Ամանորի գիշերը անհայտ անձինք շուրջ 60 մեքենա են հրկիզել

Ամանորի գիշերը Ստրասբուրգի եւ Ստորին Հռենոսի դեպարտամենտի այլ քաղաքների փողոցներում անկարգությունների ժամանակ հրկիզվել է մոտ 60 մեքենա, հայտնում է ՏԱՍՍ-ը Dernières Nouvelles d'Alsace-ին:

Հրկիզման մասին առաջին հաղորդումները ստացվել են դեկտեմբերի 31-ին, ժամը 19:00-ի սահմաններում, Ստրասբուրգից արեւմուտք գտնվող Կրոնենբուրգի շրջանից: Կեսգիշերն անց Մյունցիգ, Սավերն եւ Օստվալդ համայնքներից մեքենաներ այրելու մասին հաղորդագրություններ են ստացվել: Ավելի ուշ հայտնի է դարձելՍելեստատ կոմունայում վանդալիզմի եւ հրկիզման ակտերի մասին:

Ընդհանուր առմամբ, ժանդարմներին եւ ոստիկանությանը հաջողվել է գիշերվա ընթացքում 20 մարդու բերման ենթարկել Ստրասբուրգում եւ արվարձաններում: Ընդ որում, պատճառը հաճախ ոչ թե անկարգություններն ու վանդալիզմն է, այլ պարետային ժամը, խոշոր հավաքների եւ պիրոտեխնիկայի օգտագործման արգելքը չպահպանելը: Թերթը նշում է, որ, ընդհանուր առմամբ, Ստրասբուրգում իրավիճակը շատ ավելի հանգիստ է եղել, քան նախորդ տարիներին, երբ փողոցներում բախումներ էին տեղի ունենում ոստիկանների եւ վանդալների խմբերի միջեւ:

Այնուամենայնիվ, պիրոտեխնիկայի օգտագործման արգելքը խախտվել է ամենուր, եւ մի դեպքում դա արժեցել է 25-ամյա ֆրանսիացու կյանք, ով Ամանորի նախօրեին Ստրասբուրգից 30 կմ հարավ գտնվող Բուֆցհայմ կոմունա ընկերների մոտ էր եկել: Հրավառությունների արձակման ժամանակ սարքերից մեկը չի աշխատել, եւ նա գնացել է ստուգելու, թե ինչն է բանը: Հենց նա մոտեցել է, տակառի մեջ գտնվող արկը պայթել է: France-Presse գործակալության տվյալներով՝ Ստորին Հռենոսի այլ համայնքներում հրավառություն սկսելու գործընթացում եւս երեք մարդ թեթեւ վնասվածքներ է ստացել:

Ֆրանսիայի ՆԳՆ-ն 100 000 ոստիկաններ ու ժանդարմներ է տեղակայել Ամանորի նախօրեին Ֆրանսիայի քաղաքների փողոցներում անվտանգությունն ապահովելու համար: Նրանց հիմնական խնդիրներից մեկը քաղաքներում չարտոնված հանդիպումներն ու բախումները կանխելն էր, ինչպես նաեւ պարետային ժամի պահպանումը վերահսկելը, որը գործում է ամբողջ երկրում 20:00-ից մինչեւ 06:00-ը, որպես կորոնավիրուսի համավարակի դեմ պայքարի միջոցառումների մաս:

 

Past.am