«Ի հայտ եկած թերությունների վերացման համար սահմանվում է ժամկետ՝ հաշվի առնելով եղանակային պայմանները»․ «Փաստ»

«Փաստ» օրաթերթը գրում է

Մեր նախորդ համարի «Ասֆալտ կար, ասֆալտ չկա» վերտառությամբ նյութում անդրադարձել էինք երկրի ողջ տարածքում կատարված «աննախադեպ» ասֆալտապատման աշխատանքներին, գրել էինք այն մասին, որ հանրապետության բազմաթիվ ճանապարհներ խայտառակ վիճակում են, կարծես պատերազմն այդ ճանապարհներին է եղել, այն աստիճանի քարուքանդ են դրանք։ Ընդ որում, խոսքը նաև 2019-2020 թվականներին «փռված» ասֆալտի մասին է: Ավելի վաղ «Փաստը» ճանապարհների ասֆալտապատման վերաբերյալ մի քանի հարցով դիմել էր տարածքային կառավարման և ենթակառուցվածքների նախարարություն, որտեղից միայն վերը նշված նյութի հրապարակումից հետո (ժամկետների խախտմամբ) ստացել ենք մեզ հուզող հարցերի պատասխանները։

Մասնավորապես՝ հետաքրքրվել էինք, թե նախարարությունն ուսումնասիրություններ կատարո՞ւմ է ասֆալտապատման աշխատանքների հետ կապված, արդյո՞ք թերությունների ի հայտ գալուց հետո որոշակի պահանջներ ներկայացվում են ընկերություններին, որոնք, հաղթելով մրցույթներում, իրականացրել են այդ աշխատանքները։ Խնդրել էինք պարզաբանել նաև, թե ինչ պատասխանատվության են ենթարկվում կապալառու ընկերությունները թերի աշխատանքի համար։ «Ճանապարհային դեպարտամենտ» ՊՈԱԿ-ը պատասխանել է մեր հարցադրումներին։ Նշել են, որ իրենց ՊՈԱԿ-ի մասնագետների կողմից պարբերաբար կատարվում է Հայաստանի միջպետական և հանրապետական նշանակության ավտոճանապարհների վիճակի ուսումնասիրություն։

«Ճանապարհների շահագործման, նորոգման, պահպանության աշխատանքները կարգավորվում են օրենքով։ Մասնավորապես՝ «Ավտոմոբիլային ճանապարհների մասին» ՀՀ օրենքի 7-րդ հոդվածի 3-րդ մասի համաձայն՝ ընդհանուր օգտագործման պետական ավտոմոբիլային ճանապարհների և դրանց ճանապարհային երթևեկության կազմակերպման կահավորանքի շինարարության (տեղադրման), շահագործման, նորոգման ու պահպանման աշխատանքներն իրականացնում են «Գնումների մասին» օրենքի համաձայն ընտրված կապալառու կազմակերպությունները՝ առնվազն 18 ամիս սպասարկման ժամկետով։ Կառավարության 2017 թվականի մայիսի 4-ի թիվ 526-Ն որոշման հավելվածի 1-ի 33-րդ կետի 6-րդ ենթակետով, ինչպես նաև պատվիրատուի և կապալառուի միջև կնքվող պետության կարիքների համար կապալային աշխատանքների կատարման պետական գնման պայմանագրերով սահմանված է, որ եթե շինարարական ծրագրերի կատարման արդյունքի կամ դրա առանձին բաղադրիչի համար սահմանված երաշխիքային ժամկետի ընթացքում ի հայտ են եկել կատարված աշխատանքների թերություններ, ապա կապալառուն պարտավոր է իր հաշվին պատվիրատուի կողմից սահմանված ողջամիտ ժամկետում վերացնել թերությունները։Վերը նշված պայմանագրերով հստակ սահմանվում են պատվիրատուի և կապալառուի իրավունքներն ու պարտականությունները, այդ թվում՝ երաշխիքային ժամկետում աշխատանքի արդյունքի թերությունների հետ կապված պահանջ ներկայացնելու պատվիրատուի իրավունքը»,-նշել են ՊՈԱԿ-ի պատասխանի մեջ՝ հավելելով, որ պատվիրատուն ասֆալտապատման աշխատանքների արդյունքում ի հայտ եկած թերությունների վերացման համար ողջամիտ ժամկետը սահմանում է՝ հիմք ընդունելով հայտնաբերված թերությունների վերացման համար անհրաժեշտ բարենպաստ եղանակային պայմանները։ ՊՈԱԿ-ից ընդգծում են, որ ճանապարհների ընթացիկ ձմեռային պահպանման ժամանակաշրջանի ընթացքում ճանապարհների ծածկի քայքայումն ավելի ինտենսիվ է ընթանում, ինչի հետևանքով գարնանն առաջանում է մեծ ծավալի փոսային նորոգման աշխատանքներ կատարելու անհրաժեշտություն։

«Ավելին, ձմեռային ժամանակաշրջանում հաճախ առաջանում են նաև անհամեմատ փոքր ծավալի փոսեր, որոնք նորոգվում են ըստ անհրաժեշտության։ Ելնելով կատարվելիք աշխատանքների մեծ ծավալից և գարնանային անձրևների հաճախականությունից՝ փոսային նորոգման աշխատանքները կարող են իրականացվել մինչև մայիսի վերջ»։ Կրկին մեջբերում են «Ավտոմոբիլային ճանապարհների մասին» օրենքի 7-րդ հոդվածի 3-րդ մասը, որի համաձայն ընդհանուր օգտագործման պետական ավտոմոբիլային ճանապարհների և դրանց ճանապարհային երթևեկության կազմակերպման կահավորանքի շինարարության (տեղադրման), շահագործման, նորոգման ու պահպանման աշխատանքներն իրականացնում են «Գնումների մասին» օրենքի համաձայն ընտրված կապալառու կազմակերպությունները՝ առնվազն 18 ամիս սպասարկման ժամկետով։

«Հաշվի առնելով այս հանգամանքը և այն, որ ընթացիկ ձմեռային պահպանման ժամանակաշրջանն ավարտվել է ապրիլի 1-ին, իսկ ձմռան ժամանակահատվածի ավարտից հետո ճանապարհների վիճակի ուսումնասիրությունները չեն ավարտվել, ուստի 2019, 2020 թվականների ճանապարհների սպասարկում իրականացնող կազմակերպությունների կողմից պայմանագրերով նախատեսված պարտականությունների չկատարման կամ թերի կատարման ծավալների, նրանց նկատմամբ պատասխանատվության միջոցներ նախատեսելու վերաբերյալ տեղեկատվություն կարող ենք տրամադրել ուսումնասիրություններն ավարտելուց հետո»,-ասված է հարցման պատասխանի մեջ։

Լուսինե Առաքելյան

Մանրամասները՝ «Փաստ» օրաթերթի այսօրվա համարում