Ինդոնեզիայում տարերային աղետների զոհերի թիվը հասել Է 96-ի

Անցյալ շաբաթ Ինդոնեզիայի Արևմտյան Սուլավեսիի և Հարավային Կալիմանտանի նահանգներում տեղի ունեցած երկրաշարժերի և հեղեղումների զոհ Է դարձել առնվազն 96 մարդ: Հունվարի 18-ին այդ մասին հայտնել Է «Սինխուա» գործակալությունը՝ վկայակոչելով Ինդոնեզիայի Տարերային աղետների դեմ պայքարի ազգային գործակալության ներկայացուցչին, տեղեկացնում Է «Արմենպրես»-ը:

Ընդհանուր առմամբ, 81 մարդ մահացել Է հունվարի 14-ին և 15-ին 6,2 մագնիտուդով երկրաշարժի և 5,9 մագնիտուդով հետցնցման հետևանքով: Հունվարի 14-ին տեղատարափ անձրևների առաջացրած հեղեղումները 15 բնակիչների մահվան պատճառ են դարձել Հարավային Կալիմանատանի նահանգում, հայտարարել Է գործակալության մամուլի քարտուղար Ռադիթյա Ջաթին: Նրա խոսքով՝ նահանգի իշխանությունները շուրջ 70 հազար մարդ են տարահանել աղետի գոտուց: Արևմտյան Սուլավեսիում երկրաշարժից ավերվել Է հազարից ավելի բնակելի տուն, նահանգում փրկարարական աշխատանքները շարունակվում են:

Հունվարի 15-ին տեղական ժամանակով մոտավորապես 2:28-ին (Երևանի ժամանակով հունվարի 14-ի 22:28-ին) 6,2 մագնիտուդով երկրաշարժ Է տեղի ունեցել Արևմտյան Սուլավեսիում: Էպիկենտրոնը գտնվել Է Մաջենեի շրջանից 6 կիլոմետր դեպի հյուսիս - արեւմուտք, օջախն ընկած Է եղել 10 կիլոմետր խորության վրա: Հունվարի 14-ին տեղական ժամանակով 14:35-ին (Երևանի ժամանակով 10:35-ին) նույն շրջանում տեղի Է ունեցել 5,9 մագնիտուդով երկրաշարժ: Հունվարի 14-ից ի վեր տեղի սեյսմոլոգիական ծառայությունը գրանցել Է 28 հետցնցում: