Կստեղծվի Հայաստանի բուժաշխատողների ամբողջական տվյալներով ռեգիստր, որը կցված կլինի տարբեր բազաների․ «Փաստ»

«Փաստ» օրաթերթը գրում է

Առողջապահության նախարարությունը ցանկանում է ունենալ բուժաշխատողների ռեգիստր, որն իր հերթին կցված կլինի տարբեր բազաների, և հնարավորություն կտա ամբողջական տվյալներ ունենալ Հայաստանի Հանրապետության բուժաշխատողների` առողջապահության ոլորտում մարդկային ներուժի վերաբերյալ: Այս կերպ է նախարարությունը հիմնավորում «Բուժաշխատողների ռեգիստրի ձևավորման և վարման կարգը հաստատելու մասին» կառավարության որոշման նախագիծը հանրային քննարկման ներկայացնելը:

Նշվում է, որ նախագծի ընդունումը բխում է «Բնակչության բժշկական օգնության և սպասարկման մասին» օրենքից, որի 9-րդ հոդվածի 2-րդ մասով կառավարությանը վերապահված է բուժաշխատողների ռեգիստրի ստեղծման լիազորություն: Դրա ստեղծման նպատակն է առողջապահության բնագավառում գործունեություն իրականացնող բուժաշխատողների վերաբերյալ տվյալների հավաքումը, հաշվառումը, պահպանումը, ուսումնասիրումը, վերլուծությունը, կանխատեսումը և օրենքով նախատեսված դեպքերում դրանց փոխանցումը: Առողջապահական աշխատուժի պլանավորման, բժշկական մասնագետների նպատակային ուսուցման կազմակերպման, առողջապահական մասնագետների հավաստագրման համար խիստ անհրաժեշտ է ճշգրիտ և իրական ժամանակում թարմացվող առողջապահական աշխատուժի շտեմարանների առկայությունը՝ տվ յալ պահին աշխատող, չաշխատող և կլինիկական օրդինատուրայում սովորողների (քանի որ արտակարգ իրավիճակներում նրանք նույնպես ներգրավվում են որպես բժշկական սպասարկում իրականացնողներ) վերաբերյալ ամբողջական տեղեկատվության և հետագա վերլուծության ու կանխատեսման համար:

Ռեգիստրը բժշկական անձնակազմի տեղեկատվության հիմնական աղբյուրն է, իսկ առողջապահական ծառայություններ մատուցողները առաջնային աղբյուր են բժշկական ծառայության և պացիենտի հետ կապված տվյալների էլեկտրոնային առողջապահության համակարգ մուտքագրման համար: Նախարարությունն ընդգծում է, որ 2020 թ.-ի կորոնավիրուսային հիվանդության և նույն թվականի ռազմական իրավիճակը ցույց տվեցին բժշկական անձնակազմի տեղակայման արդյունավետ պլանավորման և կառավարման կարևորությունը: Կենտրոնացված բժշկական աշխատուժի տեղեկատվական համակարգի և տվյալների հավաքագրման իրավական կարգավորման բացակայությունը դժվարացրեց անձնակազմի արդյունավետ տեղակայման և կորոնավիրուսային հիվանդության բուժման վերաբերյալ անհրաժեշտ դասընթացների կազմակերպումը:

Ներկայումս նախարարության «Ս. Ավդալբեկյանի անվան առողջապահության ազգային ինստիտուտ» ՓԲԸ-ի առողջապահական տեղեկատվական վերլուծական ազգային կենտրոնը բժշկական ծառայություններ մատուցող կազմակերպություններից հավաքագրում է տարեկան վիճակագրական հաշվետվություններ՝ Առողջապահության նախարարի կողմից հաստատված ձևաթղթերի միջոցով: Հավաքագրված տեղեկատվությունը պարունակում է միայն ամփոփ տեղեկատվություն՝ բժշկական հաստատություններում աշխատող բժշկական մասնագետների մասնագիտացումների, սեռի, դրույքի մասին, որոնք ամփոփվում են հանրապետության, մարզի, բժշկական հաստատության մակարդակով և հրապարակվում են: Նախագծով առաջարկվում է հաստատել բուժաշխատողների ռեգիստրի ձևավորման և վարման կարգը, որը հիմք կհանդիսանա առողջապահության բնագավառում գործունեություն իրականացնող բժշկական մասնագետների վերաբերյալ տվյալների հավաքման, հաշվառման, պահպանման, ուսումնասիրման, վերլուծության, կանխատեսման և օրենքով նախատեսված դեպքերում փոխանցման համար:

Միաժամանակ նախագծով նախատեսվում է այս ռեգիստրի ինտեգրումը տվյալների այնպիսի բազաների, ինչպիսիք են` Պետական եկամուտների կոմիտեի «Հարկատու-3», ՀՀ ոստիկանության «Բնակչության պետական ռեգիստր», ՀՀ արդարադատության նախարարության քաղաքացիական կացության ակտերի գրանցման գործակալության «Ազգակցական կապերի համակարգ», ՀՀ Կրթության, գիտության, մշակույթի և սպորտի նախարարության «Կրթության կառավարման տեղեկատվական միասնական համակարգ»: Հավելենք, որ հանրային քննարկման հարթակում արդեն իսկ կան նախագծին դեմ արտահայտվողներ:

Լուսինե Առաքելյան

Մանրամասները՝ «Փաստ» օրաթերթի այսօրվա համարում