Օտարերկրյա ներդրողների հետաքրքրությունն աճում է Գյումրու նկատմամբ. քաղաքապետ

 Գյումրիում հաջորդ տարի կբացվեն նոր աշխատատեղեր: Այս մասին դեկտեմբերի 17-ին լրագրողների հետ ունեցած տարեվերջյան ամփոփիչ հանդիպման ժամանակ տեղեկացրեց Գյումրու քաղաքապետ Սամվել Բալասանյանը:

2016 թվականի համար արդեն նախանշված են լուրջ ծրագրեր. դրանք հիմնականում  շվեյցարահայ գործարար Վարդան Սերմաքեշի կողմից առաջարկված ծրագրերն են: «Ես միջնորդ հանդիսացա Գյումրիի գործարարների և «ԱրմՍվիսԲանկ»-ի միջև: 3 ծրագիր արդեն ֆինանսավորվել է: Դրանցից է «Գևորգ Վահան» ընկերությունը, որը նախատեսում է լրացուցիչ 200 աշխատատեղ, ևս 400 աշխատատեղ նախատեսված է ստեղծել կարի նոր արտադրամաս-ուսումնական կենտրոնում, որի համար հատկացվել է  Գյումրիի նախկին «Երկաթգծի հիվանդանոցի» տարածքը: Նոր աշխատատեղեր և նոր բիզնես նախատեսվում է նաև հոլանդացիների հետ համագործակցության արդյունքում՝ Շիրակի մարզի գյուղատնտեսական ամենատարածված ճյուղերից մեկի՝ կարտոֆիլի արտադրության հիմքի վրա՝ նոր գործարանը կարտադրի կարտոֆիլ-ֆրի և կարտոֆիլի փոշի: Նախատեսվում է, որ այս նոր արտադրությունը 200 աշխատատեղի խնդիր կլուծի: Հոլանդացիներն արդեն իսկ խնդրել  են ներկայացնել կարտոֆիլի տեսակների և տարածքի հետ կապված հարցերը»,-նշեց Սամվել Բալասանյանը՝ հավելելով, որ կան նաև ածիկի նոր արտադրության հետ կապված ծրագրեր:

Ամեն դեպքում, Գյումրիի հանդեպ հետաքրքրությունը մեծանում է  ոչ միայն տարբեր բանկերի, դիվանագիտական կառույցների  ու կազմակերպությունների, այլ նաև այնպիսի երկրի կողմից, ինչպիսն Չինաստանն է: