Տեսանյութ՝ Երևան-Սևան ավտոճանապարհին ողբերգական ելքով վթարի վայրից

2021թ. մայիսի 30-ին՝ ժամը 04:30-ի սահմաններում, Երևան-Սևան ավտոճանապարհին՝ «Շանգրիլա» խաղատան դիմացի հատվածում, «Նիսսան» մակնիշի ավտոմեքենան, կորցնելով կառավարումը, դուրս է եկել ճանապարհի երթևեկելի մասից և հարվածել միջնամասի կանաչապատ գոտու երկաթե էլեկտրասյանը, որի հետևանքով ավտոմեքենայում գտնվող երկու ուղևորները ստացած մարմնական վնասվածքներից տեղում մահացել են, իսկ վարորդը՝  մարմնական վնասվածքներով, տեղափոխվել է բժշկական կենտրոն:

Դեպքի առթիվ ՀՀ քննչական կոմիտեի Կոտայքի մարզային քննչական վարչության Աբովյանի քննչական բաժնում հարուցվել է քրեական գործ՝ ՀՀ քրեական օրենսգրքի 242-րդ հոդվածի 2-րդ մասի 3-րդ կետով:

Նախաքննության ընթացքում կատարվել են  քննչական և դատավարական այլ գործողություններ, այդ թվում՝ դեպքի վայրի զննություն, առգրավվել և զննվել են դեպքի վայրին հարակից ռեստորանային համալիրի հսկիչ անցակետում առկա տեսանկարահանող սարքերը, ավտոմեքենայի երկու ուղևորները ճանաչվել են տուժող, նշանակվել են դիակի դատաբժշկական փորձաքննություններ:

Որոշում է կայացվել՝ ավտոմեքենայի վարորդի նկատմամբ որպես խափանման միջոց ընտրել ստորագրություն չհեռանալու մասին, վերջինս հարցաքննվել է: Նրա օրգանիզմում ալկոհոլի առկայությունը կամ բացակայությունը պարզելու համար նշանակվել է դատաքիմիական փորձաքննություն:

Նախաքննությունը շարունակվում է:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: