Մնում է ծնողներով զինվենք և գնանք մեր երեխեքին փրկենք

Ինչպես հայտնել էինք քիչ առաջ անհետ կորած զինծառայողների հարազատները հանդիպում էին ունեցել ԳՇ լրատվականի պետ Սամվել Ասատրյանի հետ:

Սամվել Ասատրյանը հանդիպումից հետո դուրս եկավ շենքից՝ չպատասխանելով լրագրողների ոչ մի հարցին, միայն հավելեց. «Ինչ պետք է ես հայտնել եմ անհետ կորած զինծառայողների հարազատներին»,- ասաց ԳՇ լրատվականի պետը:

Իսկ անհետ կորած զինծառայողների հարազատներից մեկն էլ ասաց, որ իրենց ոչ մի բան չի ասել Սամվել Ասատրյանը, որ նորից պետք է սպասեն. «Ոչ մի նորություն մեզ չհայտնեցին, պարզապես 2 օր ևս մեզ լռեցնելու համար ասացին՝ գործը ընթացքի մեջ է: 50 օր է ես հարց եմ բարձրացնում՝ ասե՛ք՝ երբ, նրանք փաստացի չեն կարողանում ասել՝ երբեք: Ամեն օր «այսօր-վաղն» են անում: Մենք բավականին կյանքի փորձ ունենք նրանց չհավատալու համար, հերիք է ինչքան խաբում են: Իրենց ձեռք չի տալիս, որ մեր երեխեքից մենք լուր ունենանք»,- ասաց անհետ կորած զինծառայողների հարազատներից մեկը:

Վերջինս նշեց, որ կփորձեն հանդիպել Օնիկ Գասպարյանի  հետ, սակայն, եթե դա էլ չստացվի, կփակվեն բոլոր միջպետական ճանապարհները. «Մենք այլևս պատրաստ չենք սպասելու, մեր պետությունը սիրում է ծեծեն, ջարդեն, վառեն այդ ժամանակ մեր ձայները նոր կլսեն, բայց եթե սուս սպասում ենք, ասում են՝ էս ժողովուրդը լավ էլ խելոք ժողովուրդ ա, թո՛ղ սպասեն»,- նշեց կորած զինծառայողի մայրը:

Նա լրագրողների հետ զրույցում նշեց, որ Սամվել Ասատրյանը նրանց ասել է, որ հիմա գնում է հանդիպելու Օնիկ Գասպարյանին, որից հետո 5 ծնող ևս կգնա նրանց հանդիպմանը միանալու. «Եթե այդ հանդիպումը չստացվի այսօր, չգիտեմ՝ էլ ինչ կանենք, մնում է մենք էլ զոհվենք կամ էլ ծնողներով հավաքվենք, մի ավտոբուս վերցնենք, զինվենք և գնանք մեր երեխեքին փրկենք»,- ասաց մեկ այլ անհետ կորած զինծառայողի մայրը: