Դոնալդ Թրամփը Սպիտակ տանից հեռանալուց հետո «իրեն ավելի երջանիկ է զգում»

ԱՄՆ նախկին նախագահ Դոնալդ Թրամփը Սպիտակ տունը լքելուց հետո «իրեն ավելի երջանիկ է զգում», մասամբ այն պատճառով, որ սոցիալական ցանցերում չի գրում, ասել է քարոզարշավի հարցերով նրա նախկին օգնականը:

«Նախագահն ասաց, որ այժմ իրեն ավելի երջանիկ է զգում, քան երբեւէ»,- բրիտանական Sunday Times թերթին ասել է Թրամփի քարոզարշավի ռազմավար Ջեյսոն Միլլերը:

Twitter-ում, Facebook-ում եւ այլ սոցիալական ցանցերում Թրամփի հաշիվները արգելափակել էին այն բանից հետո, երբ հունվարի սկզբին նրա կողմնակիցները փորձել էին գրոհել Կապիտոլիումը: «Նա ասաց, որ սոցցանցեր չօգտագործելը եւ ատողների խմբերգ չլսելը իրականում լավ է»,- նշել է Միլլերը: «Առաջին տիկինը [Մելանյան] նույնպես համաձայն է դրա հետ: Նա ասաց, թե իրեն դուր է գալիս, որ նա շատ ավելի երջանիկ է եւ վայելում է դա»:

Այն բանից հետո, երբ Թրամփը լքել է Սպիտակ տունը, «վերջին տարիներին առաջին անգամ ես նրան իսկապես հանգիստ տեսա»։ «ԱՄՆ պատմության մեջ միայն 45 մարդ է զգացել, թե ինչ է նշանակում աշխարհն իրենց ուսերին տանել»:

Նրա խոսքով՝ Թրամփը «շատ քնքուշ պահեր» է ունեցել իր ընտանիքի հետ, երբ Վաշինգտոնից մեկնել է Ֆլորիդա նահանգի Մար-ա-Լագոյի իր հանգստավայր: «Զգացմունքները ընդգրկում են ամբողջ միջավայրը: Որոշ մարդիկ շատ տխուր են, որ այս օրը եկել է, բայց հպարտության զգացում կա, որ սա ԱՄՆ նախագահության պատմության մեջ ամենահաջողված առաջին ժամկետն էր»,- ասել է Միլլերը: