«Չունենք տաբուներ, բոլորի համար բաց ենք». «Ժողովուրդ» օրաթերթը 10 տարեկան է․ «Փաստ»

«Փաստ» օրաթերթը գրում է

«Ժողովուրդ» օրաթերթը երեկ նշում էր հիմնադրման 10-ամյակը։ Թերթի հիմնադիր, ԱԺ պատգամավոր Թագուհի Թովմասյանն ասում է՝ տարիները շատ արագ անցան։ «Ինձ երբեմն թվում է, թե թերթը նախանցած տարի ենք հիմնադրել։ Տասը տարին շատ արագ անցավ։ Երբ բացում էինք օրաթերթը, մտածում, թե ինչ անուն դնենք, ինչ պարբերականությամբ հրատարակենք՝ օրաթերթ, երկշաբաթաթերթ կամ շաբաթաթերթ, չէինք մտածում, թե ինչ ճանապարհով կգնանք։ Հասկանում էինք մարտահրավերները, այն, որ թվայնացման այս դարաշրջանում շատ բարդ է լինելու տպագիր մամուլի կայացումը, բայց ունեինք շատ-շատ հավակնոտ ծրագրեր և խնդիր էինք դրել, որ պետք է բացենք թերթ, և այդ թերթը պետք է դառնա Հայաստանում առաջատարներից։ Այս նպատակով սկսեցինք մեր աշխատանքը։

Իմ կյանքում միշտ առաջնորդվել եմ այդ սկզբունքով, եթե մարդն ունենում է նպատակ, այդ նպատակին հասնելու համար պետք է իրականացնի քայլեր և անպայման հաջողելու է։ Քրտնաջան աշխատել ենք, ունեցել ենք անքուն գիշերներ, բազմաթիվ խնդիրներ, տասնյակներով դատական հայցեր, երբ փորձել են մեր թերթը սնանկացնել, փակել և այլն։ Բայց դիմագրավել ենք այդ բոլոր մարտահրավերներին և մեր առջև սկզբունք ենք դրել՝ մեր օրաթերթը բոլորի և ամեն ինչի մասին է։ Չունենք տաբուներ, սիրելիներ, ատելիներ, պաշտելիներ, մենք բոլորի համար հավասար ենք, բոլորի համար բաց ենք, և բոլորը պետք է պատրաստ լինեն նաև մեր կողմից քննադատության։ Այս բանաձևը կիրառել ենք տարիներ շարունակ»,-«Փաստի» հետ զրույցում ասում է Թովմասյանը։ Ընդգծում է՝ երբ մոտ երեք տարի առաջ պատգամավոր էր ընտրվում, բոլորը թերահավատ էին հետևյալ հարցի վերաբերյալ։

«Ասում էին՝ ձեր մամուլը դառնալու է իշխանական մամուլ, երբ պատգամավոր դառնաս, օրաթերթն անպայման դառնալու է իշխանական։ Բայց երբ առաջադրվեցի, հավաքեցի իմ թիմի ներկայացուցիչներին մի սեղանի շուրջ և ասացի՝ ձեզանից մեկ խնդրանք ունեմ. ուզում եմ, որ մնաք օրաթերթ և պահպանեք մեր սկզբունքները։ Նույնիսկ եթե ես որևէ վատ, քննադատության արժանի բան կանեմ, ինձ էլ կքննադատեք, որպեսզի դուք ձեր աշխատանքը և ձեր անցյալը հարգեք։ Ու մենք այդպես էլ աշխատեցինք։ Սկսեցի բացարձակ չզբաղվել թերթի խմբագրական աշխատանքով, մեր աշխատակիցները կարողացան սրբորեն պահպանել այն ավանդույթները, որոնք դրել էինք, և այդ ավանդույթների պահպանությունը և պաշտպանությունն, իհարկե, մեզ վրա որոշ իմաստներով շատ ծանր նստեց, որովհետև բավականին զրկանքներ կրեցինք, թիմը հետապնդումների ենթարկվեց:

Հիշում եք՝ հետհեղափոխական Հայաստանում հարձակում գործեցին օրաթերթի խմբագրության վրա, խմբագրին գաղտնալսեցին, դատական տարբեր հայցեր առաջադրեցին մեր դեմ: Բայց մարդիկ կարողացան պատվով տանել այդ բոլոր փորձությունները. և՛ ինձ ապահովագրեցին, և՛ ինձնից ապահովագրեցին թերթը: Ես իրենց միշտ ասում էի՝ եթե տեսնեմ, ձեզ ընդամենը մեկ բան եմ ասելու, որ դուք այսինչ ինֆորմացիան սխալ եք գրել, դա ուղղակի սուտ է, գոյություն չունի: Բարեբախտաբար, այս երեք տարվա ընթացքում մեկ-երկու դեպք է եղել, որ փոքրիկ անճշտություն է հրապարակ վել: Մնա ցած բո լոր դեպ ք ե ր ո ւ մ սկզբունքները պահպանվել են, հաղորդվել է բացառապես ճշտված ինֆորմացիա»,-նշում է մեր զրուցակիցը: Մեր այն դիտարկմանը, որ փաստորեն լրատվության ոլորտում հնարավոր է պահպանել տարիների ընթացքում սահմանած նշաձողը, Թովմասյանը դրական պատասխան է տալիս: «Մարդը պետք է ունենա ցանկություն և նպատակ:

Մնացած ամեն ինչը տեխնիկայի հարց է: Պետք է քեզ համար ձևակերպես այդ սկզբունքները և հետևողականորեն պահպանես ու պաշտպանես»,- ընդգծում է օրաթերթի հիմնադիրը: Անդրադառնում ենք մեր օրերում ազատ և անկախ լրատվամիջոցների առկայության անհրաժեշտությանը, որոնք կարևոր դեր ունեն պետության կայացման գործում: «Խոսքի ազատությունն ինձ համար միշտ եղել է ամենափայփայված արժեքը, որովհետև խոսքի ազատության վրա են խարսխված շատ ու շատ երևույթներ և շատ ու շատ ձեռքբերումներ մեր նորանկախ հանրապետությունում: Պետք է հպարտությամբ ասել, որ ի դեմս «Ժողովուրդ» օրաթերթի և մի քանի այլ լրատվամիջոցների, իմ գործընկերների, մենք իսկապես Հայաստանում ունենք ազատ խոսք, ունենք ազատ մամուլ, և դա բառերով չի, որ ասվում է, դա կյանքի փորձության ընթացքում ձևավորված և ձևակերպված ճշմարտություն է: Ազատ մամուլի դերը շատ կարևոր է ցանկացած պետության մեջ, որովհետև ցանկացած քննադատություն քեզ օգնում է, որ շտկես քո սխալները և ճիշտ ճանապարհով գնաս:

Օրինակ՝ հիմա որպես պատգամավոր զգում եմ՝ ավելի շատ եմ կարևորում այն լրատվամիջոցների դերը, որոնք ինձ ընդդիմանում են, որոնք ինձ քննադատում են, ինձ ինչ-որ բաներ հիշեցնում: Սա ինձ ավելի է օգնում ճիշտ աշխատել, քան այն լրատվամիջոցները, որոնք մշտապես պատրաստակամ են միայն գովերգել, փառաբանել իմ աշխատանքը: Ես նախընտրում եմ առաջին կատեգորիայի հետ ավելի լավ աշխատել»,-եզրափակում է Թագուհի Թովմասյանը:

Հ.Գ.-«Փաստ» օրաթերթի և «Փաստ» լրատվական գործակալության ողջ անձնակազմը ջերմորեն շնորհավորում է «Ժողովուրդ» օրաթերթի 10-ամյակը: Մեր գործընկերներին մաղթում ենք անխաթար ու անխոչընդոտ ընթացք:

Լուսինե Առաքելյան

Մանրամասները՝ «Փաստ» օրաթերթի այսօրվա համարում