«Փաստ» օրաթերթը գրում է

Առողջապահության նախարարությունը հանրային քննարկման է ներկայացրել նախագիծ, որը նպատակ ունի բարելավել Գեղարքունիքի մարզի Վարդենիս քաղաքում մատուցվող բժշկական ծառայությունների որակն ու մատչելիությունը՝ խնայելով ֆինանսական միջոցներ Վարդենիսի պոլիկլինիկան քաղաքի հիվանդանոցին միացման եղանակով վերակազմակերպելու միջոցով։ Այս նախագծով առաջարկվում է նաև «Բերդի ԲԿ» ՓԲԸ բաժնետոմսերի կառավարման լիազորությունները վերապահել առողջապահության նախարարությանը, իսկ պաշտպանության նախարարության զորամասերի զինծառայողներին, նրանց ընտանիքների անդամներին և զինծառայողներին հավասարեցված անձանց սպասարկումն իրականացնել ՊՆ ենթակայության տակ գործող բժշկական կազմակերպության կողմից։ Նախարարության պնդմամբ՝ նախագծի ընդունման անհրաժեշտությունը պայմանավորված է Գեղարքունիքի և Տավուշի մարզերի առողջապահական համակարգերում փոփոխություններ իրականացնելու անհրաժեշտությամբ։

Մասնավորապես՝ ներկայումս Գեղարքունիքի մարզի Վարդենիսի տարածաշրջանում գործում են «Վարդենիսի հիվանդանոց պետական» և «Վարդենիսի պոլիկլինիկա» ՓԲԸ-ները։ Նշվում է, որ Վարդենիս համայնքի և շրջակա գյուղերի ազգաբնակչության արտահիվանդանոցային և հիվանդանոցային բժշկական ծառայությունները տրամադրում են Վարդենիսի պոլիկլինիկան և հիվանդանոցը, ինչպես նաև Վարդենիսում տեղակայված զինվորական հոսպիտալը, որը նույնպես ազգաբնակչությանը որոշ հիվանդանոցային ծառայություններ է մատուցում: Արդեն իսկ «ՀՀ մարզերի առողջապահության համակարգերի օպտիմալացման ծրագրերը հաստատելու մասին» որոշմամբ՝ մարզերում գործող պոլիկլինիկաների և հիվանդանոցների մեծամասնությունը միաձուլման կամ միացման ձևով վերակազմակերպվել են՝ ստեղծելով մարզային բժշկական կենտրոններ։ Հաջորդիվ՝ Տավուշի մարզի Բերդի բժշկական կենտրոնի մասին: Այն արդիականացվել և շահագործման է հանձնվել 2015 թ.-ի հուլիսի 24-ին: Համաշխարհային բանկի աջակցությամբ իրականացվող ծրագրերի շրջանակներում իրականացվել են կենտրոնի երկհարկանի պոլիկլինիկական և մեկհարկանի ինֆեկցիոն մասնաշենքերի վերակառուցման, ինչպես նաև նոր կցակառույցի կառուցման շինարարական աշխատանքները:

30 մահճակալ հզորությամբ հիվանդանոցը սպասարկում է շուրջ 24100 բնակչի, որից 7500-ը քաղաքաբնակ են, իսկ 16600-ը` գյուղաբնակ (2020թ.-ի հունվարի 1-ի դրությամբ): Բացի դա, Տավուշի տարածաշրջանում գործում է նաև Բերդի զինվորական հոսպիտալը, որը զբաղեցնում է Բերդի ԲԿ-ի հիվանդանոցային հին մասնաշենքերից մեկ հատվածը: Հոսպիտալը սպասարկում է Բերդի տարածաշրջանում տեղակայված զորամասերի զինծառայողներին, ինչպես նաև որոշ հիվանդանոցային ծառայություններ է մատուցում ազգաբնակչությանը։ Կառավարության 2018 թ.-ի ապրիլի 12-ի N 440-Ն որոշման համաձայն՝ «Բերդի ԲԿ» ՓԲԸ բաժնետոմսերի կառավարման լիազորությունները վերապահվեցին Պաշտպանության նախարարությանը, ԲԿ-ում բացվեց նոր՝ 40 մահճակալ հզորությամբ թիվ 1 թերապևտիկ բաժանմունք, որը պետք է սպասարկեր Բերդի տարածաշրջանում ՊՆ-ի զորամասերի զինծառայողներին, նրանց ընտանիքների անդամներին և զինծառայողներին հավասարեցված անձանց։

Հաշվի առնելով մի շարք հանգամանքներ՝ նախարարության դիտարկմամբ նպատակահարմար է տարանջատել զինծառայողներին, նրանց ընտանիքների անդամներին և զինծառայողներին հավասարեցված անձանց և քաղաքացիական ազգաբնակչությանը սպասարկող բժշկական հաստատությունները՝ վերջիններիս կառավարման լիազորությունները վերապահելով տվյալ բնագավառներում պատասխանատու պետական տարբեր մարմիններին (ՀՀ ՊՆ, ՀՀ ԱՆ)։ Արդյունքում՝ այս նախագծով առաջարկվում է Գեղարքունիքի մարզի Վարդենիսի պոլիկլինիկան միացնել Վարդենիսի հիվանդանոցին, կազմակերպությունը վերանվանվի Վարդենիսի բժշկական կենտրոն։ Քաղաքում կգործի մեկ բժշկական հաստատություն։ Բժշկական հաստատությունների միացման հետևանքով ակնկալվում է վարչական անձնակազմի կրճատում, ինչն էլ կհանգեցնի վարչական և պահպանման ծախսերի նվազեցման։ Խնայված ֆինանսական միջոցներն, ըստ նախարարության, կուղղվեն բժշկական կազմակերպության արդյունավետ գործունեության համար անհրաժեշտ սարքավորումների ձեռքբերմանը։

Հաջորդիվ՝ «Բերդի բժշկական կենտրոն» ՓԲԸ բաժնետոմսերի կառավարման լիազորությունները կվերապահվեն Առողջապահության նախարարությանը՝ կրճատելով հատուկ զինվորական ծառայողների և նրանց հավասարեցված անձանց սպասարկման համար ծավալված 40 մահճակալը։ Վերջիններիս սպասարկումը կշարունակվի իրականացվել Պաշտպանության նախարարության ենթակայության բժշկական կազմակերպության կողմից։

Լուսինե Առաքելյան

Մանրամասները՝ «Փաստ» օրաթերթի այսօրվա համարում