Ինչպիսի՞ն կլիներ Բարբի տիկնիկը, եթե իրական մարդ լիներ. «Փաստ»

«Փաստ» օրաթերթը գրում է

Դժվար է պատկերացնել, բայց Բարբի տիկնիկն արդեն ավելի քան... 60 տարեկան է: 1959 թվականին Էլիոտ և Ռութ Հենդլեր ամուսնական զույգը մշակել և ստեղծել է առաջին տիկնիկը, որն ի վերջո դարձել է միլիոնավոր երեխաների սիրելի խաղալիք: Այն զգալիորեն տարբերվել է նախկինում տիկնիկների շուկայում եղածից: Սկսենք նրանից, որ տիկնիկն արդեն փոքրիկ աղջնակ չէր, այլ սև-սպիտակ լողազգեստով շիկահեր մեծահասակ աղջիկ: Առաջին Բարբին շուկայում հայտնվել է 1959 թվականին Նյու Յորքում։ Տիկնիկը հիմնականում մշակել է Էլիոթ Հանդլերը, որը աշխատել է իր ամուսնուն պատկանող «Mattel» ընկերությունում։

Ենթադրվում է, որ տիկնիկի նախատիպ է դարձել էրոտիկ դերասանուհի Բիլդ Լիլլին, որի լուսանկարը հրատարակվել է «Bild Zeitung» (Գերմանիա) թերթում։ Լիլլիի պատկերով Բարբի տիկնիկները վաղ մոդելներն են։ Առաջին Բարբիի արժեքը եղել է ընդամենը 3 դոլար։ Նա ունեցել է սև ու սպիտակ գծավոր լողազգեստ (տիկնիկի հագուստները վաճառվել են առանձին), շեկ մազեր ու սև աչքեր։ Հանդլերի խոսքերով, իր աղջիկը՝ Բարբարան (որի անունով էլ կոչվել է Բարբի տիկնիկը), իր մանկության տարիներին հաճախ է տիկնիկներով խաղացել իր ընկերների հետ։ Բարբարան տիկնիկների համար հագուստներ է պատրաստել թղթից, տիկնիկին մե՛րթ դարձրել է աղջիկ, մե՛րթ գործարար կին, մե՛րթ մայրիկ։ Հաստատ զգացվել է նման տիկնիկների անհրաժեշտությունը, որոնք կարող էին ծանոթացնել պատանի աղջիկներին իրենց համար այդքան հաճելի հասուն կյանքի շատ կողմերի հետ։

Բարբի տիկնիկի տեսքը տարիների ընթացքում փոխվել է. եթե առաջին Բարբին բավական հասուն կին էր, ապա 1960-ականների վերջերին տիկնիկը դարձել է դեռահաս աղջիկ։ 1960-ականներին Բարբին ձեռք է բերել նաև «Երազանքի տուն», մեքենա։ 1961 թվականին թողարկվել է Բարբի երգչուհի տիկնիկը, Բարբի բուժքույր տիկնիկը, 1965 թվականին՝ Բարբի տիեզերագնաց (որպես առաջին ամերիկացի կին տիեզերագնաց) տիկնիկը, 1966 թվականին՝ Բարբի բորտուղեկցորդուհի տիկնիկը, 1991 թվականին՝ Բարբի նախագահի թեկնածու տիկնիկը և այլն։ Իսկ 1980 թվականին «Mattel» ընկերությունը ներկայացրել է «Տիկնիկների աշխարհ» հավաքածուն, որը ներառել է ավելի քան 20 Բարբի տիկնիկ՝ տարբեր երկրների տարազներով։ Բարբի տիկնիկի բարձրությունը 29 սմ է։ Եթե Բարբին լիներ մարդ, նրա հասակը կլիներ 170 սմ, քաշը՝ 50 կգ, չափսերը՝ 99։45։84։

Բարբի ստեղծողները հաճախ մեղադրում են մարդկանց, որ դիետա են պահում, կատարում պլաստիկ վիրահատություններ Բարբի տիկնիկին նմանվելու համար, որը նրանք համարում են անբնական գեղեցկություն, և որը շատերի համար դարձել է ցանկալի ստանդարտ։ Օրինակ՝ ամերիկացի Սինդի Ջեքսոնը կատարել է 55 պլաստիկ վիրահատություն Բարբիին նմանվելու համար։ Այդ իսկ պատճառով 2000 թվականին Բարբի տիկնիկի տեսքը որոշակիորեն փոխվել է։ Այժմ Բարբի տիկնիկների տեսականին շատ լայն է, կան բազմաթիվ մոդելներ։ Բացի դա, Բարբին արդեն նկարահանվում է բազմաթիվ մուլտֆիլմերում և անիմացիոն ֆիլմերում։ Իսկ 1959 թվականին արտադրված առաջին Բարբի տիկնիկներից մեկը վերջերս վաճառվել է ավելի քան 10 հազար ամերիկյան դոլարով:

Կամո Խաչիկյան

Մանրամասները՝ «Փաստ» օրաթերթի այսօրվա համարում