«Անվտանգությունն ապահովելու մի ճանապարհ կա. դա ՌԴ-ն է». Գագիկ Ծառուկյան. «Փաստ»

«Փաստ» օրաթերթը գրում է

Նախընտրական գործընթացներում ամենից կարևոր հարցը, որին պիտի պատասխանեն բոլոր կուսակցությունները, պետության անվտանգության ապահովման հարցն է։ Հայաստանի պարագայում դա առանձնահատուկ կարևոր է, քանի որ մենք գտնվում ենք թշնամիներով շրջապատված տարածաշրջանում, ուր վերջին՝ 44-օրյա պատերազմից ու նոյեմբերի 9-ի խայտառակ հայտարարությունից հետո անգամ դեռ կա անվտանգության շոշափելի դեֆիցիտ, Ադրբեջանը սեփական զորամիավորումներն է մտցրել ՀՀ-ի սուվերեն տարածք՝ Սյունիք ու Վարդենիսի շրջան, գերի վերցրել 6 հայ զինվորի, ունենք մեկ սպանված։

Սա նշանակում է, որ հակառակորդը դեռ հեռուն գնացող պլաններ ունի՝ կապված մեր երկրի, այնտեղով դեպի Նախիջևան միջանցքներ ու հաղորդակցային ուղիներ ստանալու մասով։ Հետևաբար մենք պետք է լինենք զգով ու ռազմապես պատրաստված ցանկացած նոր ռազմական գործողության։ Ըստ այդմ, վաղվա ցանկացած իշխանություն առաջին հերթին պետք է անվտանգության այնպիսի տեսլական առաջարկի մեր քաղաքացիներին՝ հիմք ընդունելով տարածաշրջանում ու Հայաստանի շուրջ ձևավորված իրողությունները, որ մենք լինենք անվտանգ, պաշտպանված։ Այսօր՝ մեր բանակի խոցելի ու մեր հասարակության բարոյալքված առկա վիճակում, դա, իհարկե, հեշտ չէ, բայց պետք է հասկանալ, որ միայն կամքի ու խելամիտ մտքի պայմաններում կկարողանանք այդ խնդիրը լուծել։

«Բարգավաճ Հայաստան» կուսակցությունը և նրա առաջնորդ Գագիկ Ծառուկյանը մեկ անգամ չէ, որ առանձնահատուկ կարևորել են ՀՀ-ի համար ողջ Հարավային Կովկասում ՌԴ-ի անվտանգային կարևոր դերակատարումը։ Չմոռանանք, որ հենց ՌԴ-ի ջանքերով հնարավոր եղավ կանգնեցնել 44-օրյա պատերազմը, որը ահռելի մեծ կորուստներ պատճառեց մեզ։ Արտաքին քաղաքականության ոլորտում ՀՀ-ն, ՌԴ-ից բացի, որևէ մեկ այլ երկրի հետ չունի համաձայնագրերի նման համակարգ, որը կընդգրկի անվտանգության հարցերի գրեթե ողջ համալիրը: Այս հանգամանքը Ռուսաստանի հետ մեր հարաբերությունները որակապես տարբերակում է գործընկեր այլ պետությունների հետ Հայաստանի հարաբերություններից: Ռուսաստանի հետ մեր հարաբերությունները բարեկամական ու դաշնակցային են։ Հենց այս ելակետից են բխում «Բարգավաճ Հայաստան» կուսակցության ծրագրային դրույթների մեջ պետության անվտանգության ապահովման վերաբերյալ մոտեցումները։

Ձևավորման սկզբնական փուլից առ այսօր «Բարգավաճ Հայաստան» կուսակցությունը գտնում է, որ, որպես Հայաստանի Հանրապետության անվտանգության երաշխավոր, Ռուսաստանի Դաշնության ներկայությունը մեր երկրում պետք է հասնի առավելագույն մակարդակի: Հատկապես մեր հայրենիքի համար հետպատերազմական այսօրինակ ծանր ժամանակաշրջանում նշված գործընթացը կարևորագույն առաջնահերթություն է: Այս համատեքստում անհրաժեշտ է Ռուսաստանի Դաշնության հետ նոր ռազմաքաղաքական պայմանագիր կնքել: Հայաստանի Հանրապետությունը Ռուսաստանի Դաշնության հետ երկկողմ և բազմակողմ հարաբերությունների շրջանակում պետք է վարի իր ռազմավարական դաշնակցի համար վստահելի քաղաքականություն: Սրանք իրականության ու իրատեսականության վրա հիմնված մոտեցումներ են, որ իրենց հիմքում ունեն մեր ազգային շահերի վերաբերյալ առարկայական դիտարկումներ։

Հենց այս մասին նաև երեկ Գեղարքունիք կատարած իր այցի ժամանակ խոսեց ԲՀԿ առաջնորդ Գագիկ Ծառուկյանը՝ նշելով. «Ադրբեջանը առաջ է գալիս, մարդիկ լարված են, պետք է ժողովրդի անվտանգությունը ապահովել, և դա կարող է անել միայն Ռուսաստանը՝ մեր դարավոր բարեկամը, գործընկերը։ Մեր սահմանին պետք է կանգնած լինեն հայ ու ռուս զինվորները»։ Հիշեցնենք, որ հենց Ռուսաստանն էր այն միակ երկիրը, որ պատերազմի ծանր օրերին ռազմատեխնիկական օգնություն էր տրամադրում Հայաստանին։ Հենց Ռուսաստանն է այն երկիրը, որի խաղաղապահներն են այսօր անվտանգություն ապահովում Արցախում։

Հենց Ռուսաստանն է այն երկիրը, որի 102-րդ ռազմաբազայի զինվորները այսօր կայունություն են ապահովում Սյունիքում ու զսպում ադրբեջանցիների ռազմական ներթափանցման փորձերը։ Այսինքն, «Բարգավաճ Հայաստան» կուսակցության՝ հայ-ռուսական հարաբերությունների խորացման ծրագրային դրույթները լիովին ու ամբողջությամբ արտացոլում են այն իրականությունը, որի մեջ մենք ապրում ենք՝ հնարավորություն տալով իրապես ավելացնել մեր պետության անվտանգության ապահովման մակարդակը։

ԱՐՍԵՆ ՍԱՀԱԿՅԱՆ

Մանրամասները՝ «Փաստ» օրաթերթի այսօրվա համարում