Ռուսաստանը կարող է նվազեցնել կամ վերացնել Իրանի որոշ ապրանքների նկատմամբ տուրքերը

Ռուսաստանը դիտարկում է Իրանի գյուղատնտեսական ապրանքների նկատմամբ տուրքերի նվազեցման կամ վերացման հնարավորությունը: Վերջնական որոշումը, սակայն, պետք է կայացնի Եվրասիական տնտեսական հանձնաժողովը: Ինչպես փոխանցում է «Արմենպրես»-ը, վկայակոչելով «Ռիա նովոստի»-ն, այս մասին հայտարարել է ՌԴ տնտեսական զարգացման նախարար Ալեքսեյ Ուլյուկաևը Իրանի արդյունաբերության և առևտրի նախարարի հետ հանդիպմանը: Նա շեշտել է, որ քայլեր են կատարում Իրանի համար առևտրային պայմանները բարելավելու և հեշտացնելու ուղղությամբ: «Մենք քննարկում ենք մաքսային տուրքերի իջեցման կամ վերացման հարցը գյուղատնտեսական ապրանքների համար` բանջարեղենի ու մրգերի: Խոսք է գնում նաև թռչնամսի, ձկան և կաթնամթերքի շուկաների ապրանքների մասին»,-ավելացրել է ՌԴ պաշտոնյան:

Նա հավելել է, որ Իրանի համար ավելի ցածր տուրքերի հաստատումը չի հակասի Առևտրի համաշխարհային կազմակերպության նորմերին, և որ վերջնական որոշումն այդ հարցում պետք է հաստատի Եվրասիական տնտեսական միությունը:

Ալեքսեյ Ուլյուկաևը նշել է, որ հաջորդ շաբաթ Թեհրան կայցելի ՌԴ առաջին փոխվարչապետը, ով կստորագրի Իրանի հետ ներդրումների խրախուսման ու պաշտպանության մասին համաձայնագիր, որը ՌԴ կառավարությունը հաստատել է մեկ շաբաթ առաջ: «Դա կարևոր է, քանի որ արդեն ներդրումները կլինեն շատ ավելին, քան ներկայում են»,-ասել է Ուլյուկաևը: