Բաղրամյան պողոտայից բերման ենթարկվածներ չկան, ոստիկանությունը խաղաղ է գնահատում իրավիճակը

Բաղրամյան պողոտայից ոստիկանություն բերման ենթարկված քաղաքացիներ չկան: Բոլոր քաղաքացիները, ովքեր էլեկտրաէներգիայի թանկացման դեմ բողոքի ցույցերից բերման են ենթարկվել նախորդ օրերին, բաց են թողնվել: Այս մասին լրագրողների հետ զրույցում տեղեկացրեց Երեւանի փոխոստիկանապետ Վալերի Օսիպյանը` տեղեկացնելով, որ ոստիկանությունը ներկա պահին խաղաղ է գնահատում Բաղրամյան պողոտայի իրավիճակը: «Երկու կողմերն էլ խաղաղ են, քաղաքացիներն անօրեն գործողություններ թույլ չեն տալիս, իսկ ոստիկանությունը չի փորձի կտրուկ գործողություններ իրականացնել»,-ասաց Օսիպյանը:

Ուկրաինացի լրագրողները հետաքրքրվեցին, թե ինչու է փոխոստիկանապետը հատել բարիկադները եւ անցել քաղաքացիների հատված` նշելով` արդյո՞ք հյուր է եկել քաղաքացիներին, Օսիպյանը նշեց, որ հյուր գնալու խնդիր չունի, քանի Երևանը բոլորի տունն է, իսկ ժողովուրդն ու ոստիկանները միասնական են: Նա կարծիք հայտնեց, որ Բաղրամյան պողոտան երկար ժամանակ փակ չի մնա` չմանրամասնելով, թե ինչով է պայմանավորված իր վստահությունը: «Ոստիկանությունն այս օրերին բացատրական աշխատանքներ է տանում քաղաքացների հետ եւ հորդորում, որ գնան օրինական ճանապարհով եւ հարցի համար գտն են սահմանադրական լուծում»,-ասաց Երեւանի ոստիկանության պետի տեղակալը: Ոստիկանները ցանկանում են հասնել նրան, որ ցուցարարներն անօրեն գործողությունների փոխարեն օրինական դաշտում գործեն:

Խոսելով հունիսի 23-ի լուսաբացի մասին` Օսիպյանը հիշեցրեց, որ ՀՀ ոստիկանապետի հանձնարարականով իրականացվելու է ծառայողական քննություն եւ ոստիկանության բոլոր այն ծառայողները, ովքեր թույլ են տվել խախտումներ եւ վնասել են քաղաքացիներին, պատժի կենթարկվեն սահմանված կարգով:

Օսիպյանն անդրադարձավ նաև այն թեմային, թե ինչպես են Բաղրամյան պողոտայի իրադարձությունները լուսաբանվում միջազգային լրատվամիջոցներում` հատկապես այն հարցին, որ որոշները դրանք որակեցին որպես «երկրորդ մայդան», Օսիպյանն ասաց, որ լրագրողները կարող են ազատորեն լուսաբանել, սակայն այս դեպքերը որպես մայդան որակելը սխալ է: «Թող տեսնեն, որ Հայաստանը ինքնիշխան, իրավական-ժողովրդավարական պետություն է եւ բացառում եմ նման բան այստեղ, հնարավոր չէ նման բան որևէ մեկի մտքի ծայրով անգամ անցնի»,-հայտարարեց Երեւանի փոխոստիկանապետը:

Նրան մի կին հյուրասիրեց իր ձեռքով պատրաստած եւ Բաղրամյան պողոտա բերած գաթաներ, իսկ նստացույցի մասնակիցներն առաջարկեցին ոստիկանների թիմ կազմել եւ իրենց հետ ֆուտբոլ խաղալ: Օսիպյանն առաջարկեց ուկրաինական լրատվամիջոցի ներկայացուցիչներին, ովքեր քիչ առաջ «մայդանային» հարցեր էին տալիս, արձանագրել, թե ինչպիսի մթնոլորտ է Բաղրամյան պողոտայում:  

Հունիսի 25-ի առավոտյան ՀՀ ոստիկանապետ Վլադիմիր Գասպարյանը եւս այցելել է Բաղրամյան պողոտա, զրուցել նստացույց հայտարարած քաղաքացիների հետ: Վլադիմիր Գասպարյանը կարճատև զրույց է ունեցել նաև ցուցարարների և ոստիկանների միջև եղած հատվածում ամբողջ գիշեր անցկացրած` Ազգային ժողովի պատգամավոր Նիկոլ Փաշինյանի հետ:

Հայաստանի Հանրային ծառայությունները կարգավորող հանձնաժողովը հունիսի 17-ին որոշում է կայացրել էլեկտրաէներգիայի սակագինը բարձրացնել 6,93 դրամով:Հունիսի 19-ին Երևանի կենտրոնում`Ազատության հրապարակում, մեկնարկել է բողոքի ակցիա`հանրահավաք, այնուհետև` նստացույց: Ակցիայի մասնակիցներըհունիսի 22-ին շարժվել են դեպի Բաղրամյան պողոտա` չենթարկվելով` հասարակական կարգը չխախտելու ոստիկանության հորդորներին: Ոստիկանությունը ջրցանմեքենաների կիրառմամբ հունիսի 23-ի առավոտյան ցրել է ակցիան: Արդյունքում 237 մարդ բերման են ենթարկվել, 25-ը դիմել են բժիշկների օգնությանը: Հունիսի 23-իերեկոյան կրկին հավաք է անցկացվել Ազատության հրապարակում՝ վերածվելով երթի կրկին դեպի Բաղրամյան պողոտա, որտեղ էլ մինչև այժմ այն շարունակվում է:Ակցիայի մասնակիցները պանաջում են չեղյալ հայտարարել սակագնի բարձրացման որոշումը:

 

 

XX