«32 տարեկան եմ, բայց միշտ 20-22 տարեկան աղջիկների կերպարներ եմ կերտել». Անուշկա Մարգարյանը՝ բացասական կերպարների, քննադատությունների և այլ ձևաչափում ներկայանալու ցանկության մասին

Դերասանուհի Անուշկա Մարգարյանն այս շրջանում նկարահանվում է «Սարի աղջիկ» հեռուստասերիալում: Tert.am Life-ի հետ զրույցում դերասանուհին խոսել է հիմնականում բացասական դերեր մարմնավորելու, քննադատությունների, տարիների ընթացքում հեռուստադիտողների փոփոխված պահանջների և իր տարիքից ավելի փոքր երևալու մասին:

Անուշկայի խոսքով՝ «Սարի աղջիկ» հեռուստասերիալում իր դերն առանձնանում է, որովհետև դրական կերպար է:

«Նախկինում, կարելի է ասել, մարմնավորել եմ միայն բացասական կերպարներ: Անկեղծ ասած, չգիտեմ՝ ինչո՞վ էր պայմանավորված, որ ինձ բացասական կերպարներ էին վստահում, բայց ես չեմ դժգոհել, բացասական կերպարներն ավելի խաղարկային ու հետաքրքիր են: Դրանք մարմնավորելն ավելի բարդ է, որովհետև ասելիքն ավելի շատ է: Դրական կերպարի դեպքում աշխատելու գրեթե ոչինչ չկա, իսկ բացասական կերպարներն ավելի դաստիարակչական են: Չար մարդիկ պետք է տեսնեն, որ իրենք, միևնույն է, պատժվում են: Իհարկե, դրական կերպարներ ևս պետք է ունենալ, չես կարող միայն բացասականները մարմնավորել, ուղղակի բացասական կերպարների վրա մարդկանց ուշադրությունն ավելի է կենտրոնանում: Մարդիկ ուզում են հասկանալ՝ ի՞նչ է վերջում լինելու, կերպարի գիծն ինչպե՞ս է ավարտվելու»,- ասաց նա:

Ըստ դերասանուհու՝ որքան էլ դրսում իրեն տեսնելիս մարդկանց առաջին արձագանքն այն է, որ իրականում այլ մարդ է, դա չի նշանակում, որ իրեն բացասական լույսի ներքո են ընկալում: «Եթե տարիներ առաջ մարդիկ կարող էին կերպարը նույնացնել դերասանի հետ, հիմա հասկանում են՝ ուղղակի կերպար է, դու էլ կերտում ես այն: Հիմա նաև փոխվել են հեռուստադիտողների պահանջները, շատացել են քննադատությունները: Դա դարձել է ուշադրություն գրավելու տարբերակ, վիրուսի պես տարածվում է: Իհարկե, խոսքը ոչ թե խորհուրդների, նկատառումների, այլ բացասական քննադատությունների մասին է: Եթե հեռուստադիտողը նկատում է, որ ինչ-որ բան այնպես չէ, կարելի է փոփոխություններ անել, բայց եթե դա արվում է դերասանին վիրավորելու միտումով, հեռուստադիտողն ուղղակի ուզում է ինքնահաստատվել»,- նշեց նա:

Շուրջ 8 տարի լինելով սերիալարտադրության ոլորտում՝ դերասանուհին ընդգծեց, որ ոչ միայն այնտեղ, այլև ցանկացած ոլորտում շատ բան բյուջեից է կախված:

«Երբ կատարում ես փոքր ներդրում, մտածում ես փոքր բաների մասին, իսկ մեծ ներդրումների դեպքում կարող ես երազել մեծ նախագծերի մասին: Մենք ունենք լավ սցենարիստներ, ռեժիսորներ, օպերատորներ, եթե գումարը մի փոքր շատ լինի, կարող ենք ավելի որակյալ արտադրանք տալ: Ցավոք, ստիպված ենք տեղավորվել այն ամենի մեջ, ինչ մեզ հատկացվում է: Որակի մասին խոսելիս պետք է հաշվի առնել համեմատությունը: Եթե ոլորտը համեմատենք տարիներ առաջվա հետ, աճ է գրանցվել, իսկ եթե համեմատենք արտասահմանյան շուկայի հետ, ավելի լավ է լռեմ: Հեռուստադիտողները, տեսնելով արտասահմանյան սերիալները, շատ դեպքերում ցանկանում են նման սերիալներին մի փոքր մոտ սերիալներ տեսնել: Բնականաբար լավ է, որ հեռուստադիտողը ցանկանում է ավելի լավը տեսնել, մենք ունենք այն, ինչ պահանջում է հեռուստադիտողը: Ուղղակի կա հեռուստադիտողի մի զանգված, որը կենցաղ վիճակից դուրս չի եկել, սերիալը պետք է նաև համապատասխանի իրենց, որ դիտեն»,- ասաց Անուշկան:

Նա նկատեց, որ այս տարիների ընթացքում մեծ դադար ունեցել է ընդամենը մեկ անգամ, թեև յուրաքանչյուր նախագծից հետո փոքրիկ դադարներ ունենում է: «Նախագծից նախագիծ անցելը բարդ է, ժամանակ է պետք, որ հաջորդ սերիալում չանես այն, ինչ նախորդում: Սա իմ աշխատանքն է, որը շատ եմ սիրում, խոչընդոտներն էլ սիրով փորձում եմ հաղթահարել: Իհարկե, այլ ձևաչափում ներկայանալու ցանկություն ունեմ, բայց ի՞նչ կարող եմ անել, ամեն ինչ առաջարկներից է կախված»,- անկեղծացավ դերասանուհին:

Անուշկան նաև ասաց, որ իրեն իր տարիքից փոքր են ընկալում, բայց դա չի խանգարում: «32 տարեկան եմ, բայց միշտ ինձնից փոքր՝ 20-22 տարեկան աղջիկների կերպարներ եմ կերտել: Հաճելի է, որ իմ տարիքից փոքր եմ երևում, պահվածքով, հոգով երեխա եմ, բայց ոչ երբեք մտքով: Չեմ կարող ասել՝ երեխա՞ եմ, թե՞ մեծ, իմ մեջ մինչև 32-ը բոլոր տարիքները կան: Երբ մարդիկ իմանում են, թե քանի տարեկան եմ, առաջին արձագանքը շոկային է լինում»,- եզրափակեց նա: