«Երջանկությունը թմրեցնող է, հիմա այդ փուլն անցել է». Շողեր Գրիգորյանը՝ ամուսնությունից հետո ունեցած երկար դադարի, իր ապրումների և Հայաստան գալու ցանկության մասին

Ռուսաստանաբնակ դերասանուհի Շողեր Գրիգորյանը, ով լսարանին հայտնի է «Բանակում», «Փախիր կամ ամուսնացիր», «Քաոս» նախագծերից, ամուսնությունից հետո մասնագիտական գործունեությամբ ակտիվ չի զբաղվում, սակայն այս շրջանում նորություն ունի: Tert.am Life-ի հետ զրույցում նա պատմել է նոր ներկայացման, երկար դադարի, իր ապրումների, Հայաստան գալու ցանկության և երեխաների մասին:

«Ամռանը Հայ-առաքելական եկեղեցու Նոր Նախիջևանի և Ռուսաստանի թեմին կից աշխատող հայկական «Գավիթ» թատրոնից համագործակցության առաջարկ ստացա: Հիմա աշխատում ենք մի պիեսի վրա, հուսամ՝ կորոնավիրուսի հետ կապված սահմանափակումները կթուլանան ու կկարողանանք խաղալ այն: Ներկայացումը ռուսերեն է, դեռ չեմ ուզում ասել, թե որ պիեսի հիման վրա է: Սեպտեմբերին պրեմիերային շատ մոտ էինք, բայց սկսվեց պատերազմը և հետաձգեցինք այն»,- ասաց դերասանուհին:

Շողերի նկատեց, որ ամուսնությունից հետո 5 տարի է՝ մասնագիտական գործունեությամբ ակտիվ չի զբաղվում. «Առաջին երեք տարվա ընթացքում նոր կյանքով էի լցված, որը շատ էր տարբերվում իմ նախկին կյանքից. նախկինում անընդհատ զբաղված էի, դրսում, ամուսնանալուց հետո տանն էի, երեխաների հետ: Երջանկությունը թմրեցնող հատկություն ունի, դու թուլանում ես, ուզում ես այդ վիճակի մեջ երկար մնալ, բայց հիմա այդ փուլն անցել է: Չնայած գնահատում եմ ունեցածս՝ ուզում եմ նաև աշխատել, եթե Աստված ինձ տվել է այդ շնորհը, չպետք է պահեմ: Նման երկար դադար երբեք չեմ ունեցել, դեռ համալսարան չընդունված էլ խաղացել եմ: Հիմա ինձ համար շատ անսովոր է՝ չնայած ընդմիջումներով որոշ նախագծերում ընդգրկված եղել եմ: 5 տարվա մեջ 3-4 նախագիծը շատ քիչ է, նախկինում այդքան նախագիծ մեկ ամսում էի ունենում»:

Ըստ դերասանուհու՝ չաշխատելու ընթացքում փորձել է լրացնել տեսական գիտելիքները: «Երբ դերասանը չի աշխատում, նրա մոտ սրվում է թատերագետի, քննադատի գիծը: Երբ խաղում ես, հասկանում ես, որ տվյալ տեսարանը ստանալը բարդ է, երբ չես աշխատում, քննադատում ես: Այնպես որ, միայն պրակտիկ առումով եմ պասիվ, տեսական առումով ակտիվ եմ: Հնարավոր է՝ շաբաթվա ընթացքում 3-4 ֆիլմ դիտեմ, շատ գրքեր եմ կարդում, երբեք չեմ դադարել կարդալ, այդ պատճառով էլ այս տարիների ընթացքում ընկճախտեր չեմ ունեցել: Գուցե եղել են դեպքեր, երբ որևէ դեր շատ եմ ցանկացել, բայց նույնիսկ այդ պահին ոչ ոք դրա մասին չի իմացել, իմ մեջ եմ մտածել այդ ամենի մասին» ,- ընդգծեց Շողերը:

Դերասանուհու որդին՝ Սամուելը, արդեն 4,5 տարեկան է, դուստրը՝ Էսթերը, շուտով 3 կդառնա: Դերասանուհին նկատեց, որ երեխաները բավականին մեծացել են, գնում են դեպի ինքնուրույն կյանք, ինչն իրեն թույլ կտա ակտիվ աշխատել:

«Քանի որ մանկապարտեզ են հաճախում, ռուսերենով են հաղորդակցվում, բայց ես ու ամուսինս բացառապես հայերեն ենք խոսում տանը, երեխաներին էլ ստիպում եմ, որ հայերեն խոսեն: Առաջ զարմանում էի՝ ինչպե՞ս կարող ես ապրել օտար երկրում և երեխաներդ հայերեն չխոսեն, հիմա հասկանում եմ՝ ինչից փախչեմ, ինձ հետ կկատարվի՝ թեև շատ չեմ անհանգստանում, իրենց լեզուն միևնույն է հայերենն է» ,- ասաց նա:
Դերասանուհին նաև ընդգծեց, որ Հայաստանը շատ է կարոտել: «Աշխատում եմ տարվա ընթացքում 1-2 անգամ գալ, բայց նախորդ տարի չկարողացա գալ: Հիմա այնքան եմ ձգտում գալ, մտովի անընդհատ Հայաստանում եմ: Երազում եմ մխիթարության կարիք ունեցող մարդկանց հանդիպել, թեկուզ ուղղակի նստել ու լացել իրենց հետ: Հիմա զրկված եմ այդ ամենից, չգիտեմ՝ ո՞ւմ և ի՞նչ ասել, իսկ երբ մարդու կողքին ես, կիսում ես նրա ցավը: Շատ եմ սպասում, որ այս տարի կկարողանամ գալ, առաջին հերթին ինքս ունեմ Հայաստան գալու կարիք» ,- եզրափակեց նա: