուցակիցները պայմանավորվել էին տարածաշրջանում իրավիճակի լարվածությունը նվազեցնելու քայլերի շուրջ: Ալիևը դրական տպավորություն է թողել Փաշինյանի վրա, վերջինս նրան անվանել էր «կիրթ մարդ»:

Հիմա Հայաստանում Փաշինյանին հիշեցնում են նաև այս խոսքերը, ինչպես շատ այլ խոսքեր, որոնք ասվել են կուլիսներում: Օրինակ ՝ նախկին պատգամավոր Աղվան Վարդանյանն ասում է, որ 2019-ին վարչապետը մեղադրել է Մոսկվային, Հայաստանի ազգային անվտանգության ծառայությանը և ԼՂՀ ղեկավարությանը ՝ իր դեմ դավադրություն կազմակերպելու փորձ կատարելու մեջ: Եվ նույն տարում, հույզերի ազդեցության տակ, Փաշինյանը ցանկանում էր հայտարարել Հավաքական անվտանգության պայմանագրի կազմակերպությունից (ՀԱՊԿ) դուրս գալու մասին: