Հայաստանում օրգանական գյուղատնտեսությունը զարգացման մեծ հեռանկարներ ունի

 ՀՀ գյուղատնտեսության նախարարությունն արդեն մի քանի տարի է ուսումնասիրություններ է անցկացնում, որպեսզի ընտրվեն արժեքային գյուղատնտեսության զարգացման ճյուղեր, որոնք աճի մեծ պոտենցիալ ունեն և նպատակաուղղված կլինեն գյուղական վայրերում ավելի արդյունավետ գյուղատնտեսական պրակտիկաների իրականացմանը: Այդ ուղղություններից մեկը օրգանակ ան գյուղատնտեսություն է: Լրագրողների հետ զրույցում այս մասին ասաց ՀՀ ԳՆ փոխնախարար Արմեն Հարությունյանը:

Փոխնախարարը  նշեց, որ գյուղատնտեսության նախարարությունը ԵՄ գրասենյակի և Ավստրիայի զարգացման գործակալության հետ համատեղ ներկայացրել է օրգանական գյուղատնտեսության զարգացման ծրագիրը, որն ունի չորս հիմնական բաղադրիչ, որոնցից առաջինն ուղղված է օրենսդրական դաշտի բարեփոխումներին և համապատասխան ինստիտուների ստեղծմանը:

«Երկրորդ բաղադրիչը դրամաշնորհների միջոցով գյուղացիական տնտեսությունների և ագրոբիզնեսների շրջանում օրգանական գյուղատնտեսությամբ զբաղվող ցանկացողներին դրամաշնորհների, տեխնիկական, ֆինանասական օժանդակություն տրամադրելն է: Երրորդ բաղադրիչն  իրազեկման բարձրացումն է, քանի որ մենք նաև համապատասխան աշխատանքներ պետք է իրականացնենք իրազեկման ուղղությամբ, որպեսզի մեր սպառողները ևս հասկանան օրգանական գյուղատնտեսության և օրգանական ապրանքների առավելությունները»,- ասաց նա` հավելելով, որ ծրագրի վերջին՝ չորրորդ բաղադրիչն ուղղված է լինելու արտահանման շուկաների բացահայտմանն ու օրգանական ապրանքների արտահանմանը:

Հարությունյանի խոսքով` ծրագրի շրջանակներում օրգանական գյուղատնտեսության զարգացման համար, մասնավորապես, օգտագործվելու է Եվրոպական երկրների փորձը, քանի որ այսօր հիմնական օրգանական մթերք արտադրողները  ԵՄ-ում են: Փորձ կարվի ուսումնասիրելու նաև ամերիկյան օրգանական գյուղատնտեսությունը:

Փոխնախարարը նշեց, որ ուսումնասիրություններ են իրականացվելու այն վայրերում որտեղ օրգանական գյուղատնտեսության համար նպաստավոր պայմաններ կան: Այն տեղերում, որտեղ իրականացվում է ծանր արդյունաբերական գործունեություն, դժվար թե հնարավոր լինի զարգացնել օրգանական գյուղատնտեսությունը:

«Վայրի պայմաններում շատ մեծ հնարավություն ունենք օրգանական գյուղատնտեսությունը զարգացնելու համար, քանի որ ավանդական գյուղատնտեսությունից օրգանական գյուղատնտեսությանն  անցնելու համար պահանջվում է 3  տարի, իսկ վայրի գյուղատնտեսության պայմաններում անհրաժեշտ է ընդամենը մեկ տարի: Հնարավորությունները շատ են, բայց անհրաժեշտ է լուրջ ուսումնասիրություն»,- հավելեց նա:

Հարությունյանն ասաց, որ Ավստրիայի զարգացման գործակալության և ԳՆ-ի համատեղ հետազոտությունները ցույց են տալիս, որ Հայաստանի բոլոր մարզերում հնարավոր է զբաղվել օրգանական գյուղատնտեսությամբ:

ԵՄ պատվիրակության ղեկավար, դեսպան Պյոտր Անտոնի Սվիտալսկին ասաց, որ Հայաստանում ԵՄ գրասենյակը և Ավստրալիայի զարգացման գործակալությունը լայանածավալ աջակցություն են ցուցաբերում, որի ծավալներն ավելանալու միտում ունեն:

«Աջակցության համար ընտրել ենք երկու ուղղություն` առաջինը մենք հավատում ենք, որ Հայաստանի գյուղատնտեսությունն ունի աճի գործոն, ինչի շնորհիվ ՀՆԱ-ի աճ է գրանցվում: Գյուղատնտեսությունը Հայաստանի համար պետք է շարժիչ ուժ լինի», ասաց դեսպանը՝ հավելելով, որ  երկրորդը սոցիալական համերաշխությունն է: Աջակիցների նպատակն է՝ օգնել Երևանի և Հայաստանի մարզերի միջև տարբերությունների վերացմանը: Ըստ դեսպանի`նկատելի է, թե որքան ֆինանսական տարբերություն կա մարզերի ու Երևանի միջև:

Սվիտալսկու խոսքով՝ Հայաստանը մաքուր երկիր է, արտադրությունը լուրջ ներուժ ունի, այստեղ կարելի է ստեղծել օրգանական արտադրանք: Բարդն արտադրանքը վաճառքի համար արտաքին շուկա գտնելն է:

Հայաստանում գյուղատնտեսությունը հանդիսանում է զբաղվածության հիմնական աղբյուրը և կազմում ՀՆԱ-ի մոտ 20 տոկոսը: Երկիրն ունի օրգանական գյուղատնտեսական արտադրանքի մեծ ներուժ, որը զգալիորեն կարող է նպաստել գյուղական կենսակերպի բարելավմանը:
Օրգանական գյուղատնտեսությունը  գյուղատնտեսական աշխատանքների իրականացման հատուկ մեթոդների համալիր է, որի շրջանակներում նվազագույնի էհասցվում սինթետիկ պարարտանյութերի, պեստիցիդների, բույսերի աճի խթանիչների , կերային հավելումների օգտագործումը եւ կիրառվում են հողի մշակմանառավելագույնս բնական եղանակներ։