Թրամփը մեծ պատիվ է համարում այն կարծիքը, որն իր մասին հայտնել Է Պուտինը

Ամերիկացի գործարար եւ քաղաքական գործիչ Դոնալդ Թրամփը, որը հավակնում է Հանրապետական կուսակցությունից առաջադրվել երկրի նախագահի թեկնածու, իր համար մեծ պատիվ է համարել այն կարծիքը, որն իր մասին Մոսկվայում լրագրողներին հայտնել է Ռուսաստանի նախագահ Վլադիմիր Պուտինը:

Վաշինգտոնյան The Hill թերթի հաղորդման համաձայն, որը մասնագիտանում է ԱՄՆ-ի Կոնգրեսի գործունեության եւ երկրի ներքաղաքական հարցերի լուսաբանման բնագավառում, Թրամփն այդ թեմայի շուրջ խոսել է դեկտեմբերի 17-ին Կոլամբուսում (Օհայոյի նահանգ) նախընտրական հանրահավաքում ունեցած ելույթի ընթացքում:

«Միշտ էլ մեծ պատիվ է նման հաճոյախոսություն ստանալ մի մարդուց, որն այդքան մեծ հարգանք է վայելում սեփական երկրում եւ նրա սահմաններից դուրս»,- ասել է Թրամփը:

«Ռուսաստանը եւ Միացյալ Նահանգները պետք է ի վիճակի լինեն լավ աշխատել միասին, որպեսզի հաղթեն ահաբեկչությանը եւ վերականգնեն խաղաղությունն ամբողջ աշխարհում, էլ չասած առեւտրի եւ այլ օգուտների մասին, որոնք բխում են փոխադարձ հարգանքից»,- հավելել է Թրամփը:

Դեկտեմբերի 17-ին ՌԴ նախագահ Վլադիմիր Պուտինը, ելույթ ունենալով ամենամյա մեծ մամուլի ասուլիսում, նշել Է, թե Դոնալդ Թրամփին համարում Է ԱՄՆ-ի նախագահական մրցարշավի բացարձակ առաջատար եւ տաղանդավոր մարդ: «Նա, անկասկած, տպավորիչ ու տաղանդավոր մարդ Է: Նա նախագահական մրցարշավի բացարձակ առաջատարն Է»,-ասել Է Պուտինը: Նա ողջունել Է Ռուսաստանի հետ առավել խորը հարաբերություններ հաստատելու պատրաստակամության վերաբերյալ Թրամփի արած հայտարարությունը:

«Մեր գործը չԷ նրա արժանիքները վեր հանելը, բայց նա նախագահական մրցարշավի բացարձակ առաջատարն Է»,-ասել Է Պուտինը: «Նա ասում Է, թե ցանկանում Է անցնել ավելի սերտ հարաբերությունների: Միթե մենք կարող ենք դա չողջունել: Իհարկե, մենք դա ողջունում ենք»,-հավելել Է ՌԴ նախագահը: