Միայն մանիպուլյացիա, սուտ և ուրիշ ոչինչ. «Փաստ»

«Փաստ» օրաթերթը գրում է

Հայաստանում իշխանափոխության պահանջը աստիճանաբար ավելի է ահագնանում։ Եվ ժամանակի ընթացքում առավել մեծ թվով մարդիկ են միանում Նիկոլ Փաշինյանի հեռացման օրակարգին։ Պատահական չէ, որ կառավարության հրաժարականի պահանջով գրեթե ամեն օր անհնազանդության տարբեր ակցիաներ և երթեր են տեղի ունենում։ Խնդիրն այն է, որ Փաշինյանը պատերազմից հետո հանրության շրջանում լիովին ասոցացվում է որպես պարտության, կապիտուլ յացիայի ու արյան սիմվոլ, ում՝ որպես պետության ղեկավարի առաքելությունը պետք է վաղուց ավարտված լիներ։ Դա պահանջում է հանրության մեծ մասը, նույնիսկ այն մարդկանցից շատերը, ովքեր պատերազմից առաջ Փաշինյանի մոլի ջատագովներն էին։

Փոխվել է նաև Փաշինյանի իշխանության նկատմամբ միջազգային հանրության վերաբերմունքը, քանի որ այն, սեփական օրակարգն առաջ տանելու հարցում իր մեջ ուժ գտնելու փոխարեն, անշեղորեն առաջ է շարժվում միայն թուրք-ադրբեջանական պահանջներին համապատասխան։ Ավելին՝ Ադրբեջանի նախագահ Ալիևը հրապարակային ձևով վիրավորում է Հայաստանի ղեկավարին, հայ ժողովրդի արժանապատվությունը ոտնահարող հայտարարություններ թույլ տալիս իրեն, սակայն Փաշինյանը նախընտրում է ոչ մի կերպ չարձագանքել նրան և անգամ Մոսկվայում ճաշել վերջինիս հետ։ Այլ կերպ ասած՝ Փաշինյանի կառավարությունը կորցրել է իր հեղինակությունը ոչ միայն հանրության շրջանում, այլև դիվանագիտական հարթակում և ի վիճակի չէ հավուր պատշաճի ներկայացնել մեր երկիրը բանակցային սեղանի շուրջ։ Տարածքային, մարդկային և նյութական կորուստները, ապա նաև կապիտուլ յացիոն հրադադարի ստորագրումը անդառնալի լուրջ հարված են հասցրել մեր պետականությանը։

Սրա արդյունքում է, որ երկրի կառավարումը և պետական ինստիտուտների գործունեությունը բարձիթողի վիճակում է հայտնվել, ինչի արդյունքում ավելի են խորանում մեր անվտանգային մարտահրավերներն ու սոցիալ-տնտեսական ճգնաժամը։ Հայաստանի՝ սահմանամերձ դարձած բնակավայրերի անվտանգության ապահովման հարցը լուծված չէ, իսկ տնտեսությունը կքել է պարտքային բեռի տակ։ Համատարած թանկացումների և եկամուտների նվազման ֆոնին քաղաքացիների մոտ գնալով արմատանում է արտագաղթի ուղին բռնելու մտայնությունը։ Եվ այսպիսի ազդակներից հետո էլ Նիկոլը շարունակում է կառչել աթոռին՝ ձևացնելով, թե իբր վայելում է հանրության աջակցությունը։ Սակայն եթե նախկինում քաղաքացիներն ամեն քայլափոխին ողջունում էին նրան, ապա այժմ նա քաղաքացիներից պատսպարվում է մեծ թվով անվտանգության աշխատակիցների ու հազարավոր ոստիկանների հետևում և ստիպված է լինում քայլել անվանարկող բղավոցների ներքո։

Դրանով է պայմանավորված, որ Փաշինյանը հարկադրված է իր «բարձր» վարկանիշի առկայությունը ցույց տալ քաղաքացիների հետ արհեստական հանդիպումներ բեմականացնելու միջոցով։ Ավելին, նա ուզում է ցույց տալ, թե իբր արտառոց բան չի եղել, դե, հիմա, բան էր, պատահեց... Դրա վառ վկայությունն է օրերս լրատվականներից մեկին Փաշինյանի տված հարցազրույցը, որով նա իբր պետք է փարատեր հանրության մտահոգությունները։ Ինչպես միշտ, այս անգամ ևս Փաշինյանի հարցազրույցն աչքի ընկավ մանիպուլ յացիաներով և իր ձախողումն արդարացնելու զուր ճիգերով, ու ամենակարևորը՝ ստերով: Ավելին, ամբողջ հարցազրույցի ընթացքում որևէ տրամաբանական միտք չհնչեց:

Վարչապետի աթոռից կառչած անձը փորձեց հերթական անգամ խուսափել պարտության պատասխանատվությունն իր վրա վերցնելուց և սահուն անցում կատարեց իր նախորդների կառավարման ժամանակաշրջանին՝ փորձելով հարց բարձրացնել, թե արդյո՞ք պարտությունը ծագել է իր կառավարման երկուսուկես տարվա արդյունքում, թե՞ դրա պատճառներն ավելի խորն են։ Պատահական չէ, որ վերջինս հիշատակեց, թե 7 շրջանների վերադարձը 1998 թվականից է եղել բանակցային գործընթացի նվազագույն պայմաններից մեկը։ Փաշինյանի խոսքը շատ նման էր տղեկի պահվածքին, որին փողոցում վիրավորել են, ու ինքը իբր պատասխանում է «սամ դուռակ» ոճով:

Մյուս կողմից՝ Նիկոլին հաջողվեց «քար նետել» նաև Ռուսաստանի բոստանը՝ կապված «Իսկանդերի» հետ, ինչին արդեն բավականին կոշտ արձագանքել են ոչ միայն ռուսական լրատվամիջոցները, այլև պաշտոնական շրջանակները՝ Փաշինյանին մեղադրելով ստախոսության մեջ: Մի խոսքով, հերթական անբովանդակ հարցազրույցը, որի շուրջ քննարկում ծավալելը կամ վերլուծություն կատարելը ոչ միայն անիմաստ է, այլև վիրավորական: Պատահական չէ, որ քաղաքացիների գերակշռող մասի մոտ Փաշինյանի հարցազրույցը ասոցացվում է «հաղթելու ենք» կարգախոսի վերջին ակորդի հետ, քանի որ «Իմ քայլի» ձևավորած կառավարությունը վաղուց այլևս սպառել է իրեն։

Մանրամասները՝ «Փաստ» օրաթերթի այսօրվա համարում