«Ինչո՞ւ պետք է մնամ Հայաստանում և հանդուրժեմ ինձ հալածող հայերի պահվածքը». Մագան՝ Տիկ-տոկի թրենդի համար մազերը ներկելու ու փիրսինգ անելու, վատ մեկնաբանությունների և երկիրը լքելու ցանկության մասին

Տիկտոկեր Մագա Հարությունյանը թեև մինչև հավելվածում գրանցվելը հասցրել էր նկարահանվել մի քանի նախագծում, լսարանին հայտնի դարձավ Տիկ-տոկի շնորհիվ: Նախկինում Մագան իր էջում, հիմնականում, հումորային տեսանյութեր էր տեղադրում, ուներ շուրջ 90.000 հետևորդ, հիմա նա փոխել է էջի կոնտենտը, հետևորդների թիվն էլ ավելացել է՝ դառնալով ավելի քան 271.000:

Tert.am Life-ի հետ զրույցում Մագան պատմել է կոնտենտը փոխելու պատճառի, Տիկ-տոկի թրենդի համար մազերը ներկելու և փիրսինգ անելու, իր հասցեին վատ մեկնաբանությունների և երկիրը լքելու ցանկության մասին:

Մագայի խոսքով՝ հետևորդների թիվն աճել է, երբ սկսել է կոնտենտն ամերիկյան ոճով մատուցել, որը, իր կարծիքով, որակյալ է:

«Նախկինում տեսանյութերս, հիմնականում, հումորային բնույթի էին, դրանք նկարահանում էի «Կիսաբաց լուսամուտներ» հաղորդման հատվածների ձայներով: Եկավ մի պահ, երբ հասկացա՝ այդ ձևաչափն իրեն սպառել է, ինձ դուր են գալիս թրենդային ոճի տեսանյութեր, նաև ուզում էի մեծացնել լսարանս: Հիմա հետևորդներիս մեծ մասը շարունակում են մնալ հայեր, բայց տեսանյութերս դիտում են նաև Ռուսաստանում, Վրաստանում և այլ երկրներում,- ասաց նա և հավելեց, որ արտասահմանյան ոճը ենթադրում է պարային թրենդներ, որոնք հասանելի են բոլորին,- Ինձ մոտ, կարծում եմ, ստացվել է արտասահմանյան ոճով տեսանյութեր նկարահանել: Նախկինում ուղղակի մեկ կադրով հումորային տեսանյութեր էի նկարահանում, հիմա անցումներ ստանալու համար բավականին ժամանակ եմ ծախսում»:

Մագան վերջին ամիսներին մի քանի ոճափոխություն է արել. նախ՝ մազերի մի հատված ներկել է կապույտով, հետո կանաչով, ապա վարդագույնով: «Տիկ-տոկի թրենդի համար մազերս ներկեցի և փիրսինգ արեցի: Իրականում փիրսինգ անելու մասին նախկինում չէի մտածել, բայց ցանկանում էի մազերիս հետ կապված կտրուկ ոճափոխություն անել: Թրենդի բնույթն այն էր, որ պետք է հանձնարարություններ անես՝ փոխես մազերիդ գունը, փիրսինգ անես, նոր հագուստ, հեռախոս գնես և այլն: Ամեն տեսանյութում կատարում ես մի հանձնարարություն: Մազերիս դիմացի հատվածի մի մասը սկզբում կապույտ էի ներկել, հետո այնքան հավանեցի այդ ձևը, որ ներկեցի այլ գույներով: Կարծում եմ՝ այսպես ավելի տարբերվող եմ: Զարմանում եմ այն մարդկանցից, որոնք իրենց իրավունք են վերապահում քննադատել, թե մազերս ինչ գույնով եմ ներկել կամ ինչու եմ քթի պլաստիկ վիրահատության դիմել: Այդպես եմ ճիշտ գտել, այդպես եմ արել, ոչ ոքի իմ արածը գնահատելու կամ թերագնահատելու իրավունք չեմ տվել, թող նայեն, լայքեն կամ ոչ»,- ասաց նա:

Ըստ տիկտոկերի, երբ Հայաստանում որևէ ոլորտում հաջողություններ ես ունենում, բոլորը սկսում են քեզ «հեյթ» անել: «Ովքեր քեզնից մի փոքր հետ են մնում, փորձում են քննադատել, ասել, որ սխալ ես, բայց ուզում եմ ասել՝ ապրեք ձեր կյանքով: Մի անգամ ծխախոտ էի գովազդել, ինչը մեծ արձագանք ստացավ, բայց թող ամեն մեկն իր ու իր ընտանիքի անդամների մասին մտածի: Եթե նույնիսկ ծխախոտ եմ գովազդում, դա անում եմ հետաքրքրվող մարդկանց համար, նրանք, ամեն դեպքում, ծխող են: Ասում են՝ երեխաներն են դիտում տեսանյութը, բայց երեխաներին ծխախոտ չեն վաճառում և հետո, իմ գովազդած ծխախոտը բավականին թանկ էր, եթե երեխան ունի դա գնելու հնարավորությունը, ուրեմն՝ ծնողի թերացումն է: Ինքս էլ տանը փոքր քույր, եղբայր ունեմ, բայց գիտեմ, որ նման գովազդները նրանց վրա չեն անդրադառնա, որովհետև դաստիարակված են: Ես գումար եմ վաստակում, թող նրանք էլ ինձ վատ բաներ ասելու փոխարեն իրենց երեխաներին բացատրեն,ինչպես ես կարող եմ բացատրել քրոջս ու եղբորս: Այդ նույն երեխաների կողմից Տիկ-տոկում այնպիսի բաներ են կատարվում: Շատ երեխաներ այնպիսի մեկնաբանություններ են գրում, որ զարմանում ես։ Նրանք իրենց ծնողների հայելին են: Միշտ ասում եմ՝ թող հետևորդներս 50.000-ով կրճատվեն, միայն թե ինձ երեխաներ չդիտեն, բայց խնդիրն իմ մեջ չէ, չեմ նկարահանում այնպիսի տեսանյութեր, որոնք կվնասեն երեխաներին: Նույն ծխախոտն այդ երեխաների տանը հայրիկը, պապիկը, շատ դեպքերում նաև մայրիկն են ծխում»,– ասաց նա։

Մագան շեշտեց, որ բացասական բնույթի մեկնաբանություններ է ստանում նաև տոպով կամ թափանցիկ հագուստով տեսանյութեր, լուսանկարներ տեղադրելիս:

«Եթե տոպով կամ թափանցիկ հագուստով լուսանկարներ եմ տեղադրում, չի նշանակում, որ անբարոյական եմ, բայց ինձ վատ մեկնաբանություններ են գրում: Նույնն անում են ռուս, արտասահմանցի բլոգերները, տիկտոկերները, բայց նրանց նման մեկնաբանություններ չեն գրում: Գրում են՝ հայ եմ, ինչ ձևով եմ հագնվում, բայց որտեղ է գրված, որ հայ է, չպետք է այդպես հագնվի,– ասաց նա և հավելեց, որ վատ մեկնաբանություններից հետո երբևէ չի մտածել լուսանկարները ջնջելու, այդպես չհագնվելու մասին, որովհետև վատ մեկնաբանությունների կողքին եղել են նաև լավերը։ –Այնպես չէ, որ մեկնաբանությունները միայն վատն են, ուրախ եմ, որ կան նաև լավ մարդիկ, ուղղակի վատ մեկնաբանություններ գրողներն իրենց շատ են ցույց տալիս: Եվ հետո, ես ամեն ինչ ի սկզբանե անում եմ ինձ համար, միայն դրանից հետո այն մարդկանց, ում դուր է գալիս իմ կոնտենտը»:

Տիկտոկերն ընդգծեց, որ այս ամենից հետո Հայաստանից գնալու և այլ երկրում բնակություն հաստատելու ցանկություն ունի, բայց դեռ չգիտի, թե ուր կգնա:

«Այս ամենից հետո էլ կասեն՝ մեկը կայանում է, գնում է այլ երկիր, իսկ ինչո՞ւ չգնա: Հիմա մտածում եմ որոշ ժամանակ հետո Հայաստանից գնալու մասին, իմ աշխատած գումարն այլ երկրում կծախսեմ: Ես Հայաստանը շատ եմ սիրում, խնդիրը դա չէ, ուղղակի հասկանում եմ՝ իմ ծավալած գործունեության համար վատ արձագանք եմ ստանում: Անձնական բնույթի վիրավորանքներ են գրում, ընդհուպ մինչև բարոյականությանս վերաբերող: Եթե դուր չեմ գալիս, թող չդիտեն, թող այնպես անեն, որ իմ տեսանյութերն ընդհանրապես իրենց էջերում չհայտնվեն: Ես սա խոսում եմ շատ տիկտոկերների անունից, միայն իմ դեպքում չէ, որ այդպես է: Ինչո՞ւ են ստիպում, որ մարդը գնա, այլ երկրում շարունակի կայանալ: Եթե, օրինակ, Ռուսաստան գնամ, նույն գովազդներն այնտեղ կանեմ, կստանամ գումարներ, կծախսեմ դրանք Ռուսաստանում: Ինչո՞ւ պետք է մնամ Հայաստանում և հանդուրժեմ այն հայերի պահվածքը, ովքեր առավոտից երեկո հալածում են ինձ: Եթե ուժ գտնեմ իմ մեջ, չեմ գնա, բայց չեմ կարծում»,- եզրափակեց նա: