Ոսկու գինն աննշան աճում է շտկման շրջանակում

Չորեքշաբթի առավոտյան ոսկու արժեքն աննշան մեծանում է ավելի վաղ նվազելուց հետո, ինչպես նաեւ ծննդյան տոների սպասումով, շուկաները շարունակում են գնահատել կորոնավիրուսի իրավիճակը եւ ԱՄՆ տնտեսության աջակցության փաթեթը, այս մասին վկայում են սակարկությունների տվյալները, փոխանցում է «Փրայմը»: 

Նյու Յորքի Comex բորսայում ոսկու փետրվարյան ֆյուչերսի գինն աճել է 0,11 տոկոսով կամ 2,1 դոլարով՝ տրոյական ունցիայի դիմաց հասնելով մինչեւ 1872,1 դոլարի: Արծաթի մարտյան ֆյուչերսն էժանացել է 0,15 տոկոսով՝ ունցիայի դիմաց հասնելով մինչեւ 26,497 դոլարի:

Ոսկու գինն աննշան փոխվում է սակարկությունների երեք շրջանների նվազումից հետո, ընդ որում՝ երեքշաբթի մետաղն էժանացել էր 0,7 տոկոսով: Դրանից բացի, գնանշումները պահպանում է նաեւ դոլարի էժանացումը, քանի որ այդ դեպքում ոսկին ավելի մատչելի է դառնում ուրիշ արժույթով գնելու համար: Դոլարի ինդեքսը (դոլարի փոխարժեքը ԱՄՆ հիմնական առեւտրային գործընկեր 6 երկրների արժույթների զամբյուղի նկատմամբ) նվազում է 0,2 տոկոսով:

Ներդրողները միաժամանակ ուշադրություն են դարձնում ԱՄՆ տնտեսության աջակցության փաթեթի վերաբերյալ նորություններին: Երկրի նախագահ Դոնալդ Թրամփն ավելի վաղ հրաժարվել էր ստորագրել նախօրեին Կոնգրեսի ընդունած 900 մլրդ դոլարի տնտեսական օգնության փաթեթը՝ պահանջելով այն վերանայել: Ավելի ուշ Ներկայացուցիչների պալատի խոսնակ Նենսի Փելոսին հայտարարել էր, որ դեմոկրատները պատրաստ են քննարկել հարկատուներին ուղիղ վճարումները մեծացնելու մասին նախագահի առաջարկը:

AirGuide-ի տնօրեն Մայքլ Լենգվորդի կարծիքով, որի խոսքը մեջբերել է «Ռեյթեր» գործակալությունը, առաջիկա շաբաթներին ոսկու գինն աննշան կփոխվի, իսկ աճը կպահպանվի միգուցե անորոշության նոր գործոնների պատճառով: Փորձագետի կարծիքով՝ սա պայմանավորված է այն հանգամանքով, որ շուկան արդեն հաշվարկել է կորոնավիրուսի համավարակի հետ կապված անորոշության զգալի մասը եւ ԱՄՆ տնտեսության աջակցության փաթեթը: