Շուռնուխում նոր տներ կկառուցվեն՝ Ադրբեջանին հանձնվող տարածքների բնակիչներին տրամադրելու համար․ նրանց մի մասը ցանկանում է փոխհատուցումը գումարի տեսքով վերցնել, այլ վայրում տուն գնել․ Շուռնուխի ղեկավար

Գյուղի՝ Ադրբեջանին հանձնվող 11 տների բնակիչների տեղափոխությունները կատարվել են, նրանց հիմնական մասը տեղավորվել է գյուղում՝ ազատ տներում, իմ ընտանիքը՝ գյուղապետարանի շենքում, մի մասը Գորիսում են, մի ընտանիք՝ Կապանում։ Այս մասին Tert.am-ի հետ զրույցում ասաց Սյունիքի մարզի Շուռնուխ բնակավայրի վարչական ղեկավար Հակոբ Արշակյանը։

Անդրադառնալով Կառավարության կողմից տարհանված քաղաքացիներին տրամադրվելիք փոխհատուցումներին՝ Արշակյանը հայտնեց, որ երեկ Կառավարության քաղաքաշինության բաժնից աշխատակիցներ են այցելել Շուռնուխ։

«Պատրաստվում են գյուղում մի փողոցում տներ կառուցել, որ տեղավորեն տարհանվածներին։ 1-2 օրից կգան նախագծողներ, աշխատանքներ կանեն։ Ասել են՝ հնարավորինս շուտ կսկսեն, հստակ ժամկետներ չկան»,-նշեց նա։

Արշակյանի խոսքով՝ բնակիչների մի մասն այժմ էլ անհանգիստ է, որ անվտանգ չի լինի գյուղում։ «Թուրքը նստած է ճանապարհի տակ։ Դեռևս անորոշություններ կան։ Հնարավոր է՝ գյուղից հեռացողներ լինեն։ Առաջարկվող պայմաններին գյուղացիների մի մասը համաձայնել է, մի մասը ցանկանում է փոխհատուցումը գումարի տեսքով վերցնել, այլ վայրում տուն գնել»,-ասաց նա։

Հարցին էլ՝ Կառավարությունը համաձա՞յն է այդ տարբերակին, գյուղապետն արձագանքեց, թե Կառավարությունը չի կարող մերժել։  «Ամեն դեպքում մենք փորձում ենք այնպես անել, որ գյուղից հեռացողներ չլինեն, մնան»,-նշեց նա։

Հարցին՝ իսկ մինչ տների կառուցումը բնակիչներին փոխհատուցում տրամադրվելու՞ է, գյուղապետը պատասխանեց, թե այս պահին այդ հարցերը քննարկման փուլում են։

Անդրադառնալով այն 12-րդ ընտանիքին, որի տունը սահմանագծին էր, և որոշել էր տեղափոխել` Արշակյանն ասաց, որ այդ ընտանիքը չի տեղափոխվել, քանի որ անվտանգությունն ապահովվում է։

Նրա խոսքով՝ սահմանազատման աշխատանքները դեռ չեն ավարտվել, ընթացքի մեջ են։