«Կամազի» վարորդը չէր կարող գերազանցել արագությունը. Գյումրիի ողբերգական վթարի գործ

Երեւան-Գյումրի ավտոճանապարհին 2014թ. նոյեմբերին տեղի ունեցած ողբերգական ավտովթարի մասնակից «Կամազ» մակնիշի ավտոմեքենան չէր կարող առավելագույն արագությունը գերազանցել։ Գործով դատական հերթական նիստին Շիրակի մարզի ընդհանուր իրավասության դատարանում նման համոզմունք հայտնեց ավտոմեքենայի սեփականատեր «Իմեքս գրուպի» տրանսպորտի բաժնի պետ Հովհաննես Հարությունյանը։

Վկան դատարանին վստահեցրեց, որ ընկերության ուսումնասիրությունների արդյունքում պարզվել է, որ Երեւան–Գյումրի երթուղի իրականացնող «Գազել» մակնիշի ավտոմեքենան ընթացել է 110 կամ ավելի արագությամբ եւ գրեթե արգելակման համակարգից չի օգտվել. այս եզրահանգմանը եկել են` ելնելով «Կամազ» մակնիշի հենասահքի ծռվածության աստիճանից:

Ըստ վկայի, «Կամազ» մակնիշի ավտոմեքենայի տեխնիկական հնարավորությունները թույլ չէին տա վարորդին մեծ արագությամբ ընթանալ։ Բացի այդ, Հովհաննես Հարությունանը ասաց, որ ճանապարհային երթեւեկության նշաները տվյալ ճանապարահատվածում սխալ տեղում են տեղադրված:

«Այդ վթարը երկկողմանի սխալի արդյունք է, չէր կարող միակողմանի սխալի արդյունքում նման ավերածություն լինել, բացի այդ, նախկինում էդ ստոպի նշանները դրված էին այնպես, որ կանգնես, չկանգնես` մեկ ա, եթե այս կողմում պատ է ամբողջությամբ։ Եթե էդ մարդը կանգներ մի քիչ ներքեւ, մի քիչ մեջտեղ, մեկ ա` չէր տեսնի, պատը խանգարում էր տեսանելիությանը»,–ասաց վկան:

Վկայի ցուցմունքից «Գազել» մակնիշի վարորդ՝ Ռազմիկ Մկրտչյանի դուստրը վրդովվեց, նա «Իմեքս գրուպի» ներկայացուցչից հետաքրքրվեց, թե այդ դեպքում ինչու է «Կամազ» մակնիշի մեքենան հայտնվել դաշտի մեջ:

Հովհաննես Հարությունյանը վստահեցրեց, որ մեքենան դաշտում հայտնվել է , քանի որ վարոդն այն դուրս է բերել անվտանգ գոտի:

Դատական նիստին հարցաքննվեցին նաեւ «Գազել» մակնիշի ուղեւորներ Ալբերտ Շահնազարյանն ու Ալինա Ալոյանը, որոնք մինչեւ ավտովթարը` Մարալիկ քաղաքի ճանապարհին իջել են մեքենայից է: Ալինա Ալոյանը նշեց, որ մինչեւ Մարալիկ մեքենան շարժվել է նորմալ արագությամբ։

Դատական հաջորդ նիստը կկայանա հուլիսի 2-ին:

Ինչպես ավելի վաղ հաղորդել էր NEWS.am-ը, 2014թ. նոյեմբերի 10-ի երեկոյան՝ ժամը 19։15-ի սահմաններում, խոշոր ավտովթար է տեղի ունեցել Շիրակի մարզում. Երեւան-Գյումրի ավտոճանապարհի` Հոռոմ գյուղի խաչմերուկում մարդատար «Գազել» մակնիշի ավտոմեքենան բախվել է «Կամազ» մակնիշի բեռնատարին, ինչի հետեւանքով «Գազելը» պայթել է։ Նախնական տեղեկություններով՝ վթարի պահին «Գազելի» մեջ եղել է 14 ուղեւոր, որոնցից 7-ը տեղում մահացել են, իսկ 7-ը՝ տեղափոխվել բժշկական կենտրոն։ Փաստի առթիվ Շիրակի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի՝ 242-րդ հոդվածի 3-րդ մասի հատկանիշներով։ «Գազելին» բախված «Կամազ» մակնիշի բեռնատարի վարորդը՝ Մ.Վարդանյանը, կալանավորված է: