ԵՄ-ի գագաթնաժողովն ընդունեց սահմանների պահպանության գործակալություն ստեղծելու առաջարկը

ՄԻՋԱԶԳԱՅԻՆ 18 Դեկտեմբեր, 2015 10:52

Եվրամիության 28 երկրների պետությունների ու կառավարությունների ղեկավարները Բրյուսելում գագաթնաժողովի առաջին օրվա արդյունքներով հաստատել են սահմանապահ եւ առափնյա պահպանության նոր գործակալություն ստեղծելու Եվրահանձնաժողովի առաջարկը: Դրա համար ԵՄ-ի սահմանների պահպանության գործող գործակալության՝ Frontex-ի բազայի վրա կստեղծվի նոր վերազգային համաեվրոպական ծառայություն, որի թվաքանակը պետք է կազմի շուրջ 1,5 հազար:

«Առանց արտաքին սահմանների պաշտպանության մենք կտապալվենք որպես քաղաքական հանրակցություն: Բայց այսօր մենք կարող ենք լավատես լինել, որովհետեւ բոլոր ղեկավարները համաձայնեցին պաշտպանել արտաքին սահմանները: Այդ կապակցույթամբ մենք որոշեցինք շտապ կարգով քննարկել սահմանապահ գործակալության ստեղծման առաջարկությունը»,- մամուլի ասուլիսում ասել է Եվրախորհրդի ղեկավար Դոնալդ Տուսկը՝ հավելելով, որ գործակալության ստեղծման մասին որոշումը պետք է ԵՄ-ի Խորհուրդի կողմից ընդունվի 2016 թվականի առաջին կիսամյակում:

Բացի այդ, ինչպես հայտարարել է Եվրահանձնաժողովի ղեկավար Ժան Կլոդ Յունկերը, ԵՀ-ն պետք է օպերատիվորեն վերանայի փախստականներին վերաբերող Դուբլինյան համակարգը: Դրան համապատասխան՝ ԵՄ-ի երկրները, որտեղ միգրանտներն առաջին անգամ ապաստան ստանալու խնդրագիր են ներկայացնում, իրենք են պատասխանատու դրանց ուսումնասիրման համար: Եթե փախստականները հեռանում են այդ պետություններից, նրանց կարող են հետ վերադարձնել:

«Բրիտանական հարցը»՝ միգրացիայից հետո ներկայիս գագաթնաժողովի երկրորդ գլխավոր թեման, անպատասխան է մնացել ԵՄ-ի գագաթնաժողովի առաջին օրվա արդյունքներով:

Հանրակցության ղեկավարները քննարկել են ԵՄ-ի բարեփոխումների վերաբերյալ Մեծ Բրիտանիայի վարչապետ Դեւիդ Քեմերոնի պահանջները: Լոնդոնը պնդում է իր ինքնիշխանությունը քաղաքականության մի շարք ուղղություններում, ներառյալ աշխատուժի տեղաշարժը եւ բրիտանական սոցիալական համակարգից օտարերկրացիների օգտվելը:

«Ղեկավարները մի շարք մտահոգություններ են հայտնել այդ պահանջների կապակցությամբ եւ պայմանավորվել են շարունակել բանակցությունները, որպեսզի փոխզիջման հասնեն բոլոր այն չորս ուղղությունների շուրջ, որոնք նշել է վարչապետ Քեմերոնը»,- ասել է Տուսկը լրագրողներին, հաղորդել է ՏԱՍՍ-ը: